香港都市傳說二：不能碰上的熟食攤檔: （二十二）
又一次從惡夢中清醒過來的Daisy，透過鏡子看到自己的樣貌，已經變得跟原先的美玲完全相同。
她輕輕的撫摸了長滿濃瘡和凹陷的臉，淚水卻是再也流不出來了。
這些日子以來，那六次的經歷，她的心情由恐懼變為悲傷、悲傷變為憤怒，來到這一刻，她只感到一片虛無。
不知道是否外貌變成了跟美玲初期一模一樣的關係，Daisy好像有點明白美玲的感受。
如果自己也經歷了跟美玲一樣的事情，可能也會做出同樣的事情來，這一刻，Daisy竟對美玲產生了一絲同情。
人的心真的非常複雜，明明昨天Daisy仍只有憎恨和憤怒，但這一刻竟然會有這種感情產生出來，即便是Daisy自身，也驚訝自己竟會這樣想。
但Daisy明白，同情歸同情，美玲的計劃仍是要破壞的。
因為她知道，只要是人類，都應該像她那樣，心情會根據不同情況而有所變化，但美玲一心都只想著復仇，對男人進行報復，這樣的她，不管從任何角度來看，都絕不可能稱之為人，美玲只是一個仇恨的化身而已。
Daisy看著自己買回來的刀子，回憶起昨天晚上Mina的說話。
「第一件你要記住嘅事，就係唔可以自殺！因為自殺係解決唔到，我之前經歷嘅時候，去到第三次已經忍唔住自殺！我可以話你知，你係唔會死，你只會感受到痛楚！中咗美玲嘅詛咒之後，想死都只能喺俾佢殺死......而正正因為咁，你先有機會做到以下嘅事去破壞美玲嘅計劃！」
本來Daisy已決定在第七日時自殺，才會買來眼前這把刀子。
她想不到，現在這把刀竟然有其他用途。
當Daisy幻想自己，用這把刀去破壞美玲的計劃時，身體竟禁不住顫抖起來。
連生死也置諸道外的Daisy，想到執行那方法時，竟然會感到害怕，她看見這樣的自己，也忍不住冷笑了一聲。
「死，原來真係唔可怕……估唔到，有啲嘢真係會比死更恐怖……」Daisy內心這樣自嘲著，身體仿佛在附和她的自嘲，顫抖愈來愈強烈。
突然，她的手機響了起來，使她從恐懼感中釋放出來。
手機上清楚地顯示著「媽媽」，她卻不敢接聽，因為她的聲音已經變得像一個老人般，她不希望以這樣的聲線跟任何人談話，她不想嚇怕其他人。
手機的音樂停止後，又再次響鬧起來，這樣的情形重覆了好幾遍後，才沒有響鬧起來，看來Daisy的母親放棄了。
Daisy拿起手機的一刻，手機突然震動了一下，螢幕更亮了起來。
「阿女你無嘢呀嘛？我今日Check戶口見到多咗成十萬蚊，做咩無啦啦過咁多錢俾我呀？你係咪有啲咩唔開心呀，唔好收收埋埋，要同我地講呀！你老豆佢都好擔心你呀！你見到我個訊息就覆返我啦！ 擔心你的媽媽」
看到這樣的訊息，又想到自己的情況，相信沒有人會不哭起來吧！
Daisy也一樣，她的眼淚早已落在手機的螢幕上，她不知道應如何回覆這個訊息，更不敢想像父母知道她離世後會有甚麼反應。
但她知道，這可能是自己最後一次留給家人的訊息，所以她打了一篇十分長的文字，好讓父母能夠安心。
雖然，這個安心……只能維持到今晚，當他們翌日發現，身為女兒的她沒有回到家中，到底……又會怎樣呢……
她把訊息發送出去後，思考了一會後，便拿起手機致電給某人。
「Tony，我……我係Daisy。」
「Daisy？你喺邊呀？」Tony驚訝Daisy竟會致電給他，於是緊張地問。
「……對唔住，我尋日只係顧住自己，完全……完全無諗過你感受。希望我講嘅嘢，唔會令你……令你困擾。」
「唔好講呢啲啦，我無困擾呀！我想幫你，我尋日試過問咗好多人，今日都請咗假去幫你搵啲師傅問下可以點做！你唔會有事架！呀，一係咁啦，我依家嚟同你去見啲師傅，就算唔可以即刻解決，最少都爭取多啲時間呀！」Tony的確用了不少方法去搜尋不同的師傅，但他實在不知道誰才有效，所以他打算帶著Daisy拜訪所有師父，只要有一位是有效的，Daisy便不用死了！
「唔駛啦Tony，我喺旺角已經搵咗位師傅幫手，所以唔需要啦。同埋……我有預感，呢次我唔會走得甩……」Daisy帶點悲傷地說。
「唔會架Daisy！唔會架！一定有方法架……係啦，我地買機票去泰國，聽講嗰邊好出名對付呢啲嘢！再唔係……」Tony不肯死心。
「唔駛啦Tony，方法……可能真係有，不過……已經太遲啦。」Tony聽到Daisy這樣說，內心更加自責，要是他能早點相信Daisy，事情可能有轉機……但現在……
Daisy仿佛看穿了Tony的內心，便續說。
「你……唔需要怪責自己，你願意相信我，願意幫我，有呢個心，已經好足夠。只係已經無時間啦，真係要死嘅話，我只想死喺香港。今次我打俾嚟，係想求你一件事，希望……我走咗之後……你可以幫我。」
Tony在電話背後，已經哭成淚人。
「你……你講啦……」
「我屋企人，你都見過面嘅，我擔心，我走咗之後佢地會接受唔到。如果可以，因為我唔知死咗之後喺會消失定留低屍體，到時你再幫我諗個好嘅理去安慰佢地……好嘛？」
「好……好……我唔會睇住佢地……」
「多謝你……Tony，如果可以早啲接受你……算啦，都係無嘢啦，多謝你！」Daisy邊哭邊說。
「我……我想見你……」Tony接受不了就這樣離別。
「唔……唔好啦，我唔想用咁醜嘅樣去見你……我希望喺你心目中留低嘅，係最美好嘅我……再見啦，Tony……」Daisy哭著對Tony說了再見，Tony亦已哭得不似人形。
掛斷電話後，Daisy休息了一會，便準備去做最後一件事，她來到了龍叔的道堂。
龍叔亦像早已料Daisy會到來，早已沏好茶等待她的到來。
「龍叔。」Daisy進到門後，坐下來面對著龍叔。
「Daisy……」龍叔欲言又止，似在想著甚麼似的。
兩人沉默了好一陣子，Daisy率先開口打破這個局面。
「龍叔……我……想問，究竟呢道符有咩用？如果真係用嚟保命，我諗唔到有咩理由一定要係最後一次遇見美玲先用。」Daisy拿出了龍叔給她的符，眼神堅定地問，似在告訴龍叔，她已知道這並不是甚麼護身符。
「你……呢道符……」龍叔似乎沒有料到Daisy有此一問，一時間不知道如何回答。
「呢條問題，不如等我嚟答啦！」一把熟悉的聲音從道堂裏的客房傳了出來，原來是裘叔。
「裘叔？」Daisy萬料不到，裘叔竟會在這裏出現。
「既然你都發現咗道符並唔係咩保命符，我都無必要再匿埋。呢道符，其實係用嚟打開一條通道，令我同師侄可以入到去美玲嗰個空間嘅道具！要你最後一次先用，係因為嗰陣嘅美玲係最詭弱嘅時候，咁樣我地先有機會消滅到佢！」裘叔也不再隱暪。
「消……消滅佢？你地真係做到？咁消滅咗佢……我係咪會無事？」Daisy雖然心裏明白，若消滅美玲後她便能平安無事，龍叔和裘叔早已把實情告訴她，並要求她協助了，但她還是忍不要去確定。
龍叔聽到後，想說又不敢說的樣子，Daisy已猜到答案大概是甚麼了。
「唔會，或者，正確啲嚟講應該係，根據先師佢地留低嘅資料，呢種情況下唔會無事。假如我地能夠成功，我地三個應該會永遠困喺嗰個空間入面，走唔返出嚟！」
「咁之前你地話有一個逃避美玲嘅法術，嗰個都係假嘅？」Daisy追問。
「唔係假，真係有呢個法術，但憑我同阿龍兩個，係無辨法施展嘅！」裘叔怕龍叔說得太多，所以斬釘截鐵的說。
然後，整個道堂都變得死寂起來，從外表完全看不出Daisy在想甚麼。
過了一段時間，Daisy才看著裘叔，眼神堅定地問。
「入咗去嗰個空間，你地都有可能出唔返嚟，咁……點解你地一定要消滅美玲？」
裘叔和龍叔對望了一眼，知道若不交代清楚，Daisy可能會拒絕使用符咒。
「謝小姐，相信你都記得，阿龍佢同你講咗，我同阿龍嘅師傅，都係劉道士嘅徒弟。當年劉道士幫完太子爺之後，其實一直都俾美玲纏繞，好彩嘅係，美玲當年嘅力量雖然好勁，但劉道士做嘅都係善行，加上本身無同美玲有任何嘅緣，所以美玲一直都無辨法對付佢。跟住有一段時間，美玲無再纏繞劉道士，我地都以為已經無事，點知……」裘叔說到這裏，眼眶不禁紅了起來。
他深呼吸了一下，便繼續說。
「點知美玲並無放棄，佢果陣偷咗其他人嘅皮膚，用一個年輕女子嘅身份去接近……接近我……」
說到這裏，Daisy已意會到大概是甚麼樣的情況了。
「果陣嘅我，根本無能力去分辨原來佢就係美玲……結果，佢利用咗我接近師傅嘅地方，設咗一個陷阱殺死咗佢……」
Daisy已猜到是這樣的情況了，但她還是不明白，真的有必要為了這樣，犧牲自己的性命去報仇嗎？
「我師父劉道士，一般場合我都會叫佢做劉伯伯……但……其實佢係我爸爸！一開同你講美玲嘅故仔，我屋企之所以無受到當年暴動影響生計，係因為我爸爸嘅工作唔會受呢啲事情影響。倒不如話，發生呢啲事嗰陣，啲有錢人仲需要求神問卜。所以……雖然爸爸佢無怨我害死佢，但我一直都唔夠膽認佢做我爸爸，我唔配！至少，我要消滅美玲，先可以去佢墓前，叫返佢一聲爸爸……」
Daisy總算知道，裘叔想要消滅美玲的心情。
「我明啦，龍叔唔需要講俾我知你要報仇嘅原因啦，我知道，每提一次，只會痛苦一次！不過，我依家總算可以完全相信你地，今晚我會用呢道符幫你地打開通道！雖然我無辨法繼續生存，但我都希望你地成功！」
Daisy問清楚符咒的使用方法，並交代了自己現在住的地方後，便離開了。
「師伯，我地究竟可唔可以對付美玲？」餘下二人的道堂，龍叔不確定地問。
「唔係可唔可以，而係必需去做！」裘叔堅定地說。