【《講鬼台》（二）少年驅魔人】: 7.2 柯蘭篇 - 偵探日誌 (二)

灣仔鵝頸橋底。
 
由於這天是星期日，故街上的人比平日多，始終灣仔銅鑼灣一帶是港島區人流比較多的地方。
 
現場有幾位坐於矮凳上且閒著沒事幹的老婆婆。她們的面前均放了一座觀音像，聖杯，各類咒符，香燭和五色豆等用作打小人的物品。
 
我們要找的那位龍婆相當容易辨認，正如姑媽所言，滿頭白髮，穿了一件紅色大衣。
 
「婆婆，你好啊！」我崩崩跳的走了過去，問道：「請問你係唔係龍婆啊？」
 




「係啊。」老態龍鍾的龍婆回應：「乜我識你架咩？」其臉上層層交疊的皺紋刻劃著被歲月所磋跎過的深刻印痕。
 
「你唔識我，不過我有野想搵你幫手者。」
 
「係咪想打小人啊？」她笑說，口裡的牙齒都已幾乎掉光。
 
「都係既…」這樣說，是不想她認為我們是來混吉。
 
「但係打小人之前，有啲野想問問你…」我從衣袋裡掏出了那面畫有八卦圖案的餐巾，問道：「我想問你知唔知呢個圖案？」
 




龍婆將其接過，瞇著眼，仔細端詳著，神色轉為凝重：「知…咩事？」
 
「咁你一定知道…呢個圖案係代表啲咩？」師父突然問。
 
龍婆點了點頭。
 
「你就係嗰個法師？」師父的提問有點奇怪，我不明白箇中意思。
 
這次，龍婆卻搖了搖頭：「我只係知道有呢種咒術既存在，但係我並唔識得落施咒。」
 




「唔！？」師父一臉懷疑。
 
「到底你地想知啲咩？」龍婆問。
 
「落呢個咒既人差啲害死我一位朋友，所以我想搵呢個人出黎。」
 
「搵到又點？」她反問。
 
「佢用呢種邪術，唔單止會害到人，仲會令到亡靈永不超生，我想幫我嗰位朋友討翻個公道…可以既話，我希望呢種術可以永遠消失，唔好再遺禍人間。」
 
龍婆放鬆了緊鎖著的眉頭，一臉滿意的點了點頭：「呢個術叫做煞獄咒…」她將餐巾還給了我：「係一種降頭，一種必須配合鬼仔一齊使用既降頭…」
 
龍婆說，煞獄咒是一種極度兇悍的鬼仔降，可以殺人於無形。下此咒的人主要是藉著施加降頭到別人身上，借助鬼仔之力來竊取被附體的人的陽壽和各種運氣。只要施術者所下的咒越多，中降的目標越多，他自身的陽壽和運氣便得以大幅提升。那邊廂，受降者的陽壽和運氣則一直被竊取而不自知。
 
她又指，這個咒術是她的亡夫所研發，他生前是一位道士，早於十年前因病去逝。




 
「但係你千萬唔好誤會，我先生之所以鑽研呢種術，出發點並唔係想害人，佢只係想喺自己癌病復發之前，將佢自己既運氣同陽壽送贈俾我…」龍婆黯然道。
 
那些降頭什麼的，我根本一竅不通，故聽得一愣一愣。
 
師父則大為緊張：「換言之，當年既施術者同埋受術者都係你先生自己！？」
 
龍婆神色哀傷地點了點頭。
 
我雖然不太明白事情的來龍去脈和有關那種咒術的內容，卻聽得出龍婆的丈夫是為了保護她才會研發並使用這種可怕的咒術。
 
龍婆的亡夫即使豁出自己的命也想要保護她…
 
這不就是師父口中所講的愛了嗎？
 




「但係…你先生喺十年前就過左身，咁喺我朋友身上落呢個術既係…？」師父感到疑惑不解。
 
「實不相瞞，其實我先生以前曾經收過一個徒弟，聽講佢仲將自己畢生所學傳授哂俾呢個人…」
 
「你既意思…施術既人，可能係你先生既徒弟！？」
 
「我相信係。」
 
「咁佢而家喺邊？」師父問。
 
龍婆搖了搖頭：「我都唔清楚，自從我先生過生之後，我就無再見過呢個人…」
 
「咁佢叫咩名？幾多歲？或者有無其他關於佢既資料可以講到俾我地聽知？」我問。
 
「我剩係知佢叫劉樑鏞…十幾年前，我先生收佢做徒弟嗰陣，佢大概三十歲，,而家應該都有成四十幾歲喇。至於其他野，我真係唔知…」龍婆嘆氣了一聲：「唉，估唔到竟然變左做害人害物既邪術…唔怕話埋俾你地知，其實我係有陰陽眼，而且仲曾經見過好多人身上面都寄宿左一隻刻有呢個八卦咒印既鬼仔。」




 
龍婆握起了我和師父的手，說：「假如你地搵得到呢個劉樑鏞既話，希望你地可以阻止佢，唔好俾佢繼續再害人喇…」
 
「一定。」師父說。
 
「包喺我身上啦。」我滿有自信地說：「我名偵探柯蘭一定會查出呢個劉樑鏞既底細！」
 
師父跟我相視，然後一笑。
 
就是這樣，大海撈針調查任務的第二階段，正式展開。
 
目標：中年男子，懂得落降頭，一名叫劉樑鏞的男人。