當年我曾經追到一位女神,但我竟然飛左佢。: 第三十六節:團結

第二朝早我地比其他同學拍門嘈醒左,訓係最出面既阿風同我地講話有朝早班會活動,叫我地一齊參加。

我印象中好似無依個咁既活動,但既然叫到我地都勉勉強強起左身,因為尋晚傾計傾得太夜,搞到依家無乜精神。

我地五個係廁所梳洗完就去到足球場集合,去到既時候大部份人都未黎,只係得文老師同幾位同學。

我走過去問文老師:

「我印象中好似無依個活動架喎,係唔係老師妳搞架?」



「唔係我搞既,而係班上面其中幾位同學主動話搞既,佢地已經準備好哂係到等緊你地。」陳老師答我

我估唔到除左我地五個搞活動之外,仲有其他人肯主動搞。

等左差唔多十五分鐘,文老師見其他同學差唔多黎齊就講:

「我地班上面既幾位同學為大家搞左個活動為大家朝早醒醒神。」

「你地分番尋日既隊伍,我依家每組派一張任務紙,你地需要跟番任務紙上面既提示搵個地方出黎。」



「總共有四個地方,有啲地方吸個印仔就得而有啲地方就需要做少少野先得,等你地自己去發掘,五分鐘之後正式開始。」

文老師講完就分左我,阿彤,阿結,阿靜同阿婷分左去唔同既組，彌補番去左搞活動同學既空缺,而咁岩我個組就係尋日我帶領住玩夜行既隊伍,唯獨是我地組無少到人。

我未自我介紹有幾位男同學已經叫我做褲鏈仔,佢地唔提我都唔係好記得有依個花名。

「講下笑炸,你叫做夏至東我都緊係知,我地叫你做阿東無問題?」尋晚帶頭既男同學同我講

「無問題呀,你地又點稱呼呢?」我問返佢地



佢地輪流講自己個名比我聽，我亦都好快咁記住。

「阿靖,阿鈞,阿軒,阿紫同阿澄,今日多多指教啦。」我循例咁講左句

五分鐘過去,我地好快就跟住阿靖尋晚帶頭既個位男同學出發,根據任務紙上面第一個提示我地黎到食堂出面。

果然有個印章係欄杆上面,我地吸完之後就繼續提示去第二個地方。

「tvb大團圓結局?咩提示黎架?」阿靖一面不解咁問我地

「咪燒雞翼囉,去燒烤場啦。」阿紫好快咁答左,睇黎佢係tvb fans

果然行到上去燒烤場,已經有一位熟悉既女同學拎住印章企係到,無記錯既話依位女同學叫阿欣,可見我地班係幾咁生疏。

「好快手喎你地,咁快搵到係依個地方,不過你地需要完成一個任務我先可以幫你地吸印仔。」阿欣講



「你地需要搵兩個男同學孭住兩個女同學由依到行到最尾個燒烤爐再返黎。」

阿欣講完阿靖同阿鈞就即刻孭起左阿紫同阿澄,好快咁樣來回咁番左黎，我同阿軒就企係側邊睇住。

阿欣幫我地吸完印仔我地就向第三個地方進發，沿路我地見到有另外三組人上緊去燒烤場。

「三分神射手,一睇就知籃球場啦。」阿鈞講完就叫我地行快啲

但係我見到阿紫依然行得好慢,睇黎係尋日唔小心仆親扭傷左。

我同阿鈞講完佢就放慢番腳步,等阿紫唔洗跟得咁辛苦。

到左籃球場我地見到籃球框條柱又掛住左個印仔,我地吸完就去最後一個地方前進。



雀仔?個提示依兩個字,我地去左射箭場但無任何收獲。

我靈機一觸,就帶住大家去左羽毛球場,果然我見到有兩個男同學拎住印章企係到,佢地都讚我好醒。

「哇西利,你地應該係第一組拎左三個印仔,而依個亦係最後一關,你地只需要每人三十秒內跳繩六十下就可以過關。」其中一位主持既男同學阿浩講

但咁岩阿紫有少少扭親,所以阿軒同阿浩講由佢代埋阿紫跳,阿浩話得不過都係要係三十秒內跳八十下,已經放左水。

我地五個就一人拎起一條繩開始跳,估唔到阿軒雖然要跳八十下但都最快完成。

好快每個人都係指定時間跳完六十下。阿浩亦幫我地吸完印仔就叫我地去活動室等其他人。

我地一行六人去到活動室只係見到文老師坐左係到。

「哇咁快手既你地,半個鐘都唔洗就第一組完成哂。」



「雖然依個活動無獎,但係我諗你地已經有最大既得著,就係團結齊心,如果你地有分岐同唔合作,就無可能咁快完成依個活動,希望你地明依個道理。」文老師講

我地六個都點點頭,文老師講得好岩,缺少團結我地真係好難完成到依個活動。

隔左半個鐘,其他隊伍都到齊哂,文老師向其他組講番頭先同我地講過既野就解散我地自由活動。

臨散前再補充多句今晚七點半食完飯再黎依到集合。

我地既朝頭早就係咁充實有意義咁過左。