✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #5

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////
 




我下意識按住被打的臉頰，看著戰鬥格怒瞪我的Michelle︰
「喂！我救咗你喎而家。」
Abby也從櫃子之間撲出來，拉住Michelle的右手︰
「係呀阿Mi，好彩阿翔搵到呢間房咋，唔係我哋死硬呀～」
 
Michelle用審犯的眼神盯了我一會，再看看頭髮散亂、滿臉通紅的Abby︰
「你哋頭先匿喺邊？」
Abby指指櫃子之間，Michelle又問︰


「兩個人一齊？」
「係呀～好彩我哋夠瘦咋～」
 
Michelle皺皺眉，舉起左手又「啪」的一聲打中我另一邊臉︰
「鹹蟲！」
我不是耶穌，左右臉都被打後只覺得有一團火從心底猛攻到頭頂︰
「藍卓凝，你講下道理好喎！唔係我望到物理室冇鎖，唔係我搵到呢間預備室，就憑你兩個一早畀個咩Tiger捉咗去啦！你仲要打我？」
 
Michelle甩開想勸交的Abby，毫不退讓︰
「唔係你個鹹蟲死都要入嚟睇下女校，我哋會搞成咁？不負責任！你係咪男人嚟架？」


我反而笑了︰
「咩鹹蟲？咁老土嘅字你都識嘅？定係你自己成日諗埋啲淫嘢呀？」
 
 
……………………………………………………………………………………
.
.《自修室》小說2017年12月登錄各大書店
. 新增特別篇及修改內容
.
……………………………………………………………………………………
 
 
Michelle的臉瞬間漲紅起來︰
「你、你！我明明喺樓上見到你對阿Bi摸手摸腳，擺明搏懵啦！」
「呀，你啲用字……又真係幾80年代喎。你邊度出嚟架？唔知而家21世紀？係咪仲以為拖下手就會大肚？」


Abby連忙堆起笑臉攔在我們中間︰
「好啦好啦好啦～逃跑有啲碰撞好正常啫，總之而家安全咪得囉～」
 
.
 
Michelle沉默了5秒，然後率先拉開暗室的門往外走去，我跟Abby跟隨其後。
本以為她自知理虧會一直走回四樓課室，沒想到她卻停在物理室的講台前︰
「阿Bi，你返去先，我有啲嘢同呢個人講。」
 
我不禁愣住，Abby也一臉擔心會發生血案的樣子︰
「吓……我……我不如留喺門口等你哋啦……」
「唔使。你去課室救返阿堅出嚟先，佢應該好辛苦。」
我皺了皺眉，這麻L煩風紀隊長又對阿堅做了什麼？
 
Abby跟我交換一個眼神，再緩緩移向物理室後門︰


「咁～我……上去先。你哋，自己小心啲……」
目送那個高挑的長衫身影從門後消失，Michelle回過頭來，明明比我矮了一截卻抬頭猛瞪我，臉上毫無懼色︰
「而家冇人會幫你喇。」
 
我心中暗暗好笑。
女校女生真是對男性生物零認識啊，居然做出這麼笨的事。
如果我真的是色狼，剛才她這樣惹怒我，現在她才最危險呢。
Abby走了，那隻Tiger應該在檢查其他課室不會回來，只要我把她拉回那間預備室，她才真的是叫天不應、叫地不聞呢。
 
Michelle彷彿看穿我的想法，後退兩步防範我︰
「你、笑咩呀笑？」
「我中意笑咪笑囉，犯法？」
她卻不動氣，只用雷射槍似的眼神盯住我︰
「你想搵啲咩？」
 


話題突變，我反應不過來︰
「吓？」
「你要入嚟我哋學校，究竟想搵乜嘢？」
我剎那間心跳加速。
她怎麼會知道的？我明明連阿堅都沒說過……
 
她讀出了我的動搖，扯起嘴角冷笑︰
「本身阿Bi約咗你哋喺出面溫書，突然間又話要改地點。然後今朝你晨咁早就嚟到門口，一直係度望，入到嚟又左望右望，實在太明顯。」
她看我不說話，頓了一頓又繼續胸有成竹︰
「開頭我以為你個死鹹濕佬想睇女仔，想碰運氣睇下星期六有冇人返嚟，但點知你寧願望花圃望游泳池都唔望阿Bi……講！你入嚟全心究竟有咩目的？」
她毫無懼色地望著我，眼神凜然彷彿早已看穿一切。
 
.
 
我嚇得目瞪口呆，這傢伙觀察力原來這麼好？真不愧是麻L煩風紀隊長啊！


本想隨便說些謊話敷衍她，但轉念一想，我本來就想問她認不認識華小姐啊。
雖然現在她對我印象這麼差未必肯告訴我，但經不起推敲的謊言也肯定騙不過她。
兩害相權，還不如直說實話。
 
我深深吸一口氣，勉強堆起笑臉︰
「我……其實，有一件事一直都放唔低。」
Michelle盤起手，雙眼如測謊機那樣盯住我的臉。
我悄悄別開眼神，回憶著我跟華小姐的往事︰
「……我、我以前……曾經對一個女仔唔住，做咗好多錯事，令她好唔開心……我……我一直都想道歉，但又冇辦法……」
 
我說到一半，Michelle便不再盤手，臉上表情也呆了起來，似乎想不到我會突然這麼說。
我沒太在意，繼續說︰
「我、我真係好想搵返佢……好想好好地同佢講句對唔住……我諗咗好多辦法，但係都唔成功……所以我最後諗到嘅辦法就係，去佢學校度試下……」
 
Michelle雙眼仍深深地凝視著我，眼神卻不知幾時柔和起來︰
「你，你真係識得反省？」
「當然啦！我知道自己錯架！因為係我錯，所以無論對方肯唔肯原諒都好，我都一定要道歉！就算件事過咗幾耐都好，我都想去補償返！」
 
她深邃的雙眼盯了我好一陣，突然抿一抿嘴︰
「……我、先唔會咁就……你以為求其咁講兩句就呃到人？」
「呃……我……我係講真架喎……」
正想著要怎樣加強說服力，我突然摸到褲袋裡一件東西，正是今早還沒送出的小櫻鉛芯筆。
 
.
 
我靈光一閃，如果先擲出特殊物件增加好感度，應該能觸發good end劇情吧？
於是我掏出褲袋中文具店老闆幫忙包裝好的鉛芯筆，雙手遞到大小姐面前︰
「……送畀你。」
「咦？」
 
Michelle的臉一下子扭曲，似乎料不到我會出這一招。
「我……小學時嘅事，我可以道歉。我、雖然我搵唔返一模一模嘅款，不過……希、希望你可以原諒我。」
她的大眼睛看看我又看看那份禮物，滿臉意想不到︰
「我……可唔可以拆開睇下？」
「當、當然！」
 
「都係唔好，你幫我拆！」
還真有戒心啊……
我唯有代她輕輕拆開包裝，拿出那枝有魔法棒的小櫻鉛芯筆，再遞給她。
她端起鉛芯筆在眼前細看，一直默不在聲。
 
.
 
等待的時間特別長，我不由得有點緊張。
她會接受然後原諒我？還是會摔在我臉上說我幼稚？
如果她不收的話，我應該怎樣再問華小姐的事？
等一下，就算她收了，也不一定肯說啊。
女生真的很難猜，我究竟應該怎麼辦才……
 
「估唔到……」
正混亂間，突然聽到銀鈴般的聲音。
我連忙抬頭，只見在物理室柔和的晨光中， Michelle指尖輕撫鉛芯筆頂端的魔法棒，神情出現了微妙的變化。
 
她轉過頭來望我，深不見底的大眼睛裡不再浮現敵意︰
「估唔到你仲記得我枝筆個樣。」
我隨意點點頭，有點反應不過來︰
「呃……記得……少少咁啦……」
 
她直視我的雙眼︰
「一模一樣啊，呢枝魔法棒。居然而家仲有得賣。」
「呃……唔……係、係呀……」
也許不習慣被她讚賞，臉不由得燙了起來，剛被掌摑完的兩邊臉頰同時發痛。
 
「你成日做埋啲嘢都令人估你唔到……嘻。」
Michelle突然笑了起來，不是冷笑，不是嘲笑，而是正正常常發自內心的笑容。
「呃……」
她居然會笑？我完全呆住了，一瞬間還以為自己墜進了異次元空間還是中了毒。
 
「不過，你以為我咁就會原諒你？哼哼，咪使旨意呀！傻仔！」
說著，她舉起鉛芯筆上的魔法棒，像個魔法少女那樣指向我的眉心。
只見她的眼裡滿是笑意，可愛的酒窩輕輕點在臉頰兩旁，飽滿的笑容令人移不開視線
而我就如她所說，只能像個傻子那樣，呆呆地凝視她的笑臉，久久移不開視線。
 
肋骨之間，不知為何竟痛了起來。
怎麼會有這種事？我不明白……
只是因為孖辮和長衫的緣故吧？
只是因為記憶總是以物件連繫的吧？
 
在補習社重逢以來，我還是第一次看見Michelle的笑容。
她笑起來真的很好看，會令人看到靈魂出竅那種程度。
而令我害怕的是，在晨光之下的那個笑容，竟跟我心中無法忘掉的痛，慢慢重合在一起。
 
.
by又曦
意見&追稿︰http://bit.ly/2jHymHF

***補習社篇出書版與網上版是完全兩個故事
 

全系列現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]