「冒險」「生存」《香城之夢》: 登入

《香城之夢》…
 
咪就係我封信上面寫住叫我去做咩遊戲測試員既game！？
 
佢話歡迎登入..？但呢度電腦都無一部，我點登入呀？
 
唔通呢隻係VR Game？咁等我試下除左個罩先。
 
咦？
 




咦？？？？
 
我除唔到既！！！
 
唔係，應該話我頭上面根本無個舊平時用黎玩VR既野。
 
到底係咩一回事… 唔通呢個係乜野整蠱節目？
 
我開始四圍望，想話睇下間房有無咩鏡頭，不過望左好耐都唔見咩cam。
 




一諗到呢件事係真，我真係登入左咩《香城之夢》的話，我個背脊就不自覺咁涼左一涼。
 
因為我而家唔係以電腦電話又話者遊戲機既方式登入，我係成個人入左去隻game度！
 
唔會既唔會既，咁實在太超越常識，邊有game可以咁，就算係VR都俾唔到咁既逼真效果啦。
 
而家呢度同現實可以話無分別，邊有game既畫質可以做到咁靚，就算係裝哂mod既PC GTA V都唔得啦。
 
呢度一定係現實黎既，我只係俾人整蠱啫。
 




不過我搞左咁耐，眼前呢個女仔仍然企定定係度，郁都唔郁咁望住我。
 
如果佢講既係真…我而家真係登入左隻game的話…唔通佢係NPC..?
 
哈哈，NPC的話未必做得太靚啦掛，D皮膚可以造到同現實中D靚女咁好。
 
係喎，只要我做D越軌舉動，到時一定會有人出黎stop我架啦。
 
我同佢對望多一眼之後就揸緊自己既拳頭，一下打埋去佢個肚度。
 
當然，我有注意自己既力度，免得整親個女仔啦，人地都係做show啫。
 
不過，我既好意一d用都無，因為我根本打唔到佢。
 
拳頭去到佢個肚前面少少就停低左，應該話係被擋住左。




 
有一幅無形既牆擋住左我既拳。
 
「Immortal Object」
 
呢個字突然彈左出黎，出現係我同呢個女仔之間，就好似windows d 彈出式視窗咁。
 
如果我係睇緊戲既話，或者我會讚話D CG做得好，但係我好肯定自己而家唔係睇緊戲…
 
背脊再一次發涼。
 
我慢慢咁收起拳頭，繼續呆呆咁望住個彈出式視𥦬。
 
望左大概半分鐘，個視窗突然間消失左，個女仔亦同時開聲。
 




「我叫夢夢，係《香城之夢》既導航員，負責向各位玩家介紹同作出支援解難。」
 
嘩，語氣真係同NPC無乜分別…
 
夢夢：「首先，等我向你介紹一下《香城之夢》呢一款遊戲。」
 
「《香城之夢》係由星幻遊戲公司開發，係以VR技術作為基礎，集結各種新技術開發既革命性遊戲。」
 
「而遊戲既類型係開放世界，玩家們可以係遊戲入面隨心所慾，以第一身視角係「香城」入面做自己想做既野。」
 
香城…係咪即係香港？開放世界類型既遊戲，咁咪即係GTA？
 
係香港玩GTA？呢個玩笑未必開得太大喇掛？
 
夢夢：「係你踏出呢度門之後，系統將會自動引導你進行新手教學，更詳細地向你說明。」




 
「在此，祝閣下可以有一個愉快既遊戲體驗。」
 
佢講完就消失左，無錯係「消失」左。
 
佢好似我細個睇洛克人咁，變左堆數據，消失左。
 
仆街，我嚇到幾乎瀨尿…
 
唔係真既，一定唔係真既，幻覺黎架啫，嚇我唔到既。
 
不過而家間房得返我一個，點好呢…行出去啦。
 
哇！！！
 




我一行出去，就有一道強光拉住我對腳，深深咁拉左我落去，
 
我再一次，係再一次失去意識。
 
到我醒返個陣，我又去左另一個地方，不過今次呢個地方係我熟悉既地方。
 
我係自己張床上面。
 
啊，原來頭先係發夢，係啦，邊有可能係真吖呢d野。
 
「請到光圈位置。」
 
邊個講野！？
 
我好驚咁四圍望，但我房就只係得我自己一個，無其他人。
 
咁把聲係係邊度黎架？
 
「請到光圈位置。」
 
屌…把聲係係我腦入面直接響起…
 
光圏…係邊呢？咦係我房門？意思係叫我行出去？
 
反正都無其他選擇，行出去喇。
 
我行到去門口，腳底既光圈仍然存在。
 
 
直至我推開門，佢先消失。
 
唉，我真係分唔到呢個係現實定game喇而家。
 
我真係希望可以用幻覺兩個字去解釋呢一切。
 
不過而家眼前出現既種種事，已經開始慢慢咁說服我，話俾我知我真係身處係game既世界。
 
唉屌到底發生咩事，點解會係我，點解會揀我做乜野測試員架…
 
我dup低頭，一邊諗呢個問題一邊行，好快就撞到野。
 
不過我撞到既唔係牆，唔係櫃，而係人。
 
我撞到既係我阿媽。
 
太好喇，咁即係話我真係只係有幻覺，而唔係…
 
「請與NPC對話。」
 
係我開心既一𣊬間，個一把聲又將我打返落黎。
 
我阿媽…係NPC..？