✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #02

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////





 


我連忙找侍應要來一杯紅酒，深深吸一口氣跑過去，恃熟賣熟地搭著新郎肩膀︰

「祝酒點可以少咗我呢個伴郎呀！……華、華小姐，好耐、冇見……」

唉，明明才幾個音節，說出來時卻還是口吃啊。
華小姐似乎因喝酒而紅著臉，微微低頭︰


「……嗯……好耐冇見……」

那神態，令我只想把她一擁入懷。我深深吸一口氣穩住心神︰

「哈、哈哈……你、你瘦咗又靚咗喎！真係女大十八變……呀，當然你細個都好可愛啦，不過嗰時肥啲又傻下傻下咁，而家去過外國係唔同啲……哈哈哈……哈……」

真糟糕，我究竟在說什麼？

她輕輕掩嘴︰


「……咁，你都冇乜變啊……」

阿堅看不下去了，連忙助攻︰

「喂，阿翔，頭先你去咗邊啊？我同子昕講緊，而家你都讀緊物理學博士，你哋實大把嘢傾啊。」

說著還用手肘撞我兩下。

「呀，係、係……係喎！華小姐而家係咪讀緊MIT？你揀咗基礎理論定係研究嗰邊？」

她輕輕搖頭，表情複雜︰

「我邊有咁勁？我做 research assistant咋，老闆研究咩咪咩囉……」

糟糕，我是不是又說錯話？


「呃……咁……幫、幫老闆都好呀，最緊要跟著一個好老細啫，哈哈……唔……呃……係呢，咁、咁你呢幾年一直都喺美國？你之後會唔會返嚟……」

我才說到一半，她避開我的目光拿出iphone5望了一眼，然後匆匆把細軟塞進手袋裡︰

「sorry啊，我要走先啦……阿堅，恭喜你新婚，祝你同太太白頭到老。」

「好，多謝你賞面嚟我婚禮。」阿堅

「咦？咁快走……」我。

她臉上泛起陌生的微笑︰

「下次再傾啦，拜拜。」


「呃、下次即係幾……時……」我。

她彷彿沒聽見，披上白色大衣加速離去。

我呆看那熟悉又陌生的背影，一時不懂反應。

「……點解……我、我明明冇耐之前先收到佢封密碼信同我講me2架……唔通個me2係話我性騷擾佢？」

「講咩啊你？」阿堅。

「你唔知咩？網上metoo運動反性騷擾呀嘛……」

「仲講？追啦！」

阿堅狠狠推了我一把，我才拔足跑了起來。


.

為什麼？為什麼？為什麼為什麼……

因為我七年前辜負了她的心意嗎？過去七年，當我不斷寄email給她卻從來沒有回信，我也曾經覺得她不打算原諒我。

但是就在兩星期前，我收到一封由美國MIT寄來的密碼信。華小姐署了七年前的網名asd34567，用摩氏密碼跟我說︰

「Password cracked. Me2.」

Me2啊！無論怎麼想，這都是回應我的表白吧？
當時興奮到差點爆炸，還想馬上辦個簽證去美國找她，只因幫阿堅辦婚禮才拖到現在。

前後不過兩星期啊……就算女生善變，這也變太快了吧？


我腦子亂成一團，追著她的背影一直跑到酒店外。

室外不知幾時下了一場雨，墨青色的石板路上反映著黃藍間雜的酒店燈光。她身穿白色大衣的倒影，正踏著水窪走向馬路邊。

「華小姐！」

我追到她的身邊，她卻沒有放慢腳步。

「喂，我、不如我送你返屋企呀？」

「唔使客氣啦……」

我心急起來，伸手拉住她的手臂︰

「等陣啊，我、咁多年嚟，我真係有好多嘢想同你講，所以……」

她縮起手拉緊大衣的衣襟，臉上笑容有點尷尬︰

「或者下次先啦，今日有人等緊我……」

「但、但係，我真係好怕唔知幾時先可以再見到你……我、我今日唔講，唔知又要等幾多年……」

我擋住她的去路，在倒映著藍光的水窪旁扶著她的肩膀︰

「我……我只係想同你講，好對唔住……我、係我細個唔生性，做錯咗好多嘢，錯過咗你……我……我唔係唔知你對我好……只係，你send嚟嘅SMS，我去到八月底先睇到，所以、所以我真係唔知原來你要去留學……我……如果我早啲知道嘅話，我起碼會早啲同你講，嗰陣我……其實我……我當時……我真係……我……」

空氣又濕又冷，我卻全身發燙︰

「我嗰時、真係中……真、真係好中意你！」

她臉上的迷茫瞬間變成訝異，合不攏嘴地呆望著我。

「所、所以……呃……今次見返你真係……真係好開心……我……呃……所以……你……唔，我哋而家咁難得先至……呃，我好想……如果可以嘅話，唔知有冇機會同你……」

我正想挽起她雙手，卻突然有一個奇怪的男人從馬路那邊跑過來，把她從我身邊拉開半米︰

「子奀，無事嘛？」

那男人一口廣東話發音古怪，而且那頭鬈髮在髮尾胡亂紮起的造型也相當奇特。

看見他，華小姐卻換上一臉安心的表情，甜笑著搖頭︰

「嗯，我冇事。」

我瞬間石化。這算什麼？這男人是誰？哪裡死出來的？

我瞪著那男人，華小姐卻走到我們中間，表情夾雜著苦笑和無奈︰

「……嗯，阿翔……你……好多謝你同我講返……當年嘅事。呵呵，我，我好開心你仲……仲記得，咁耐之前嘅事。你唔講我都唔記得啦，原來我唔敢同你講要去留學，搞到要send SMS，呵，我嗰時真係傻……嗯……諗諗下，都成十年前啦……」

「冇、冇呀！七年咋！」

「嗯……七年，七年……」

她低著頭，輕輕把頭髮繞到耳後。我的心跳急速起來，只聽她說︰

「我……見返你好開心，諗返細個一齊溫書好開心……講返起嗰時嘅事，都覺得，細個嗰陣識到你哋真係好，有呢一段回憶真係好，一齊讀書、一齊考會考，好青春……只係，嗯，始終都係七年前嘅事啦……」

「……呃，你、你嘅意思係……」

她側側頭，甜美的笑容明顯拒人於千里之外︰

「好多謝你仲記住當年嘅事，好多謝你同我呢一番說話。好開心，我真係好開心。」

「呃……」

腦內有千言萬語，但看著她見外的笑容，我卻半個字都說不出口。

再訴說自己這幾年來怎樣找她、有多喜歡她……還有意義嗎？

「咁……我走先啦，下次見。」

她帶點尷尬地點點頭，輕輕揮手說再見，然後跟那鬈髮男子並肩走向馬路。

我石化良久，眼睜睜看著他們走到一輛白色Tesla旁邊，男子為她拉開副手席的車門時，我才終於能發出聲音︰

「……等、等陣先，華子昕！我……你……你最少畀而家嘅電話號碼我呀？」

她在副手席上回頭，似是為難地笑笑︰

「真係好開心今晚見返你……拜拜。」

Tesla安靜地啟動，我眼睜睜地看著她的身影又一次從我眼前消失。

時間再次流動起來，而最後停留在我視網膜上的，是她跟那鬈髮男子說話時的笑容。


.

***補習社篇出書版與網上版是完全兩個故事
 

全系列現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]