當年我曾經追到一位女神,但我竟然飛左佢。: 第四十七節:光陰(上)

啲大人成日都話光陰似箭日月如梭,細細個既時候都唔覺,到我慢慢長大我先發覺依句說話係真既。

以前初中好想快啲畢業唔洗返學,但係一上到高中就變到好唔捨得,成日係到計自己仲有幾耐可以留係依間學校。

經過暑假既瘋狂補課,補課操卷既日子,開頭覺得幾辛苦,但對耐左就開始慢慢習慣。

我同阿彤兩個雙處既時間亦都少左好多,一黎佢補習社既時間愈黎愈密,二黎學校既補課令我地兩個都無多餘時間去拍拖。

成個暑假都係兩個星期至三個星期見一次,其他時間都係靠whatsapp保持連絡,有時視像下見下對方就好滿足。



今個暑假係我成個中學生涯之中最唔得閒既暑假,莫講話出街,連留係屋企既時間都唔多,所以話學校真係我地第二個屋企。

放完個暑假返學,大家都由中五升左上中六,暑假果時成日都見到大家,所以都無話有無掛住邊個。

集完隊上課室處理下班務,文老師見我地今年已經最後一年,所以都比我地自己簡位坐。

「你好似同我一齊坐左三年啦喎,唔悶既咩你？」阿彤問我

「悶就今年唔同妳坐啦,更何況我驚妳唔同我坐啲成績會退步。」我講



「點解妳好似將個事實掉轉黎講既。」阿彤笑住講

「各位同學,距離你地畢業既時間剩番半年都無,希望大家珍惜相處既時間,大家可以偏埋一班三年係一件好難得既事情。」文老師突然講

「仲有既係,我知道大家成個暑假都要補課好辛苦,但希望你地可以捱埋落去,捱啊!捱就得架啦!！」

我留意到好多同學聽完文老師咁講都好感觸。

無錯,無論幾辛苦,我地大家都要捱落去,為既係要係DSE到爭取到好成績。