✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #31

那天晚上，我睜著眼徹夜難眠。
我一直害怕Michelle在公文袋裡藏著一封長信，傾吐一些我不應該聽到的話、不想承認自己知道的事。
結果，整個公文袋裡只有影印本，Michelle甚至沒有寫過一隻字。
 
那些資料，全是華小姐的紀錄、華小姐的過去。
然而不知為何，讀完之後闔上眼睛，我卻只看到跟Michelle有關的記憶。
像是深夜裡的惡夢，死纏著我不放。
 
...................................................................................
.《自修室》小說已登錄各大書店


. 全新特別篇及修改內容
. 華小姐派必讀
. 死忠華小姐派建議人手一本 <3
....................................................................................
 
我努力對自己說︰忘掉！忘掉！把這些都忘掉！
偏偏，她就像傳說中的粉紅色大象，當我越想說不要想時，就越是去想。
 
鄙視我的眼神。
拿著兩個書包跑來找我的溫柔。


左右開弓的巴掌。
我送她生日禮物時的淚水。
舉起魔法棒的笑容。
馬路邊紅著眼的凝望。
鬼屋裡帶哭腔的尖叫。
寒風中貼在臉頰上的溫熱。
在攀攀架上，堅定的眼神︰
「你要做我男朋友。」
 
.


 
我從床上驚醒，滿身都是冷汗。
不能再睡了，這個夢，怎樣都不可以再做下去。
於是，我乾脆打開燈，隨手拿本書讀起來。
 
好不容易捱到天亮，我甚至等不及阿堅起床，8點就打電話吵醒他。
沒睡醒的聲音抗拒︰
「我尋晚送完阿Bi返屋企3點先瞓啊……」
「Sor sor，但我有樣嘢一定要問你！問唔到其他人架！」
「唉，你講啦……」
 
「你搵返華小姐當時打畀你個電話未？」
「我、未……未呀……畀啲時間我啊……我瞓醒再去搵下……」
「唔使啦。阿Mi……阿Mi佢搵咗畀我，就喺嗰個公文袋入面。」
 


阿堅的聲音一下子清醒過來︰
「吓？點解佢會有嘅？」
「佢以前話過入校務處偷都偷畀我……希望佢唔係偷啦。」
「……咁樣……」他欲言又止。
 
「想講咩呀？」
「你諗住點？」
「試都考完咯，咪睇下成績點再調下排位囉。」
「……你都知我唔係講呢樣。」
 
我沉默半晌，忍不住嘆氣︰
「我……我都唔知，畀啲時間我再諗下啦。」
「你已經諗咗好耐啦。我唔係幫邊個啊，但如果華同學真係唔返嚟，咁……」
「你拍拖還拍拖，唔使對住我都淨係幫阿Bi做傳聲筒嘅。」
 


「唔好誤會，阿Bi冇叫我講咩啊。佢只係話，如果我哋四個一齊出去玩嘅話會好開心咁咋。」
阿堅這麼一說，我腦中不知為何很自然浮現風光明媚的夏日，兩對男女去海邊玩水、郊遊野餐、行山燒烤等一系列畫面。
想像中，大家有說有笑，簡直就像電視劇BBQ結局那樣融洽。
 
.
 
這些幻想太可怕，我連忙甩甩頭︰
「唔會發生嘅事諗嚟都無謂啦……」
「OKOK，唔講啦。一陣又約咗阿Bi，我再瞓下先。」
「阿堅，等陣。」
 
在阿堅想收線的時候，我心中突然湧起一陣衝動︰
「你……你最近有冇見到阿Mi？」
「嗯，阿Bi話唔想成日丟低佢，每個月有一兩次約埋佢一齊去玩咁囉。」
「……其實，你真係唔尷尬咩？同時對住佢兩個……」


 
「吓？哦，你講嗰樣……好耐好耐之前有少少嘅，但而家我只當Michelle係阿Bi好姐妹，係咁多。」
「真係？點做到呀？」
「我都唔知應該點解釋你聽……總之，同阿Bi拍拖越耐，我越覺得之前嗰啲……之前嘅諗法，其實好多都只係自己嘅幻想咁。而阿Bi先係實在，所以……」
 
「得得得，唔使發表愛的宣言啦。」
「又係你自己問先嘅。」
「咁……佢最近點？」
「邊個佢啊？」
 
「……阿Mi。」
「都係咁啦。好忙架人哋，除咗補習又搵咗份咖啡店嘅兼職做，仲好似有幾個男仔追緊佢。你唔係以為佢會為你要生要死啊？」
 
居然被阿堅嘲笑了。
從他的語氣裡，我感覺他似乎成熟了。


也是，他跟Abby在一起的時間，早已遠遠拋棄我兩次戀愛史加起來。
說不定，我真的應該叫他一句前輩吧。
 
「唔……不如咁，你幫我問下阿Bi，可唔可以約佢出嚟？我……我想同佢講句sorry。」
「我又唔明，點解你唔自己約呢？」
 
我臉上一熱︰
「咁、咁我約佢私下見面，好似……費事有咩誤會啦，多啲人在場好啲嘅。」
「好啊，咁我同阿Bi講下。」
 
.
 
阿堅答應幫忙，我感覺鬆了一口氣。
我錯怪了Michelle，我亂罵過她，這些我都會好好道歉。
然後，就沒有然後了。
我跟她的事在阿堅他們的見證下到此為止，如此便好。
 
處理完Michelle的事之後，我洗了個臉讓自己清醒，然後把華小姐中一時的學生資料平鋪在書桌上，再緊張地拿來家用電話，小心把房門上鎖。
練習開場白練了十分鐘之後，我才下定決心，按照表格上的號碼撥號。
每按一個鍵，心臟都彷彿多跳了兩下。
 
我當然知道這些都是她中一時填寫的紀錄，已經是六年前的事。
加上她家已經搬了，這個住宅電話號碼可能一併改了也說不定。
儘管如此，我還是不想放過任何可能性。
那怕那可能性只有0.00000001%！
 
輸入好8位數字後，我嚥了嚥口水，邊祈禱邊把電話移近耳邊，心臟隨電話響聲起伏不停。
「嘟嚕——嘟嚕嚕嚕——咔」
「喂？」
電話很快就被接聽，對面傳來一把中年女人聲。
 
我倒吸一口氣︰
「呃……我……唔該我、我想問華、華華小姐……呃……華子昕小姐，喺唔喺度？」
「哦，你邊位搵佢？」
「呃、我、我係佢同學……」
 
「同學？」
對方的聲音添上疑惑，我想起華小姐的學校根本沒男生，連忙補救︰
「我係佢補習……呃、唔係，我係……係會考嗰時同佢一齊溫書嘅……同學……」
 
「哦……同學，華子昕去咗美國讀書好耐啦喎。佢冇同你講？」
「呃，我知……但係……呃……聽講佢之前返咗嚟……所以……想睇下佢而家會唔會、咁啱……而家喺度……」
「哦，佢聖誕節係返過嚟，但過完聖誕就返咗去啦喎。」
 
「呃、咁、咁佢有冇話……話幾時再返嚟？」
「冇啊。你有急事搵佢？」
「又唔係，只係……好耐冇見，想聯絡返佢……所以……」
「哦，你寄電郵畀佢啊，佢冇畀電郵你咩？」
 
「呃……不如……唔知可唔可以，再畀一次佢電郵我呢……或者佢嘅長途電話都得架！」
她的聲音警戒起來︰
「我要問下華子昕先喎，你叫咩名？」
 
我重覆說了三次姓名和電話，對方只是說︰
「好好，咁如果佢話可以嘅我再打畀你。」
之後就掛了線。
 
我把電話放低，感覺就像跑完十公里那麼疲倦。
接電話的人應該是華小姐的媽媽吧？
唉，聽她的語氣，好像把我當成電話騙案了呢。
她真的會跟華小姐說我找她嗎？
 
.
 
我幻想著當華小姐打電話回家，知道我甚至打電話到她家去了，會是怎樣的反應？
會因為我的努力，而給我一點點回應嗎？
 
想著想著，電話突然響了起來。
我整個人從椅子上跳起，沒看來電就搶著接聽︰
「早晨！我係阿翔！」
「哇你做乜事？見咗工等電話通知？」
 
原來只是阿堅，我連反白眼︰
「乜係你……點呀？」
「我同咗阿Bi講啦，佢話叫你星期六一齊去佢屋企玩喎。仲有，記得帶泳褲。」
「吓？去到咁遠？你哋冇啲正常少少嘅節目？」
「呢一層……佢話，如果你唔滿意，就自己約阿Mi啦～咁喎。」
 
「得得得，唔使扮聲！」
「咁你嚟唔嚟？」
 
我想像了一下，雖然泳褲也很可疑，但跟Michelle單獨見面這件事，顯然比去Abby家還要可怕。
我只能嘆一口氣︰
「我嚟囉……喂，如果呢，到時阿Bi罰我跪玻璃或者跳大象舞……你會幫我架？」
「首先阿Bi冇興趣睇你跳大象舞。其他嗰啲……最多我盡人事，幫你搵塊細啲嘅玻璃勒。」

.
by又曦
like Page追看最新章節︰http://bit.ly/2jHymHF