《拳來緣往》: 《拳來緣往》第二回

《拳來緣往》

[格鬥、唔熱血、輕鬆、少甜、青春、愛情]

第二回

「快啲起身呀！」

「仲唔起身既條友？死咗？」



「好心就唔好阻住我地練習啦！」

教練用拳靶大力拍在我腹上，要我立即起來。可是剛剛在操場跑了二十個圈，我已經筋疲力盡，再也動不了。但原來對其他人來說，這不過是熱身……有些人開始練踢腿，有些練出拳，有些好像遇見了殺父仇人，暴打沙包。不過我的視線只留在娜姐身上。她坐下來，閉目拉筋。雙手的線條優美，擁有適量而均勻的肌肉，而且看得出肌肉堅韌而柔軟，完美顯示出運動型的美態。

為了接近娜姐，我特意加入了這大學裡，一個總被人遺忘的技擊學會。我以為總被人遺忘，一定不出眾，一定很隨便，一定很輕鬆。結果，我第一堂第一節就撐不住了。現在賴死躺在地上，偷看娜姐認真地練習。

她拉完筋，張開眼之後，好像變了另一個人。眼神中少了一份溫柔，多了幾份霸氣。我甚至感覺到她充滿力量的氣場，正壓迫著整個空間！她突然望過來！我立即裝作躺著拉筋。她沒有理會我，徑自走向沙包面前。

「娜姐，今日有其他野練，打二千下好喇。」教練拍一下沙包。



「二千下好喇？」一千元大鈔我都少見，打二千下沙包是怎樣的光景？我真是大鄉里出城。

只見她動作輕巧，面容輕鬆自如，但出拳又密又快，富有節奏動感。額上的小汗珠流到泛紅的面龐上，猶如露水滴在樹上熟的水蜜桃上，讓人想入非非。我已經幻想到有一日我在她旁邊，為她扶著沙包，痴痴地看著她打沙包。而她又對著我紅著臉甜笑......

突然大聲的敲門聲，把我從痴心妄想中抽回現實之中。

「唔好意思，你地係技咩學會話？都唔緊要喇，我係空手道學會既，叫斷水流。我地個練習場今日維修，所以想用你地既地方，麻煩你地離開啦！」一個身材魁梧，至少米八五，肌肉橫練的男生走進來，後面跟著一班嘍囉似的嘍囉。

「呢度係我地技擊學會練習既地方，唔方便借俾你地，唔好意思。」教練故意挺起胸膛說道。



其他的師兄弟都在竊竊私語，好像是害怕了他。而我，當然是站到一個不顯眼的角落，為隱身避難做好準備。

「喂，企開啲啦，咪擋住我視線呀！」阿明推著我的背後。

「咦喂？你又喺度既？」我嚇了一跳。

「反正你地都冇咩比賽要打，有都冇關緊要啦，又唔會贏既。但我地唔同呀，我地年年都喺學界空手道錦標賽拎獎杯架。點計都係應該俾我地用啦。」(斷屎流，呀唔係！)是斷水流大師兄說。

「我係話在座各位都係垃圾。」阿明自言自語。

「不如直接啲，我而加打到你收皮，然後你就離開啦？」娜姐不知不覺間走了出來，語出驚人。

「小妹妹，一睇我啲肌肉就知我唔係講玩啦，會出事架！你番埋去溝仔好，減肥好，唔好阻住啦！」斷水流展示他的二頭肌和三頭肌。

「你估你似黎明就大晒呀？我鍾意張學友架！」師兄金龍站在娜姐面前護花。



「借借呀師兄，我搞得掂。」對著師兄也是冷冷的娜姐如此說。

兩人走上擂台，我隨即感受到兩股很強的氣在互相壓迫，連我也開始熱血沸騰！各位師兄也圍在擂台邊，凝神靜待開戰一刻！

「為咗公平公正少少，由你喺度揀一個人做拳證。但比賽規例跟我地，我地今次就打散打例。冇批踭、膝撞、插眼、撩陰。喉嚨、眼、後腦脊錐唔打得。其他拳、腳、摔都可以。有冇問題？」師傅拋出兩對拳套和頭套到擂台上。

「師傅出古惑喎，人地空手道用既拳套同我地用開既都唔同格式，佢用既拳套又細又輕。但而加要用我地既西洋拳套，又大又重……」師兄阿山躲在沙包後面悄悄地道。

「冇問題，不過我從來唔戴套……我意思係頭套。至於拳證……就嗰條蛋散啦。」斷屎流指著……我。

師傅望一望我，強忍著笑，揚手示意我上台。

「Shit！」阿明把我推上台上。



「OK，聲音畫面有冇問題？咁我地黎喇喎。Fight！！」我揮一揮手，開始比賽！！

待續！！！