✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #14

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////




#14



「你陪我食飯，我執到啦，等下有咩所謂。」

她笑得開懷。

每次看到Michelle的笑臉，我都覺得很減壓。我想，這一定是因為熟悉感吧。



無論考A-level、Mphil還是PhD時，每次讀到瀕臨崩潰，都是Michelle溫柔地拉我一把，讓我能支持下去。

所以總有一種情感上的錯覺，只要有Michelle在，再艱難的時刻都能安然過關。

跟她邊吃邊聊，有一刻我曾有衝動告訴她，原來當年華小姐的電郵地址我們抄錯了。

不過，她知道的話會不開心吧？




Michelle察覺到我的視線，好奇地望著我︰

「嗯？做咩事？」

「冇嘢呀！見你今日啲頭髮整得好靚，望多兩眼啫。」

她笑著白了我一眼︰

「係呢，其實阿Bi佢哋後日就返嚟啦，點解你搵得阿堅咁急嘅？」

「呃……我、我掛住佢之嘛，哈哈哈哈哈！」


她托著臉凝望我︰



「唔……係咪因為Yan Wah？」

果然，又被她看穿了。

「呃……」

「啊，sorry，我太多事……你可以唔使講架。」

「冇所謂喎，我唔介意同你講。佢……點講呢？佢唔係好睬我。」

「即係，喺嗰次宿舍門口撞到之後，你仲有見過佢？」

「有……有啊……始終住得咁近，哈哈哈……」

說不清為什麼，我下意識地隱瞞了我們正在同一個研究室的事，當然更不會提起在教職員宿舍裡的事故。



Michelle點點頭︰

「咁你有冇再問佢封信嘅事？」

Michelle竟主動提起那封信，不禁令我懷疑，難道她也跟事件有關？

不，還是先跟阿堅談談比較穩妥。

「有問呀，但都係咁啦……佢話唔關佢事咁囉……」

「我覺得唔使咁失望住，或者熟絡返佢會肯講多啲呢？」

她笑得落落大方。





「都唔知點先可以熟絡返……其實佢個樣冇乜變，但係唔知點解，我有時覺得佢好似係另一個人咁，好陌生。明明係佢，又好似唔係佢，嗰種感覺好認知失調。」

「嗯……既然大家都大過咗，有改變都好正常啊？」

「都係嘅……不過，我又見到佢仲用緊好多年前嘅嘢喎。咁究竟佢係變咗定係冇變呢？」

「用緊好多年前嘅嘢？」

Michelle總是很快就能抓住重點。

我望了望她披在肩上的灰色頸巾，硬生生把話吞回去︰

「哦，即係文具嗰啲呢！你覺得，咁多年都仲用緊舊嘢嘅人，係咪都應該會好念舊？」



她伸手拍拍我的頭頂︰

「我覺得，如果咁樣諗能夠令你比較安落嘅話，咁樣諗都冇壞啊。」

Michelle沒有追問，我悄悄鬆了一口氣。

餘下的時間我們沒再提起華小姐，只輕輕鬆鬆地吃飯聊天。

最近總想著歐陽和華小姐的事，無時無刻都精神崩解。跟Michelle吃飯時卻像忘卻那一切，只單純地享受著簡單的快樂。

這樣對比之下更覺得，跟Michelle相處真的自在多了。


.


Michelle使命必達，當天晚上，阿堅就回電話問我有什麼急事。

當我覆述華小姐說me2信的事要問阿堅時，他重重歎一口氣︰

「唉，估唔到件事會搞到咁複雜……係呀，封信係我寄嘅。」

「吓、咩、點解……我＄％＃呀！搞咩呀你？玩％我咩！」

我簡直覺得煙花在頭骨裡連環爆開。

「你聽我講先，咁係因為……咦喂，我老婆嚟緊！我返嚟再同你講！」

「喂？喂喂？喂喂喂？我＄！」

那老婆奴又一次掛斷，氣得我只能把自己的電話摔在床上。

 .

又再等了兩天，我才終於等到阿堅回來。

這兩天裡我在研究室找過華小姐幾次，她雖感謝我上次送她回家，卻婉言拒絕我提出的邀約。

就這麼害怕跟我單獨見面嗎……？

無奈之下，我唯有在茶水間往研究室的走廊跟她說︰

「摩氏密碼封信件事呢，阿堅認咗。但我唔明……明明個封面啲字……」


她只是笑笑︰

「我都只係估估下，詳情我諗你都係問返阿堅好啲。」

「呃……即係，你完全唔知佢會扮係你寄信俾我？」

「如果我知，我就會寫埋背面個寄件地址啦。」

她笑得那麼甜，彷彿我是個弱智。

她說的有道理。既然信封面已經暴露了字跡，信封底的寄件人地址的確沒必要用摩氏密碼啊。

當時，我還以為這是她刻意考驗我的遊戲……原來，她才沒空理我，只是我想太多了嗎？


.


阿堅蜜月旅行回來的第二晚，我懷著複雜的心情，去到阿堅跟Abby的新居。新婚夫婦心情大好，熱情招待我，帶我去天台BBQ。

從出生起就住在深山豪宅的Abby說，出入都要駕車太麻煩了，所以結婚時她父母送了在新界某地鐵站上蓋的頂層複式單位給她做嫁妝。

「雖然地方窄咗，但係買嘢方便啲嘛～」Abby笑嘻嘻地說。

反正自從認識了Abby，我才徹底明白香港堅尼系數全球最高到底是什麼意思。

阿堅一邊拿著扇幫木炭起火，一邊笑說︰

「呢度始終都係岳父岳母嘅，遲啲等生意上軌道，我會買返間我哋自己嘅屋。」

在旁邊的戶外桌上擺放餐具的Michelle用力點頭︰

「冇錯，做人始終都係靠自己最好。」

我不禁望向在陽光海灘玩了那麼久皮膚還是白淨透亮的Abby，心想，我這個契妹人生裡有哪個階段靠過自己嗎？

「哈哈哈……我落去洗菜先！阿Mi，你陪我呀～」可能我的眼神太露骨，Abby拉住Michelle從樓梯下樓了。

我見機不可失，馬上箍住阿堅走到天台的玻璃圍欄邊︰

「坦白從寬！究竟發生咩事？你搵返華小姐做咩唔同我講？又點解要扮佢嚟寄信俾我？」 
.
by又曦

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]