是咁的，我嘅職業係ptbf: 347.傻仔

再醒翻嘅時候，房門開咗，老豆坐喺廳嘅梳化度打緊機

我房電腦枱上面，有一碗冒住蒸氣嘅餐蛋飯，旁邊佇立一罐表面冒出冷水珠嘅可口可樂

餐肉煎到金黃脆邊，外脆內嫩

太陽蛋煎得恰到好處，蛋白面唔會太老，底部亦係脆卜卜

用匙羹咚開蛋黃，蛋汁好似火山爆發嘅熔岩流瀉喺淋咗適量豉油嘅米飯上



一羹飯送入口，味蕾上爆發午餐肉特有嘅香同蛋汁嘅鮮味，配合米飯將過度嘅咸味稍為中和

咬呀咬，咬到唔捨得呑

但呑落肚之後留喺齒縫同脷面嘅餘韻亦同樣誘人

咔嗤

最後以一啖可樂入口，將剩餘嘅滋味同汽泡融合，送我到天國



「我煮比你，仲好食啦，傻仔。」

老豆入咗嚟，一手拍落我頭頂，摸呀摸

不知不覺間，我又食到喊

「係呀⋯⋯好好食呀⋯⋯」