外星人騙局: 第六章：一飛沖天去

莫探員：「電腦前嘅網友大家好！我係你哋嘅節目主持莫探員。我左手邊係大家熟識嘅 Andrew Chan，右手邊係今集特別嘉賓靚女Miko。同大家打個招呼。」
兩人齊聲應道：「大家好！」
莫探員：「今集第一節講嘅內容同政治無關 。」
Andrew Chan：「都唔可以話同政治無關。」
Miko：「邪教害人，禍害世界。」
「唉…唉！」莫探員望向Andrew Chan道：「都唔知由邊到講起。」
Andrew Chan面有難色：「有個網上節目叫真實知識頻道，主持人劉漢傳聲稱見過外星人，知到會世界未日，又自稱救世者能帶領信徒離開地球。幾個月前被傳媒炒熱嗰單UFO事件，肯定係佢哋自編自導嘅把戲，妖言惑眾簡直係香港飛碟教。」
莫探員冷笑道：「你有份搞起嗰邊個台，佢哋真係無你無今日。」
「哈！哈！」Andrew Chan假笑兩聲道：「個台我無份㗎！佢哋當初成立有好多嘢唔識， 大家都係辦網台，基於為新媒體運動出一分力。」
Miko怒道：「如果無我幫佢做節目，有鬼人聽佢個節目！」




莫探員沒有理會Miko，問Andrew Chan：「Andrew，你係咪要講佢哋嘅財政？」
Andrew Chan：「佢哋開台資金來歷不明，其中一個話事人白文信都係來歷不明。係咪共產黨我唔敢講！我曾經為佢哋個台籌款，籌到錢劉漢傳把口就話唔收捐款，見到錢兩眼發光㗎！最後又收。之後突然停我節目，藉口話政治評論唔係個台發展方向。咁之前又叫我嚟做政論節目？一定係收咗共產黨錢！我同白文信講捐錢嘅人好多都係想繼續有政論節目，佢退返啲捐款，但係數目差好遠囉！我就將退返嚟嘅錢，捐俾相同路線嘅政治組織。我份人不求名，又不求利，一心為大眾！唔鍾意講人是非，但見到呢啲咁嘅人真係唔出聲唔得。」
莫探員：「我睇過劉漢傳做嘅節目，聽佢講嘢都似係個有學識嘅人，估唔到份人係咁樣。」
Miko高聲道：「有學識？佢乜都唔識！」
莫探員笑道：「佢係你前度男友，你對佢應該好清楚。」
「唉！」Miko嘴角一戚：「呢啲黑歷史唔好講啦！」
莫探員微微低頭扮作思考，然後抬頭道：「佢係一個唔識嘢嘅人，咁佢講嘅嘢係有人教佢講，咁即係背後有人操控。我從來未見過嗰個白文信，亦從來未見過佢出鏡，呢個人相當有可疑喎！」
Miko：「我帶過佢兩個上嚟睇你做節目㗎！」
莫探員故作驚奇：「我無乜印像。」
Miko：「佢兩個參加過支持政府嘅集會。」




「唔！」Andrew Chan連連點頭：「係！無錯。」
莫探員：「我聽講佢哋收錢開咗一個叫做『外星感召班』一班人聚埋一齊打坐冥想，聲稱可以同外星人溝通。」
Andren Chan：「合埋眼就能夠同外星人溝通，異端邪說！掠水就真！」
Miko：「我聽講佢哋有個秘密組織，喺屯門菠蘿山……」
莫探員慌忙打斷她的說話：「總之呢個係邪教組織…邪教害人，休息一陣下一節講返香港政治。」
白文信與我看完視像後，對望了一眼沒說話。
白文信悠然道：「好一個復仇者聯盟。」
我問：「你認為用乜嘢方法應付？」
「無須理會！網上日日都有一大班人咆哮反基督，教會有冇回應？要信嘅人點都會信。」
「最麻煩係錢銀問題。嗰陣時我哋手緊無俾返所有錢條友，依家俾埋啲尾數，佢就無嘢講。」




白文信問：「根本就唔係為咗啲錢嘈，藉口找麻煩。你接收啲錢有無第三者在場？有無當面點清數目？」
我想了一會：「無！當日佢好似有心裝我，無論俾返幾多都會話唔啱數。」
「最大嘅問題唔係呢樣…係，無嘢！」
我看白文信似欲言又止，突然想到Miko最後那句，問白文信：「Miko話咩嘢秘密組織又提到屯門菠蘿山，夠竟係乜嘢事？」
白文信神色有異：「條女無腦唔好理佢講乜。我有啲事做要走先。」
看着他急急忙忙離開辦工室，表現不像以往遇上什麼難題總是胸有成竹，不驚不慌。
再深思Miko那句話；聽講…秘密組織…屯門菠蘿山。
秘密組織是否白文信親白揀選稱為門徒的忠實信眾？現在增至十二人。屯門菠蘿山是否良田坳小屋？這地方白文信與我從不提及，她怎會知？她說『聽講！』一定有內鬼。
抬頭望，透過玻璃窗掃視辦公室外的人，辟邪、梅林及一些其他節目主持，那個是內鬼？
十二門徒很尊敬我， 但實制受白文信指揮，近期他們與白文信很少在網台出現，似有事隱瞞。也許與小屋有關。
出辦公室吩咐辟邪取消晚上的外星感召班。
原本打算去小屋看看白文信是否在，直接問他究竟有什麼事情隱瞞。
上山經過路旁避雨的竹棚，天色驟變還未入夜已灰沉沉，天際電光閃爍掉下一點雨水，似有大雷雨將至，避入竹棚。
這竹棚是第一次見到白文信的地方，景物依舊而人與事變化相當大。
坐下來，看見人們相繼下山，因為行雷閃電留在山上是相當危險。




一輪密集的雨水過後天色仍是灰暗，隨後細雨霏霏，不時出現一閃的電光，但沒有雷聲相信雷暴不是太近。
突然三人穿着同一款雨衣的人從山下走上來，一人從山上走下來。四人停在廟旁的路上傾談，從山上走下來的人是白文信。
避雨竹棚與路面相隔了一片小坪地，他們交頭接耳說話，因此聽不到說些什麼。我慢慢退入竹棚背後，靜靜觀察他們想做何事。
穿着雨衣其中一人指向青山方向，其餘三人同時望向青山頂。
白文信取出對講機：「青山一隊情況如何？」
對講機回覆：「青山一隊已經控制發射站。」
白文信：「接通線路之後，帶站裡面條友去發射站下面個涼停，沿山脊檢查線路與青山二隊會合。」
白文信結束通話後吩咐穿雨衣三人：「你哋落山到電塔會合菠蘿山第一隊協助佢哋，同時沿途檢查電纜。」
三人聽完吩付沿路下山，白文信向山上走。
我心中驚呆了一會，佔領訊號發射站！反政府恐怖活動？他一向只為錢，目的何在？
他們走遠後繼續向小屋進發，想起他所說的電纜，察看路旁泥土發現一條手腕粗的電纜半埋在泥土中，部份掩在泥土裡一些露出地面似有意遮掩，但電纜隨山路伸延要完全遮掩，須要不少人手及時間。
天色更陰沉，隱若聽到雷聲從遠方傳來似雷暴將至，要加快步伐離開山脊上的路面到達位於出坳的小屋。
當到達落山坳的路段，俯視斜坡下被樹蔭遮掩的小屋，情況與以往大不相同，出奇地燈火通明，屋內的白色光線從門縫、窗邊及瓦片空隙中透射出來。
電纜伸延至小屋，應該不會為了居室明亮花這樣大工程從電塔偷電。
走下斜坡，靜悄悄靠近在門縫窺看內裡情況。




屋內光源來自地面，屋內的陶製地板全翻起堆疊在牆邊，整個地面是一個圓形大坑，坑中發出的白光照耀整個室內。
這個大坑何時挖掘？再細心窺視，另一邊牆有一道用木條及木板制成物，相信這是圓抗的蓋。即是這個圓坑不是臨時掘出來，平時在蓋上鋪上陶製地板作掩飾。
光源被一遮一擋，屋內光影游動。
白文信應該在坑內，他到底想怎樣？他從坑裡爬出來，不是他！
怎可能！爬出來是一條蜥蜴，有點不正確應是蜥蜴人！意想不到的突變嚇得倒退數步，不知是否雙腳發軟還是不留神絆倒。這向後一跌驚動了屋內的蜥蜴人， 衝來打開門。面對面的情況比剛才隔着一度門更驚嚇，連爬帶跑向斜跛往上逃。
蜥蜴人從後追趕，上了斜坡兩者在濕滑的山路追逐。
背後傳來一把熟識的聲音：「唔好驚，我係白文信！扮㗎！假扮㗎！停一停。」
這把熟識的聲音是白文信，緩下腳步至停下轉身，對白文信從頭到腳打亮一翻。 一個蜥蜴人穿上人的衣服像卡通片人物，看來有點滑稽。
白文信：「唔好企喺到，返去入屋先講。」
跟隨他返回小屋，一進小屋被圓坑內的結構吸引。圓坑的牆壁是鐵板焊接而成若有一英尺厚，這些鐵各式各樣也有， 似是拾回來。
我指着坑中的大圓球問：「呢個乜嘢嚟？」
「太空船。」
我表情有點失望：「嘩！做假都俾啲誠意認真少少，紙扎咁流。」
「乜嘢用紙扎呀！係用紙皮鋪。艘太空船係真，我亦都係真正外星人。」
「哈！哈！啲紙皮就係上次同你推上山嗰堆紙皮：「我未見過有穿着人類衣服嘅外星人。」




「乜你見過真正嘅外星人咩？」
「咁…電影裡面唔係咁。」
「睇少啲爛戲啦！你真係唔信我係外星人？」
我笑着搖頭，而他開口吐出有一英尺長。
我笑問：「點解條蜥蜴脷，舌頭無分叉？」
白文信收回脷道：「唔係所有蜥蜴脷都係分叉，蛇就係！你哋啲人類，同你講真話又接受唔到，唔肯去信係鍾意聽假話。」
白文信突然捉緊竹手戈的手觸摸他的面，感覺不像塑膠，加上他的態度認真，我有點相信是真。甩開他的手靠牆邊走想離開小屋。
他攔着門口道：「時間無多，你冷靜啲聽我講。」
我因驚慌說話的聲音有點震：「你候先又話假…扮，依家又話真，你究竟邊句真？」
「我候先唔係咁講點制止你通山跑，跌你唔死走去驚動其他人阻礙我嘅計劃。」
我驚魂稍定：「我要諗清楚，你俾啲時間我接受。」
「唉…。」白文信嘆氣道：「咁你返屋企瞓覺，瞓醒就乜事都無。」
「哦！控制發射塔，你哋想入侵地球！」
「𨳒」白文信顯得不耐煩：「你咁似深圳河以北班友，有被害妄想症，美帝、小日本亡我之心不死，而你就外星人亡我之心不死。…發射塔！」
現在白文信擁有一張蜥蜴人的怪面，仍能夠看出他的愕然表情：「你仲知到啲乜嘢。」




「之前喺廟聽到你哋嘅對話。」
「咁我簡單解釋你知，我艘太空船出現故障撞咗落嚟呢道，依家艘船修理好我要離開。」
「你一開始就呃我。」
「邊有呃呀！你唔記得太空船維修基金？一開始就講到明啦！仲寫明喺個鐵皮箱到。」
「你都幾無賴。」
「喺地球學嘅！」
本來可以弄清整件事情，想不到起爭吵。兩人靜了下來沒說話過了一會，白文信先開口說話：「多謝你一直幫助，唔係都搵唔夠錢鋪電纜、造飛船發射器不過我哋呃返嚟嘅錢用晒，對唔住！」
「吓！」這個震驚的消息使我差點不能合上嘴：「咁過去一切都係白做，乜都無！乜都無！」
白文信安慰我：「又唔係乜都無，你有一班對你忠誠嘅信徒，你下半世都有人養。」
「你係咪來自天秤座開普勒行星？」
「當然係啦！」
「你以前講有關開普勒星嘅美好情況係咪真？咁你係咪會帶我離開地球？」
白文信一臉難色道：「開普勒星唔收地球難民。其實我係偷偷嚟地球，開普勒星有法令禁止卡普人與地球人接解，類似你哋嘅野生動物保護發。」
「 地球人係野生動物？」
「無錯，我哋係咁睇你哋。」
「我哋唔係住喺森林嘅動物，識得起高樓大廈，識得造飛機火箭。」
「我好清楚你哋嘅歷史追求文明，從森林走出嚟建立城市，但係你哋又將城市變成森林一樣。進步並唔係在於物質，係精神。」
「你哋預測中國大陸會禍滅世界？」
白文信點頭：「只係時間題。」
「白文信應該唔係你個名，咁你真名？」
他用一種像機械聲，說了一大堆聽不懂的說話。想起那把聲線是Miko 去警署報案時形容的電話裡的說話聲。
屋頂的瓦片傳來溚溚的密集雨聲，屋外正下着雨。
白文信變回平常聽慣的聲線：「時間無多，呢幾日土星與地球最接近，而且佔領發射站事情好快會被發現。我要靠發射站打開土星嘅星門，唔係就返唔到去天秤座。」
我問了一個蠢問題：「點解要咁複雜先返到去？」
「我隻太空船撞壞咗嗎！仲有個反引力系統都撞壞埋，要另外造發射器將太空船彈射出地球。」
白文信取出對講機：「菠蘿山第一隊、第二隊，接通電塔！」
不久圓坑的牆壁上的紅燈亮起。
我問：「十二門徒都知到你係外星人？」
白文信：「佢哋唔知到。我只係同佢哋講要製造同外星人溝通嘅裝置，從來都未俾佢哋喺過小屋。近小屋嘅線路我自已鋪，返去機會只得一次唔可以出意外，只能相信自己。」
「我都唔可以相信？」
白文信默然不答，轉身去開動一個閘制，拉動了數次。
他提起手中的對講機：「青山一隊、青山二隊，線路無發接通，發生乜嘢事？」
對講機回覆：「有幾個人係山脊上面破壞線路。我地依家趕上去。」
白文信透過對講機，指示菠蘿山一、二隊前去協助。他自己從靠牆的枱上拾起人皮手套及面具，不知他按動隱藏在手套及面具那裡的制，面具立即緊貼身體。
白文信：「我哋一齊出去睇下乜嘢事。」
兩人冒雨在山上行走。遠遠也能看見穿上黃色雨衣的門徒，向山上一個方向前進。
那四個破壞線路的人拔掉路上防水連接線盒，被門徒發覺。他們沿山脊向青山頂方向逃走，幾名門徒留下接回線路其餘往山上追。山路崎嶇，雨中行進更是險象環生。
雨又一次停下，雙方停下來對峙。因為對方其中一人高舉一塊尖石威脅要砸斷通訊電纜。那人竟然是梅林，躲在他身後探出頭來的人是Miko，其餘兩人分別是Andrew Chan及莫探員。
我朗聲問道：「梅林點解要串通外人出賣我哋？」
梅林高聲叫道：「我係為正義！你哋班人講異端邪說，仲喺道搞埋啲唔知乜嘢陰謀。」
想不到在這個年頭還講得出那樣老土的對白『我係為正義！』，異端邪說得過你聲稱自己是西洋魔法師，看情況他一定是搭上Miko所以出賣我們。
白文信伸出右手隔空打出一掌，梅林應掌飛墮落山坡，他身後的Miko被撞跌奮力爬起身沒有人上前扶起她，因為眾人被嚇呆了。
我轉身看着身旁的白文信不禁說出一聲：「原力！？」
白文信微微點頭：「你哋三個同我走，大家讓開路俾佢地走。」
我方人數比他們多加上剛才白文信露了一手『原力』，他們不敢莽動。
回到三岔口的坪地，白文信吩咐菠蘿山第一、二隊六人陪同Andrew Chan三人往良田邨的路下山，以免他們再次破壞。
我們向上走往下白泥方向的路返回小屋。
路上我問白文信：「點解放Andrew Chan佢哋走，唔驚佢哋報警？」
白文信：「呢道軍事區，差人要軍部派人帶領先置可以入嚟執法，搞得嚟我都離開咗地球。你同其他人都快啲走。」
我停下腳步回身望向跟隨者，問白文信：「我哋係咪要向佢哋講出真相？」
白文信想了一會，用對講機通知菠蘿山一、二隊上山會合。當門徒齊集，白文信做出了一個使所有門徒吃驚的事，一手撕破面皮露出真面目對所有門徒說：「我就是開普勒星派嚟嘅使者，係嚟揀選可以得到拯救及能幹辦事嘅地球人，協助我在地球完成任務。我要暫時返回開普勒星，回來地球之日就係得救之日。你哋要追隨劉漢傳，緊守五事：文明、禮貌、衛生、秩序、道德。唔好被深圳河以北班人涂毒。開普勒星嘅門戶廣大，繼續協助劉漢傳傳頌真理，使更多人得救。你哋留喺原地， 我有事與劉漢傳傾談。」
白文信拉我繼續前行，遠離眾人後步伐轉快。
我問：「叫你講真相，又繼續講大話。」
「一個垂死嘅人，同佢講真話？你死梗！死得好慘！應該安慰佢，講啲佢想聽嘅嘢，俾個希望佢。」
聽完白文信這句話，心中的血似凝結了，但雙腳還是不停走動。因為我是往後唯一知道悲慘真相的人，延續一個大謊言帶同眾人一同走向毀亡。
我倆已到達落斜坡的岔路口，斜坡之下就是小屋。
白文信：「送到到呢道好喇！我入小屋後你要盡快離開向山下走， 因為正式發射會有巨大能量發出。我知到事情變化得好突然，你心中有好多疑問， 有乜嘢想問？」
我想了一會：「點解太空船係球形？」
白文信瞪大了眼，然後低頭苦笑：「真係估你唔到，一個感人時刻問啲無聊問題。大空船係大空飛行，咁太空裡面大多數飛行物係乜嘢形狀？地球又係乜嘢形狀？喺太空最理想飛行形狀就係球形，成日話見到飛碟嗰啲人，多數黐線！」
「唔好意思！一時間思絮有啲亂。人類滅亡無可避免？」
「我係地球呢段日子學到好多嘢，有好嘅亦有唔好，人類滅亡係宇宙整體損失。我返到去會盡力改變卡普人對地球人嘅想法，使到開普勒星收容地球難民。你等我返嚟！」
當日為了一百元結識白文信，那張一百元紙幣還收藏在銀包內，取出那張紙幣，將紙幣撕開兩邊。
將一半交給白文信：「呢張一百蚊就係當日係道向你追返嗰張一百蚊，依家一人一半留為紀念。」
白文信接過半張一百元，說了一聲再見轉身走下斜坡在他走進小屋前，我叫問了最後一個問題：「你為乜嘢嚟地球？」
「睇野生動物！」
他所說的野生動物應該是人類。
我向山下走會合眾門徒之時，青山發射站向天射出一道金黃色光束，隨即發生爆炸起光，沿山勢伸延至發射站的通訊電纜亦起光。遠看像一條火龍在山上。
小屋方向發出巨響一個藍色光球直沖天際，光球之下一度藍色電光柱。閃耀整個夜空，比剛才發射站爆炸還要光亮，隱沒在黑夜的山巒亦看得清楚。
發射器的爆發力震撼山脈，腳下亦感到震動，恐防會發生塌坡，號令門徒一同往山下走，在路上遠望良景邨漆黑一片，相信是太空船發射器使電力負荷過重引致大停電。
將近走到山腳通往良景邨的出口時，前方光柱晃動，一班人手持電筒的人沖上山來。
Anbrew Chan 等人帶着警員上山。這裡是屬於軍事禁區，警員非法闖入執法，法治敗壞！
法治敗壞之下，我與十二門徒成了得益者。
梅林被原力打落山坡只是受了傷，他連同Andrew Chan、莫探員及Miko一同被拘捕，因為其政治傾向，政府一向不喜歡，被控以從事恐怖活動破壞通訊及電力系統。
報案者反被冤枉，開始成為常態。我與十二門徒堅持講真說話，被關進精神病院。我們在住院期間繼續傳揚信念，主流傳媒批評我所說的謊謬，嘲諷我為『青山先知』，愈是取笑就愈多人相信。可能在末世就會多人相信，看似謊謬的說法。
事發後解放軍長期封鎖青山軍事禁區，不再讓未經許可的人仕進入。另外有良景邨居民看見及拍攝到飛船昇空，天文台的解說那夜天氣惡劣，出現罕見的球狀閃電。
父親仍是沒有改變，當初對別人說自己兒子『黐鳩線』其後轉變為『救世者』。他永遠站在正確一方。那邊勢大，那邊正確。經常在公園向其他大叔吹噓自己兒子出生時，風雨大作，天降異像，雲聚成龍，天空飛舞。
首次有記者問及此事，我一笑置。這樣回答解讀成，不否認亦不承認，使說法流傳更廣，之後我多次否認也被認為是，心中有所顧忌不敢承認，成為了不能消散的坊間傳言。
現在香港大球場內坐滿情緒高漲的信眾，高聲歌唱等待着我進場向他們發表演說。我手中緊握半張一百元紙幣，心中不停在問自己：「白文信所說的是真話？還是在騙我？」