當年我曾經追到一位女神,但我竟然飛左佢。: 第三十七節：融洽

到左下晝既時候，阿風，阿蔥同阿河叫我同阿結一齊打籃球。

我話唔識廢事阻住佢地，但係佢地再三邀請之下我地兩個打埋一份，我換好運動衫再過去同阿彤講左聲就去左打籃球。

雖然我同阿結唔識打，但佢地三個都好落力咁教我地規則，又教我地點樣防守進攻，教下打下唔經唔覺就到左黃昏。

我地五個就返房換衫同休息順便沖埋涼,隔多陣就食晚飯。

做完運動特別肚餓，我食左兩碗飯都未夠，阿結就話我食極都咁瘦，我就笑番佢食咁少都咁肥。



食完飯之後大家就去左活動室集合，準備陣間大電視既活動。

我問阿靜準備哂啲題目未，佢話同阿婷準備左好多題目。

玩緊大電視期間我同阿彤都無參與到,只係同文老師企係側邊睇佢地玩。

「見到大家都肯打破隔膜玩得咁開心,我覺得好恩惠。」文老師對我地兩個講

「其實我地班啲同學好玩得,只係有時怕羞唔係好識同其他人溝通而搞到氣氛比較差。」我講



「經過依次班camp我諗佢地會學識表達自己同融洽好多,唔似上年咁死氣沉沉。」阿彤講

「希望佢地識得珍惜埋依一年半,好好享受埋依個中學生涯,唔好剩係得讀書。」文老師既感受我完全明白

講到依到我就比阿靖同阿鈞拉左出去玩。

大電視依個活動完左之後,文老師叫大家聽朝食完早餐就黎返依到進行最後一個活動,之後大家各自各返到房休息。

我地房五個人做足成日運動非常之累,所以番到房好快就訓著左,臨訓前我一諗到聽日就要離開依到就覺得好唔捨得。



到左聽朝大家一早就起左身,可能尋晚訓得幾好,我見同房既四個同學都好精神。

我地梳洗完食完早餐就去左活動室準備,有啲無食早餐既同學已經一旱到左係到傾計,我地搵位坐低之後就等齊人開始。

文老師見其他同學黎得七七八八就講：

「其實依個應該唔算係活動,應該講係一個分享會,我想搵啲同學自願出黎傾下你對依個班營既感覺同得着。」

聽到文老師咁講本來我諗住第一個出去講,但點知比幫手搞活動既阿浩出左去先：

「係尋日既跳繩活動,我見到每一組都相當團結合作,就算有其中一位隊員唔成功,其他人都無半句怨言,仲鼓勵做唔到個位同學。」

「仲有其中一組有一位女同學扭傷左,有位男同學肯代佢跳埋佢,可以睇得到我地班既同學係有細心團結既一面,只係之前大家打破唔到隔膜。」

阿浩講完之後全班都拍哂手,大家都好認同阿浩所講既野。



阿浩返埋位坐返低之後文老師就補充多幾句：

「阿浩講既野一啲都無錯,我依兩日都觀察到你地非常團結融洽,幾個活動都令到你地有所成長。」

「依個班會camp既目的就係想你地打破隔膜,令到我地班團結融洽啲。」

「依家你地每個人都做到啦,希望你地珍惜埋剩低既一年半，雖然要面對DSE,但我都希望你地珍惜中學既事同人,唔好等畢業先黎後悔。」

文老師講完之後,愈黎愈多人搶住出去分享,女同學就講男同學好照顧佢地,男同學就講玩得好開心學到好多野咁。

睇黎依個令大家都得着好多,到左下晝大家都汁好哂野準備離開。

雖然依個營地帶唔到,但我諗大家既收獲都非常之多。



三日兩夜既班camp無帶住任何遺憾下完左,我地臨走前係出入口影左張班相留念。

希望每個人都記住依個營裏面所發生既事,更重要既係大家已經打破隔膜,班上面唔會再死氣沉沉。