是咁的，我嘅職業係ptbf: 351.時間仍在流逝

老豆行入嚟，用個屎忽撞開我：「等我嚟啦。費事你搞到我嗰碗都難食埋。」

佢一嚟就打蛋落鑊，點知隻蛋黃爛咗

「噗。」我忍唔住笑出聲

自從媽咪走咗，老豆就無再煮過飯，會生疏都好正常

「蛋黃生食有食肉菌呀，所以我先煮熟佢咋。」



「撐啦你，仲有生蛋黃嗰隻叫沙門氏菌。」

「是鬼但啦，咪又係菌。」

「想讚你寶刀未老都唔得。」

「再鋒利嘅刀都有生鏽嘅一日。」

聽到依句，我仔細望下老豆個樣，幾時開始，皺紋多咗又深咗？



再望下佢嘅髮，摻雜嘅銀白髮絲愈嚟愈多

縱使我們一直失去相處的時間，時間仍在流逝