miki喺點心紙兩三下劃好要食嘅野,然後問我食乜,我就求求其其點咗籠蝦餃

「好喇,睇過睇過。」佢誇張咁擺動身體,左望右望

「嗯,眼神雖生猶死咁喎,可唔可以講下你想點寫封遺書呀?」

我慢慢將一路以嚟發生嘅事,一五一十、鉅細無遺咁話比佢知

而miki聽我嘅故事嗰陣,收起本來嗰種傻頭傻腦嘅性格,對眼好似攝影機嘅鏡頭咁,冰冷又無感情



佢喺度觀察我

彷彿喺依兩個魚眼鏡頭之中,我連眼角嘅震動都被佢清晰咁捕捉

「然後,你封遺書就係同阿螢講清楚,你無因為爸爸嘅死而憎佢,希望佢唔好自責。最後喺文末詛咒佢要生存落去?」

我點點頭:「無錯。」