「...咁你個角色,就係一個曾經入過感化院嘅火鍋店店員!」麥導演講。

「...吓...咁主要做嘅野係....」我問。

「...送外賣!」麥導演打斷左我嘅問題。

「...吓...好...」我想再講。

「...好有發揮架...依個角色...!」麥導演再一次打斷我,而且仲不斷講好多關於依個角色嘅特質、人物、角色、時代、背景比我知,希望可以說服我依個角色嘅重要性,雖然開頭聽到做外賣仔係有小小唔鍾意架啦,但係聽完麥導演講完一輪之後,我對依個角色真係改觀左唔小。





「...但係我同無記果邊仲有啲合約喺身架喎!」傾完之後我忽然醒起。

「...放心...依一層監製都有同無記果邊了解過,據我所知你份死約應該係音樂果方面嘅,所以唔影響係電影演出依一方面。」原來小生uncle一早就做左野架啦,唔怪之得會咁易比我過到關啦。

「...返去記得熟讀劇本熟讀對白啦喎!」麥導演最後笑住口咁送我出門口,就係講左依句說話,我唔知說話背後有啲乜野含意,但係而家嘅感覺好似「領」佢野喎,點都好啦...合約都簽埋啦,肉隨針板上架啦。

Casting完左之後已經好晏,但係我依然返左公司。

「...做...做乜無啦啦返離呀?」詠恩見到我,有啲奇怪咁問。





「...快啲做埋嘅手尾,收工食飯先講啦。」因為差唔多收工時間,所以我拉左詠恩出去食飯,詠恩亦都冇say no,可能佢都真係想聽吓我casting成點掛。

我揸主意帶左佢去食一間法國餐廳,唔知點解呢,忽然想要有啲情調,詠恩去到之後都打左個突,但都冇特別出到聲,繼續好自然咁同我一齊坐左喺一張可以望都海景嘅枱度。

「...做...做乜淨係食野唔講野姐,今日見成點呀?」食緊飯果陣,詠恩有啲疑惑咁問我。

「...唔好講啲唔開心野啦,快啲食多啲啦。」我笑笑口咁繼續夾野食比詠恩。

「...唔開心...?衰左牙?」詠恩有啲疑惑咁問。





「.....!」我繼續食野。

「...講啦...衰人!!」詠恩再一次追問,今次感覺有啲焦急。

「...詠恩牙...!」我忽然好認真,好感性咁叫左一聲詠恩個名,我諗我都好耐冇咁樣叫過佢啦。詠恩聽到亦都打左個突,而家粒聲唔出咁,靜待我嘅下一句說話。

「...我諗我要離開一段時間...」我有啲失落咁講依一番說話。

「...見成左?」詠恩仲係好疑惑咁款。

「...係...!」我回應。

「...咁...咁咪好囉,仲有咩唔開心姐。」詠恩微笑回應。

「...但係咁...代表...我要離開依一間公司啦。」我繼續失落回應。





「...咁樣...!」詠恩開始意識到我嘅失落,佢亦同時有啲忐忑不安。

「...唔可以請假咩?」詠恩諗左一陣問。

「...依一套電影呢...劇情主要係講分隔兩岸三地嘅三姐妹架,因為成本嘅關係主要拍攝地點都會喺國內進行...咁所以...我最小要上去兩三個月。」我詳細解釋。

「....咁....!」詠恩無言以對,有啲不知所措咁。

「...唔想我去...?」我好認真咁問。

「...點...點會呢,緊係..做明星好啦!」詠恩回應,感覺到佢其實好無奈,但又唔敢表露出離。

「...其實我都唔知自己係咪真係想做明星...,我自己都好亂...!」我回應。





「...唔通屈喺度送貨有前途咩,有機會...咁...緊係去啦,我覺得...你...應該幾有...表演...天分....!」詠恩尷尬講出。

「...你又知...你睇過牙?」我笑笑口回應。

「...唔...唔係...我估吓咋嘛...!」詠恩紅都面埋,仲唔係講緊大話。

「...咁好啦...!」我深呼吸左一下。

「...?」詠恩對眼打左個問號。

「...我聽你講,去繼續嘗試,睇吓我係咪真係做明星嘅材料!」我微笑回應。

「...!」詠恩微笑。

「...不如我地飲小小酒囉!」我提議。





「...吓...飲酒...!」詠恩有啲驚訝。

「...做咩事呀?」我問。

「...冇野...我戒左好耐姐!」詠恩尷尬回應。

「...吓...戒咗!」我有啲驚訝,因為我同詠恩一齊果陣,詠恩都算係幾鍾意飲酒果啲人離,雖然唔係話成日會飲到爛醉果隻,但間中都會有斷片嘅時候,估唔到佢會戒左。

「...唔...唔緊要啦,可以飲小小嘅...!」詠恩口窒窒咁講,可能唔想掃我興啦。

就係咁,我開左支紅酒。其實我對飲酒一向都冇乜喜好,只係情到濃時、覺得個mood到、咁所以先飲。我叫侍應隨便揀一支比我地,詠恩本來話飲小小,但係飲吓飲吓,佢就停唔到啦。可能太耐冇飲掛,一飲返就好似吸毒咁,越飲越多。

「...夠啦!」到最後我撳停左詠恩。





「...嘻嘻~~我仲要飲!」詠恩開始傻笑。

「...飲你個頭!埋單吖唔該!」為咗阻止詠恩斷片,我唯有即時埋單,拿拿臨扶佢上車車佢返屋企啦。

我承認...我係醉酒駕駛,之但係我真係飲得唔多...一至兩杯左右,就算超錶都係有限數,加上我多年駕駛經驗,有能力開到車送詠恩返去,所以各位千祈唔好亂咁學呀。

「...喂...醒啦喂!」到詠恩樓下我拍一拍佢膊頭。

「...!」詠恩全無反應,點算好呢!

「...你所打嘅電話暫時未能接通...」頂...小苑電話又唔通,仲諗住搵佢救命添架。

無辦法之下,我咩住佢返左入去。

「...蓮姐...開門呀!」好彩今晚係蓮姐當間,而且都係幾步路,都仲頂得住。

「...咦~張生,乜...陳小姐飲到咁醉呀...嘻嘻...快啲上樓啦。」蓮姐見到我咩住醉到不醒人士嘅詠恩竟然仲要笑淫淫咁幫我地撳埋𨋢,我都真係唔知佢諗緊乜野啦。點都好啦...都要唔該佢先,之但係上到去,到底要點做呢?撳鐘?如果開門嘅喺詠恩阿媽甚至乎係佢老豆嘅話,見我咩住自己個女,我會死得好難睇架喎!

就係咁...我坐左喺詠恩後樓梯思考左一陣,我扶住詠恩挨住我膊頭咁坐左喺度。詠恩後樓梯嘅環境...果幅比我畫花左嘅牆,忽然間就好似返返去以前咁樣。

唔知係咪郁到詠恩嘅關係呢,詠恩忽然有返反應,不過個樣睇離仍然係神智不清咁款,半開合眼望一望周圍...之後又挨返個頭埋離...!

「...好似未做哂啲功課喎!」詠恩講左句咁嘅說話。

「...吓...咩功課呀?」我疑惑回應。

「...聽日要交啦,份人際功課!」人際功課?唔通詠恩發夢以為依家仲係讀緊書果陣。

「...係咩?」我hea住回應。

「...嘻嘻~你會幫我架呵?」詠恩傻笑。

「...嗯~得啦得啦...我搞掂啦!」我繼續回應。

「...嘻嘻~幾時都係你對我最好!」點知詠恩講完依句之後,忽然攬住左我,仲咀左落離添!

「...ng.......!」我掙扎...不過只係掙扎左一秒姐,之後亦都情不自禁咁去迎合詠恩。

可能我都飲左酒嘅關係啦,心情非常興奮,同詠恩一樣,我好投入咁去感受返以前我哋一齊緊嘅果種感覺,簡單啲講句,我當自己仲係同詠恩停留左喺果個時空,彷彿就好似自己穿越左返去八年前咁,有啲乜野遺憾、我都可以一次過舒發出離。我由被動開始變成主動,攬住詠恩條小蠻腰,一邊撫摸住詠恩滑不溜手嘅肌膚,一邊同詠恩打車輪,足足享受左兩三分鐘,但當我情不自禁諗住對詠恩有進一步行動嘅時候,就喺我隻手慢慢由詠恩條腰移到上詠恩嘅胸部果陣,腦部忽然清醒起離,我忽然覺得依家詠恩神智清醒嘅時候我對佢咁做太乘人之危,我唔應該咁做,我應該等佢喺清醒自願嘅情況底下先做。

於是我依一刻嘅人性,克服左我嘅獸性,保持住我嘅理智,慢慢咁放開左詠恩。

「...你飲醉啦。」細細力推開詠恩之後。我講左句咁嘅說話。

「...嘢~~我邊有醉姐!」點知詠恩並無停低嘅意識,講完之後仲繼續想咀埋離,今次我雖然好想迎合,但理性主導一切,我雙手拉起左詠恩,然後慢慢扶住佢行返出走廊出面。

「...嘢~做咩姐!」詠恩有啲不滿,開始喺走廊大吵大鬧。

「...乖啦...你飲醉啦。」正當我唔知點算嘅時候...突然...

「...嚓~~」詠恩屋企度大門突然打開,我當時嚇到都唔知點反應啦。

「...嘻嘻~媽咪!」詠恩傻笑,因為開門嘅係詠恩嘅媽咪。

「...伯母~~你好!阿恩佢飲左兩杯!」我尷尬打招呼...是但講啲野咁。

「...入離先啦...!」伯母皺一皺眉頭,之後拉大左度門講。

「...唔...唔好意思!」我點一點頭,之後就繼續扶住詠恩入屋啦。

「...嘻嘻~媽咪,我男朋友呀!」行緊入屋果陣詠恩繼續語無倫次,好開心咁向住伯母介紹我,搞到我更加尷尬。

放低詠恩喺梳化之後,本來諗住極速鬆人啦...誰不知....

「...咪住!」伯母忽然叫住左我,搞到我個心到震埋。

「...咩事呀,伯母!」我慢慢回過頭來,好有禮貌咁微笑回應,其實驚到腳都震埋。

「...傾兩句得嘛?」伯母講到咁,我又點可能拒絕到呢,所以我留左落離。