✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #14

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3

．作者FB︰http://bit.ly/2jHymHF
．作者IG︰http://bit.ly/2rxGoFA

///////////




星期六一早，我站在地鐵站門口，邊打呵欠邊等華小姐。
那傢伙遲到了，整整十五分鐘之後才披頭散髮地跑過來，滿臉不好意思︰
「sorry呀，你等咗好耐？」
「係呀，等到差啲想走喇。」
「我唔知醒起身呀……呢個時間真係……有啲早……」
「你咁爛瞓架？個天都光晒啦，地鐵又已經開車。好嘅開始係成功之母，我哋行啦。」
她滿臉疑惑地盯著我，走進地鐵站裡。
時間是早上6時45分，一如我所料地鐵裡只有趕上班的人，半個同學或同年紀的人都看不見，我鬆了一口氣。



.

因為被Suki目擊的事，華小姐叫我帶她去試場時，我馬上就拒絕了。
沒想到這女人卻死纏爛打，說沒有我就無法安心。叫她去找阿堅，她說之前去錯試場的事是我跟她的秘密，不想被阿堅知道。
當時我不知是同情還是心軟，是怕她去跟阿堅爆大鑊還是覺得她被這種事影響成績太可憐，半推半就之下就答應了。
當時我盤算叫阿堅一起來，殺她一個措手不及，但當我打電話給阿堅時才突然驚覺︰
「如果阿堅問我，點解華小姐唔喺MSN group問而私底下約我，應該點答好？萬一阿堅有咩誤會，咁都算？」
於是我又匆匆掛斷電話。 

我後悔不已，決定失約。我在MSN跟她說自己很忙，結果被她疲勞轟炸三小時，問我幾點要做什麼，問我要去哪裡，說她可以配合我的時間云云……



我是一條不懂得拒絕人的廢柴，唯有約她早一點，把被人目擊的機會減到最低。

.

華小姐還沒考的科目只剩下兩科，我帶著她以人擋殺人的速度奔跑，在7點半已經來到最後一所學校。
她站在最後一間學校的大閘前，滿臉通紅地喘著氣︰
「太、太好啦……嗄……呢兩間學校都咁近……如果我一早聽你講，考試之前去一次試場先……上次就唔會搞成咁……」
「唔係我講架，係阿堅。我邊有咁細心？」
「……其實你都好細心呀……」
「你講乜？」
她笑著搖搖頭︰
「無嘢。」

「好啦，我嘅任務已經完成，趁而家仲早，我哋早啲返去……」


她伸出手拉住正要轉身的我︰
「你……我想問呢度係咪海邊？」
「嗰邊轉出去就係碼頭，你想坐船走？唔順路喎。」
「嗯……如果你識路，可唔可以帶我行過去？難得嚟開呢一頭，我想去望下個海。」

我看看手錶，距離八點尚有時間，坐地鐵大概需時十五分鐘，應該還是安全範圍︰
「好啦好啦。不過講明先，我真係好趕時間，你一陣唔好話唔願走呀，我一定、必然、絕對會掉低你架！」
「呵呵～好呀，我望一望就走。」

.

她答應得很乾脆，但去到碼頭的時候，她卻二話不說就爬過了圍欄，爬下海岸的大石堆，水平張開雙臂一路往海岸線走去。
大石又大又尖，平時用來防海浪。偶然也有阿伯帶著魚竿下去釣魚，但她走起來跌跌撞撞，走得比阿伯還危機。
「喂——！你唔係壓力大到想自殺呀？」
她回眸一笑，卻不理我繼續向海邊走去，我看看時間，只得爬過圍欄找她回來。



「喂，你去邊呀？」
「我想睇海呀嘛。」
「你咪睇咗囉，邊使行到咁出？」
「唔同架！坐喺海邊睇個海闊好多。」
「你份人咁論盡，一陣受傷咁點算呀？你仲要考試架。」
「邊有咁易受傷呀……」

話音未落，她就在一塊斜面上腳滑，眼看整個人都要向前傾倒，我連忙撲過去，抓住她的手再扶著她的腰穩定重心。
「喂，你呀！有啲自知之明啦，又唔係敏捷仲要落嚟！」
她靠在我的胸前，久久不能抬頭。
「喂？冇受傷呀嘛？」
「無、無呀……」
她紅著臉轉過身，這時我才注意到自己一直摸著她的腰，連忙舉高雙手後退兩步，心中不停默諗︰
「對唔住阿堅！對唔住！我真係無心架……」



她看見我的動作，樂不可支地笑著，隨意在石頭上坐下︰
「好啦，我聽你講啦，我就坐喺度睇。」
我距離她兩塊大石的位置坐下，只見海風吹得她秀髮亂飄，她舉起手壓住。
她的動作令我不期然留意到她的身體曲線，剛才一碰才發現，原來她沒有外表看起來那麼圓潤。所以胖胖的感覺其實來自……

我搖搖頭，別開視線不敢再看︰
「真係唔明你，海有咩咁好睇？」
「我都唔知呀……我中一嗰時呢，同一個女仔好friend。嗰時大家都啱啱升上中學，佢跟得好辛苦，所以成日都會放咗學就嚟海邊。佢話望下個海，吹下海風，個人就會輕鬆啲咁喎。」
「咁佢而家呢？」
她望望我，寂寞地笑了笑。我意識到自己可能說錯話，連忙說︰
「你都係當我無問過啦……」
「唔係呀唔係呀，佢適應唔到香港嘅中學生活，中二嘅時候就已經去咗外國啦。」
「你哋而家仲有無聯絡？」



她搖搖頭︰
「有時我覺得，感情真係好脆弱。只要用一啲距離加埋時間，再重要嘅人都會變得陌生。」
「……咁係因為唔係真係咁重要啫。」
「可能係因為我無情卦。呢啲無根據嘅嘢，又無數字，又無質量，我覺得好唔實在咁。」
「喂，你份人呀……唔係樣樣都可以用物理學去計架。」
「咁應該點樣計先啱？」
被她這樣一問，我為之語窒︰
「唔……應該係……即係呢……有一啲嘢，無論過咗幾耐，你都忘記唔到……你一直都記得，你無辦法放得低。如果可以嘅話，隨時都想重新嚟過，隨時都想補救……即係……唔……嗰啲應該叫做……叫……」

她深深地凝視著我︰
「你嘅意思係，可以超越時間？」
「Yeeeee——Yes！就係咁！」
「超越時間呀……好似好浪漫咁喎。」
她雙手抱膝，雙眼彷彿看穿一切︰
「呢個就係你同前女友嘅關係？」

「關咩事？我邊係講佢呀！我一啲都無掛住佢！」
「真係？」
「梗係！我呃你有乜著數？」
她莫名奇妙地笑了︰
「講大話。」

每次華小姐一提起初戀的事，我就想發脾氣︰
「喂！你憑乜話我……」
她卻不理會我，擅自帶過話題︰
「其實今次會考我無乜信心。」
我心中罵了兩句粗口，卻還是問︰
「你都會無信心？因為數學嗰日嘅事？」
「都係架。同埋，我喺自己學校都唔算最top最top嗰啲，外邊仲有咁多名校。」
「你間學校真係恐鬼怖……驚乜啫？轉嚟我哋學校咪得囉，我哋14分都收。」
「你講得咁輕鬆，即係你肯定有14分？」
「嗱，我冇咁講過架。」

她眼中突然發光︰
「不如我哋約埋一齊放榜呀？」
「吓？喂，唔同學校架……」
「我知呀。我哋朝早一齊嚟睇海，放鬆心情，然後再分別搭車去學校，咁咪得囉。」
我別過臉，避開她過於興奮的表情︰
「咁遙遠嘅事，到時再講啦……」
我沒說出口的一句是︰
「或者，到時陪你放榜嘅人係阿堅呢。」

.

華小姐看了大概十分鐘海，就被我催促回程。
她也很聽話，乾淨俐落地走回地鐵站，在八點鐘左右順便坐上地鐵。
我鬆了一口氣，和她並肩坐在車廂裡有說有笑。

就在這時，地鐵轉了一個彎，我不經意地瞄到旁邊的車廂——
身高180，在人群裡特別搶眼的阿堅正正就站在那裡。


 


/////

​
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3

*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝

．作者FB︰http://bit.ly/2jHymHF
．作者IG︰http://bit.ly/2rxGoFA