當年我曾經追到一位女神,但我竟然飛左佢。: 第四十八節:光陰(下)

文老師講完就開始派發好多開學既通告同課本等等.............

當我望到上課時間表,我就覺得依半年一定會捱得好辛苦。

「妳睇下星期一最尾果三堂,睇見都想死。」我同阿彤講

「係喎.....三堂英文連堂,應該會攞哂黎做卷。做完一定會攰死。」阿彤講

「咁又未必做足三堂既,我覺得。」我應番阿彤



我地一路睇時間表,一路傾邊一日啲堂比較輕鬆,邊一日比較辛苦難捱。

開學日上既堂通常都比較輕鬆,好多堂都係一齊對下暑期功課,有啲堂就講下今年既流程。

放學既時候難得阿彤唔洗補習,所以我地下行街之後又去左公園坐。

「喂,阿東呀你畢左業之後會唔會唔記得我架?」阿彤突然咁問

「妳係唔係讀書讀到傻左?我點會唔記得妳呀！」我講



「畢左業之後你同我要行既路都唔同,有左新既生活同目標,我驚你慢慢唔記得我地之間既事。」阿彤低頭講

「傻啦,我地可以定期約出黎見下架,到時一定仲會親密過依家。」我講左個大話

「你話架,到時唔好搵藉口話唔得閒之後放我飛機呀。」阿彤講完就伸左隻手出黎

「我地勾手指尾啦,好似以前咁,勾左就唔准反口架啦。」阿彤望住我

我亦都微笑住伸左隻手出黎,依一刻我諗番起中二既我地。



純真無煩惱既我地,果時仲未識為將來打算,只係hea下又一日既心態,依家已經變左成熟既人。

送完阿彤返屋企之後,我亦都返屋企休息下。

食完飯我就好早就訓左係張床到休息,太耐無正常返學未調節番個生理時鐘。

我諗番起我今年應該就要過外國讀書,DSE對我黎講都唔太重要。

但頭先下晝阿彤講既野,我過到外國既新生活會唔會忘記我地之間既事?

仲要唔知讀幾耐再真正番黎香港,一諗到依到我就覺得好對唔住阿彤,過外國唔係一朝一日既。

最快都要至少三年先會返香港,又要阿彤等我咁耐時間,我係唔係太過自私。

諗到依到我就唔敢再諗落去,所以我瞇埋眼就訓著左。