過左兩日,到左星期五,終於到左班會燒烤既日子。

班會活動進行之前我地當然仲要上九堂啦,因為今日唔係特別日子仲需要正常上堂。

對左差唔多成個星期既卷,今日終於變返正常上課既日子。

但係就黎放暑假,所以上堂果時都幾輕鬆,主要都係溫下書同講解下重點。

輕輕鬆鬆上完九堂之後就到放學既班主任節。



文老師一早已經分配好哂工作,三位男同學兩位女同學一齊去買野飲,其他人落地下幫手起爐。

食物、炭、燒烤叉文老師尋日已經同幾位同學買齊哂,無野做既就可以幫手包下金菇同蕃薯,每個人都有自己要做既野。

我,阿結,阿靖,阿彤同阿靜就幫手出去超級市場買野飲。

「不如我地再買啲棉花糖同麵包番去燒囉,兩樣野燒完都好好食。」阿靜講

「都好喎,我之前都試過,棉花糖好痴幾好味,咁就買兩包啦,我地咁多人。」阿結講



我地五個傾下閒計,好快就到左超級市場,阿結叫左我,阿彤同阿靖去買飲品,而佢同阿靜就去買棉花糖同麵包。

「自己就去買啲唔重既野,要我地去買野飲。」阿靖唔滿意咁講

「唔緊要啦,陣間比番幾支野飲佢拎咪得。」我講

我地最尾買左兩支可樂,兩排檸檬茶,再加埋兩包棉花糖同一包麵包就回程。

阿結話好急尿就拉埋阿靜一支箭咁番左學校,剩低我地三個。



「有無搞錯呀,搵啲藉口唔幫手拎野。」阿靖嬲嬲地講

「我地兩個人都夠拎,又唔係好重,可能佢真係好急呢。」我講

阿靖無理我慢慢咁行返學校,沿路上都係得我拎兩排檸檬茶阿靖拎兩支可樂,見阿彤女仔我地都無比野佢拎。

行到上天橋同拎住咁重既野我都開始無氣,阿彤留意到我就係我隻手到搶左一排檸檬茶幫手拎。

「唔洗妳拎喎,我仲夠氣,跑番去學校都仲得。」我死撐住咁講

「唔好成日咁逞強啦,我又唔係唔拎得野。」阿彤睇穿哂我諗既野

「岩岩妳搶我排檸檬茶果時,我諗番起妳第一次捉住我隻手,妳仲記唔記得?」我問阿彤

阿靖見我地兩個咁閃,就行快幾步遠離我地。



「緊係記得啦,就係天橋依個位果時你仲怕怕羞羞咁縮番埋隻手,搞到我都有啲尷尬。」

阿彤講番果時發生既事,講下講下阿彤就拖住我隻手,慢慢咁行返學校。

番到學校見到三個爐都已經起好哂,有啲同學已經開始燒緊野食。

我同阿彤擺低排檸檬茶之後亦都開始燒野食。

「自從到左中五既中後期,我地大家都好耐無咁輕鬆過聚埋一齊燒下野食傾下閒計。」阿欣講

「無計啦,我地每個人都要為下年既DSE奮鬥,大部份時間都拎哂黎溫書,依家總算可以比大家休息下。」我講

燒雞翼既過程大家都有講有笑,好少會有冷場發生,每個人都好投入依次班會活動。



燒完野食我地仲一齊玩下小遊戲,差唔多玩到八點幾先散場,當然我地都影左唔少既相做紀念。

玩到咁夜,天又黑哂所以我決定送埋阿彤番屋企,夜媽媽自己一個女仔返屋企可能會有危險。

沿路上我地都無乜講野,返左成日學又玩左成個下晝,我地兩個都好累。

去到阿彤樓下佢就循例講句下個星期見就返左屋企,而我就獨自一人慢慢行返屋企。

一路行一路諗畢左業之後,唔知仲有幾多次機會可以成班聚埋一齊輕鬆下呢?