中左六合彩頭獎四千八百萬，依家唔知點算?: 第六章73
「...嘻嘻...咁我依家咪即係姑姐囉！」喊完一輪之後，阿妹有返心情開始喺度講笑啦。
「...係呀，姑姐！哈哈...哈哈！」我回應。
「...終於都知道浠琳係阿哥你個女啦，係咪鬆左一口氣呀？」阿妹笑笑口問。
「...都係嘅...er...但係....！」我回應。
「...但係乜野呢？」阿妹再問。
「...但係就係唔明點解詠恩死都唔肯認浠琳係我個女囉。」我無奈回應。
「...可能恩姐果陣好嬲你呢！」阿妹回應。
「...好嬲都唔洗唔認掛？開頭又唔比我咁接近浠琳你唔覺得好奇怪咩？」我反問阿妹。
「...你諗多左姐，快啲搵個機會追返恩姐把啦。」就係咁，同阿妹嘅話題就到此結束啦。
佢覺得我諗多左。但我覺我一定係有啲野詠恩先會唔認浠琳係我個女，所以我諗住暫時都唔會將依個秘密講出離住，一來係唔想刺激詠恩，二來呢...就係想查出到底點解詠恩要講大話。
第二日我如常返工，詠恩亦都早返左離，知道左浠琳係我個女之後呢，見到詠恩都特別有種幸福嘅感覺架。
「...傻左呀你！」詠恩見到我望住佢陰陰咀笑，而家望住我問。
「...唔...唔係，諗起啲開心野姐！」我回應。
「...游水贏左？」詠恩問。
「...定...係諗起ivy咋。」詠恩忽然又諗起阿妹。
「...你又講左去邊呀！」我回應。
「...點知你姐，可能你琴日放假約左ivy去玩開心得滯啦！」詠恩繼續挖苦我。
「...邊有姐！」我無奈回應。
「...呵...唔知你啦！」最後詠恩用玩野嘅語氣講完就行開左啦。
「...！」我都唔知講咩好啦。
「...過離啦，講笑咋！」吖...原來今次比詠恩玩返，佢返到埋位之後就拎左啲送貨單笑笑口咁叫我，咁即係話佢冇嬲我啦，嘻嘻...咁都好啲...，見佢心情唔錯，於是我約左佢一陣一齊食lunch。
今日啲貨真係好多呀，但係為咗可以準時返離食lunch，我緊係開行turbo啦，死劈難劈冒住比警察捉嘅風險衝左三枝燈、cut左兩次雙白，好彩都無驚無險，1點左右總算返到離旺角啦。
但係當我泊緊車果陣....
「...咇咇.....！」電話忽然響起，唔通係詠恩？
「...喂...邊位！」我用耳機接聽左。
「...聰！」喺一把好熟悉嘅女仔聲。
「...你係...！」我諗緊係邊個。
「...小生呀！」原來係小生，唔怪得把聲咁熟啦。
「...哦...做咩咁好閒晴逸致搵我呀？」我笑笑口問。
「...喂...你依幾日得唔得閒呀？」小生忽然問左個咁嘅問題。
「...做咩咁問？」我疑惑回應。
「...有部電影有個角色我uncle想你去試吓。」小生回應，電影角色？咩料呀？
「...邊位你uncle呀？」我反問。
「...上次喺停車場見到果個呢！」小生回應。
「...哦...！」原來果個一中年男人。
「...你uncle 咩人離架？」我反問。
「...佢係電影監製離嘅，本來係我阿哥契爺，自從我阿哥過左身之後，佢就一直照顧住我地一家人啦。」小生解釋，係喎...小生阿哥之前都係娛樂圈內人，佢識得啲監製都好合理吖，但係...點解會睇中我呢？
「...點解會搵我嘅？」我問。
「...上次停車場見到你之後呢，uncle 都認得你...聽到你嘅遭遇，咁啱uncle 有部戲埋緊班，我咪叫uncle 睇吓有啲咩可以幫吓你囉。」原來小生咁幫我，有啲感動添。
就係咁...我應承左小生去見佢uncle，唔知點解呢...忽然間有個咁嘅機會，個人好似唔知點咁添，難聽啲講句...可能太耐冇做明星個人開始回哂堂，有啲怯怯地咁...！
「...喂...！」詠恩忽然叫我。
「...諗野諗到入哂神咁，做咩喎！」詠恩再問，係喎...唔記得咗同詠恩食緊飯嘅添。
「...冇...冇野呀！」我敷衍回應。
「...明明就係有野...唔想講咪話唔想講囉！」詠恩有小小唔滿意咁講。
「...唔係呀...詠恩！」我講到依度停咗落離，諗起其實我都好耐都未試過直接叫詠恩個名，詠恩聽到之後個人都呆一呆，唔通佢同我都係一樣，有種好似...返返去以前嘅感覺？
「...究...究竟...咩事姐，你唔好嚇我啦。」詠恩個樣有小小驚。
「...聽日我可能會去一個電影嘅試鏡。」我將小生打比我嘅事講左比詠恩知道。
「...原來係小生牙！有...有機會咪好囉，仲擔心啲咩姐！」聽完之後詠恩回應。
「...但係...！」我又停低咗。
「...但是咩野呀？」詠恩有啲疑惑咁問。
「...如果真係in得成，咁...我可能要離開依一間公司架啦...！」我有啲無奈咁講。
「......！」詠恩呆左一呆，唔知比咩反應，我亦都一樣，我哋大家停頓左超過一分鐘。
「...傻啦...緊係做明星好啦，留喺度送貨邊有前途架。」一分鐘之後，詠恩微笑咁回應，但係我聽得出佢內心深處其實係唔捨得我走。
「...你捨得架嗱？」我好認真咁問佢。
「...咪...咪傻啦，講埋啲無謂野！」就係咁，詠恩輕輕帶過左我嘅問題，之後下午送貨果陣我都仲係好忐忑不安，我應該點做呢？算啦算啦...唔好諗咁多啦，煮到埋離先食啦，真係見得成至算。
收工返屋企諗左成晚之後，第二日...我守信一早起左身，著返靚靚仔仔咁去電影公司casting啦。
我跟住小生比我個地址，揸車去到葵涌嘅偉倫中心，睇吓先...二十樓...我搭𨋢上到去，門口已經大大個招牌寫住「寰x電影」門口出面仲掛住幾幅電影嘅海布添。
「...叮噹！」我撳鐘準備入去啦。
「...噠～！」接待員開門，於是我就推門入去啦。
「...早晨！」我講。
「...早晨...請問有咩幫到你呀？」接待員小姐問。
「...唔該我約咗十一點離casting架！」我回應。
「...哦..等等先，十一點...張先生？」接待拎左個文件夾出離睇緊。
「係呀...係呀！」我回應，就係咁，接待員帶左我入去，去到一間房嘅門口，叫我坐喺門口嘅一張櫈度等一陣。
我坐左喺度，開始諗吓到底我一陣要見嘅係咩野人呢？係套乜野電影？好多好多一連串嘅問題，開始喺我個腦入面浮現，冇計啦...始終我都係臨時拉夫，唔好諗咁多啦，唔識咪唔識囉，最緊要夠自然...做返自己。
「...嚓～」等左十分左右，房門終於都打開啦。
行到離嘅竟然係一個歌手出身，兼現時二、三線嘅演員。
「...喂！」佢主動同我點一點頭，應該係認得我，我亦都禮貌回應。
「...走先啦。」佢應該啱啱casting完，有小小匆忙咁好快就走左。
緊隨其後喺房出離嘅係一個女仔，目測三十零歲左右，應該係秘書之類嘅物體。
「...張生呀呵，請入離吖！」佢好有禮貌咁帶左我入房，房入面放左幾張櫈，有個男人坐左喺一張枱後面，即係典型面試果啲格局，睇離依個男人應該係導演之類嘅高級野。
「...張生，你好！」係個女仔講，佢安排我坐喺佢哋面前之後就坐左埋去個男人隔離啦。
「你地好！」我緊張回應。
「...放鬆啲唔洗咁緊張，等我自我介紹一下先啦，我係離緊依部電影嘅導演，我姓麥嘅，你當同我哋傾吓計得架啦，唔洗咁拘謹。」吓...原來依個三十零歲嘅女人先係導演牙？睇落唔係大我好多架咋喎？真係後生可畏。
「...咁呢...我哋依部電影係一部改編自張小嫻小說嘅親情電影離嘅。」導演開始為我一一介紹，講完一輪之後又問吓我一啲問題咁，麥導演嘅親和力令到我放鬆返好多，之後佢叫我試幾個唔同嘅表情講幾句唔同嘅對白我都游刃有餘，好快就casting完，成功得到一個角色啦，估唔到係咁易。