✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #15
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
．作者FB︰http://bit.ly/2jHymHF
．作者IG︰http://bit.ly/2rxGoFA
///////////
#15
阿堅扭著頭盯住天台的出入口，壓低聲音解釋︰
去年阿堅去美國跟Abby家親戚交待婚訊，隨便簽約自動點餐系統。去到MIT，跟他簽約的人正是歐陽慕明。而華小姐則一副賢內助的模樣在他旁邊幫忙，歐陽介紹她是助手。
因為Abby知道阿堅、華小姐和我三人會考時的往事，為怕Abby呷醋誤會阿堅另有所圖，阿堅便裝作初次見面，華小姐也醒目配合。
我忍不住截斷他︰
「喂，你講唔通喎！就算你唔俾得阿Bi知，你返咗嚟咁多個月，都可以同我講嘅啫？」
他靜靜地望了我一眼︰
「乜你覺得，你講大話可以呃到我老婆同Michelle？」
「……我、我都唔係咁差啫吓嘛？」
「總之，有多過一個人知嘅就唔係秘密啦。」
說到這裡，Michelle端了一盤菜上天台，阿堅連忙住嘴。Michelle看我們這麼閒，又喊我下去幫手拿東西。
我跑了兩個來回，忍不住抱怨為什麼要BBQ呢？
阿堅一臉已婚男人的唏噓︰
「如果我話我約咗你兩個男人食飯，又唔俾佢跟埋嚟，你估佢會以為我約咗邊個？」
我同情地拍拍阿堅的背︰
「……辛苦啦，人夫。」
確定天台範圍安全後，阿堅繼續交待美國的事︰
當天在MIT阿堅乘著Abby去洗手間時，藉口要影印然後跟華小姐離開會議室，把請帖交給她。
「其實我都唔肯定佢會唔會嚟架，始終山長水遠。只係搏一搏，萬一佢咁啱放假返香港，咁可能有機會過嚟望下……估唔到，佢真係咁有心嚟飲。佢真係好好。」
我有點驚訝︰
「你唔驚阿Bi認出佢就係當日個助手？」
「我後嚟諗返先識得驚啊！好在，結婚嗰日阿Bi忙到咩咁，佢只顧住自己個妝同頭髮靚唔靚，根本唔得閒理啲賓客。件事都過咗幾個月，子昕打扮又唔同晒，所以阿Bi完全唔認得。」
說到這裡，阿堅嘆一口氣︰
「不過，子昕出現之後阿Bi都有追問我，究竟點解子昕會嚟飲？我點解會請佢架？我幾時見過佢嚟？點解唔同老婆申報？我唯有話自己多手寄過請帖去佢舊屋地址囉，唔係可以點……」
「……阿Bi收貨？」
「應該……OK……卦……」
他搭著我的肩︰
「唉，總之我為咗幫你製造機會，真係幫到盡架啦。」
我看著他悲壯的表情，不禁想起傳說中的九叔︰
「我信你！……咁但係，嗰封摩氏密碼信又邊度嚟？」
阿堅清清喉嚨，繼續回憶︰
當時在MIT的會議室，阿堅並不確定華小姐會回香港。他想通知我華小姐就在這裡，但又不能被Abby發現，於是他便提出想把合約寄回香港，讓華小姐幫忙準備信封，並且把我學系的地址交給她抄寫。
「之後嘅事就簡單啦！趁Abby shopping嘅時候寫完封信，俾酒店front desk幫手寄，咁你收到封信自己嚟美國搵佢，件事就同我完全無關啦！」
也就是說，用摩氏密碼不是為了讓我解謎，而是不想留下任何證據讓Abby發現……
我忍不住翻白眼︰
「你會唔會諗得太理想？同埋你又知我收到封信一定會過去？」
「哈，我好有信心你一定會行動喎！細個玩青澀寶貝，你由北海道追到鹿兒島都唔會放過架啦。隻Game都係由一封信開始咋嘛。」
「即係話，成件事其實係模仿galgame……」
「講真咁短時間俾我諗到咁多嘢仲要實行埋，已經好勁啦……呀，不過我諗起有樣嘢好奇怪。」
「咩呢？」
「當時我同歐陽慕明其實幾好傾，但佢一句都冇提過自己會嚟香港教書。」
「同你好熟咩，咩都要同你講？」
阿堅皺皺眉︰
「但佢問咗好多香港嘅嘢喎，傾咗成個鐘，正常嚟講都會提一提呀？」
「唔……我記得啦，好似話係本身要嚟訪問個教授病咗，所以佢先頂上。」
「真係？有冇咁啱呀？」
正想再追問阿堅跟華小姐見面的細節，天台入口傳來Abby的聲音︰
「你兩個傾咩咁好傾呀？快啲嚟幫手啦～」
阿堅9秒9跑過去幫忙，對話就此中斷。
.
燒烤大會開始，我看著木炭的火光，不斷在心中重組案情。
如果始作俑者是阿堅，他當年確實常常跟我們一起聊MSN，能夠寫出我跟華小姐的MSN名並不奇怪。
但信裡還提到password cracked和me2啊！
「冇理由架……」
我對著火堆自言自語，卻引起Michelle的注意︰
「乜嘢冇理由？」
「呃、冇、冇理由……係囉！冇理由燒烤冇冰凍啤酒架嘛！」
我乘勢站起來盯著阿堅︰
「阿堅！我哋落7仔買啦！」
「咦？但係我喺馬爾代夫買咗啲酒返嚟想同你哋一齊試……」Abby嘗試阻止。
「唔得唔得！唔係飲開嗰隻啤酒我會冇胃口架！阿Bi唔好意思，借你老公一陣！」
我二話不說就拖著阿堅下樓。進入電梯之後，阿堅忍不住埋怨︰
「喂，你咁樣真係好可疑……」
「由得佢當我哋基啦，我真係諗唔通呀。你話封摩氏密碼信係你寫，咁你點知道password嘅事？」
「哦！呢樣……因為歐陽先生同我傾咗好耐，阿Bi頂唔順走咗去shopping，所以佢哋送我出門口時，我又搵到個機會同子昕單獨傾多幾句。」
「佢就同你講，我寄咗加密信俾佢？」
「係我問佢記唔記得阿翔先嘅，佢就反問︰『flying far？佢而家點？我有睇到佢篇論文啊。未畢業就可以發表，幾犀利啊。』」
「喂……你，佢……你係咪氹我架？佢讚我？佢居然讚我？」
他完全無視我的反應︰
「跟住我好落力sell你，話你一直搵緊佢啦，又話你寄咗好多email俾佢。佢個樣唔係幾信，又有少少唔好意思咁講，佢喺MSN
space停用嗰年為咗backup先開返個mailbox，有見到你2007年寄去嘅信，但係你加咗密碼，佢冇解開到。」
.
by又曦
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]