是咁的，我嘅職業係ptbf: 275.一條問題

到我地去到游泳池，阿螢就比咗條泳褲我

之後我就帶咗牛仔入男更衣室

我就好快換完泳褲，將啲袋呀乜乜物物塞哂入locker

不過牛仔嗰件係一件頭泳衣，有啲麻煩，搞到佢著極都著唔到

見佢舞咗一輪，都死唔開聲叫我幫手，我就托住頭望實佢



「點呀唔好死頂喎，要幫手就出聲喇。」我心入面暗爽緊

牛仔仲係好硬頸唔求助

「唏！唔！」又搞一輪，終於著到，但條拉鍊喺佢背脊，手短嘅牛仔拉唔到

「都唔明你，叫下人幫手使死咩？」

「我要自己嚟！全部自己嚟，就可以快啲大個！」



乜鬼野理論嚟？

睇嚟佢唔會就咁接受人無條件咁幫佢，既然係咁我就用另一個方法

「咁我同你交易，你答我一條問題，我幫你拉拉鍊，點睇？」

牛仔聽完，戚起單邊眉毛：「咩問題？」