如果你可以比任何人都早,以完全潛行既方式去玩GTA類型既game,而且地點設定仲要係香港,你會有乜感覺?
 
我估大部分人都以為自己係幸運兒,可以搶先試玩呢隻咁有趣既game。
 
我起初都係咁諗,覺得自己勁過中六合彩,直至…
 
時間慢慢過去,大家甚至開始慢慢忘記自己入黎呢隻game既因由。
 
大家都只係掛住係度盡情享受隻game,完全按照遊戲既要求去做…
 




不過所有野,都要由一張啤牌講起。
 
我叫浩賢,姓就唔多想講,因為呢個姓會令我諗起我老豆,所以我唔想提。
 
佢係我小四個陣粒聲唔出扔低我地,自己一個人消失左,留低我老母一個照顧我同阿妹。
 
萬幸既係老母本身係事業型女性,有層樓又有相當既積蓄,我地三母子既生活先無太大既影響。
 
不過大家都有一個共識,就係唔再提起佢。
 




如是者,我今年已經中四。
 
讀書方面中中等等,全部科目都合格以上。
 
朋友方面都有幾個傾得下既,每日既飯腳咁。
 
 
但老實講,我覺得每日既生活都好無聊,好似硬係差d野咁。
 
但硬係講唔出差d乜。




 
係咪差個女朋友呢?應該唔關事吖,學校入面既女仔我又無邊個係有好感,佢地話既咩女神我都覺得好普通。
 
「喂阿仔你有信喎。」
 
阿媽一邊講遞封信比我。
 
我:「信?係咪又係牙醫個D寄黎架?」
 
媽:「點知啫,咁大個人自己拆黎睇啦,我讀埋比你聽好無呀?」
 
我:「Sorry囉問下啫唔洗咁惡既。」
 
我慢慢拆開封信,係入面抽出一張紙,紙入面仲好似包住d野咁,奇奇怪怪。
 




妹:「咩黎架咩黎架?阿哥你收情信呀?」
 
我:「唔係吖走開啦,乜你咁八卦架。」
 
妹:「車,好叻咩,好心你就拍下拖,唔通你真係想就咁去到畢業咩。」
 
我:「得啦威啦,知你好多人追啦得未,唉廢事睬你,我入房睇。」
 
無錯,我呢個妹係學校係好受歡迎,好多人追,人氣可以話一人之下,萬人之上。我呢個做阿哥真係諗極都諗唔明原因。
 
我帶住封信,返入自己房,仲閂埋門。
 
「睇封信啫,洗唔洗搞到咁神秘呀。」
 
我一邊自言自語一邊打開封信,想話睇下封信入面到底包住左d乜。




 
「吓?搞乜野呀?」
 
無錯,呢個係我打開封信之後第一句講既野,亦係我第一反應。
 
因為實在太奇怪,封信居然仲包住張啤牌。
 
我拎起張啤牌,反轉一睇,只見卡上面空白一片,咩數字公仔都無。
 
咩事啊而家…
 
都係睇埋封信寫咩先。
 
「恭喜您,閣下已被挑選成為本公司最新作品《香城之夢》的遊戲測試員,本公司的工作人員很快就會與閣下接觸,在此先希望閣下可以好好享受本遊戲。
 




 
星幻遊戲公司敬上。」
 
《香城之夢》?遊戲測試員?我記得我從來無申請過做咩遊戲測試員架喎,而且咩《香城之夢》,星幻遊戲公司?聽都未聽過。
 
應該只係惡作劇?
 
媽:「喂阿仔!幫我落街買盒雞蛋吖!」
 
我:「哦!而家去!」
 
算喇,唔好理咁多喇。
 
我好快咁換一換衫,踢住拖咁落左街。
 




太陽落左山之後天氣都涼左少少,好彩著返條長褲啫。
 
啊反正落左黎,去玩下pokemon go都好。
 
我係褲袋拎部電話出黎,但有另一樣野一齊拎左出黎。
 
頭先個張奇奇怪怪既啤牌我居然拎埋出黎。
 
咁岩旁邊有個垃圾桶,順手扔埋佢都好。
 
正當我準備將張啤牌放入垃圾桶之際,有把男聲叫住我,仲叫左我全名。
 
我望左過去聲音傳黎既方向,見到有個西裝友一臉笑容咁企左係度望住我。
 
我:「你係咩人,點解會識我?」
 
「我係星幻遊戲公司既職員,你應該已經收到我地公司既信?」
 
佢一邊講一邊指住我手上既啤牌。
 
可能係本能反應,我好自然咁向後退左一下。
 
但係,我好快就feel到後頸有一股刺激。
 
然後,就沒有然後了。
 
到我再擘大眼個陣,我已經唔係頭先個度。
 
我而家係邊度我自己都唔知,呢度白茫茫一片,得我訓緊既床,同一道門。
 
咁古怪既…都係開門出去睇下有無人,可以俾我問下咩事先。
 
「喀嚓!」
 
門打開了。
 
一個女仔成碌木咁企左係門後面,如果道門係推而唔係拉既話一定會撞到佢。
 
呢個女仔眼大大,短頭髮,俾人感覺應該係可愛type。
 
岩哂,就問下佢啦。
 
我:「唔該…」
 
我只係講到兩個字,佢就開聲插嘴打斷左我。
 
「歡迎登入《香城之夢》。」
已有 0 人追稿