「冒險」「生存」《香城之夢》: 任務
之後既兩日，我都好似平時咁過，每日返學放學返屋企。
因為除左咁之外我根本唔知自己可以做d乜。
講係咁講，但我仍然有做d野，希望可以幫到自己離開呢個所謂既《香城之夢》。
我呢兩日係放學之後都專登唔行平時行既路，故意兜遠少少路，去睇下附近。
希望可以搵到d同現實有出入既野，但好可惜係無既。
所有野都同現實一樣，就連士多老闆，幫趁既阿公阿婆都係同平時見既一樣。
真係令人頭痛….點先算完成遊戲，點先可以離開呀…
媽：「喂，你做乜諗野唔食飯呀？」
老母既一句說話，拉左我返去飯檯上。
老母依舊係個個老母，性格語氣都無分別。
如果我真係搵唔到辦法離開，一世都要同呢班npc一齊生活其實都無乜問題啊…
反正佢地都….
「叮~」
妹：「阿哥你電話響喎。」
我：「我知，我唔係聾既！」
我拎起自己部電話，發現原來係Elaine send過黎既msg。
我地當日交換完電話之後都無再搵對方，呢兩日大家都係度做自己野。
估唔到佢第一個send黎既msg就係「你查唔查到D乜。」，仲要一個emoji都無，冷漠到一個點。
「無，所有野都同平時既一樣。」
我好快咁打左呢一句，之後就放低部電話，回歸飯檯繼續食飯。
不過講開食飯，估唔到係呢度食飯都可以感受到味道，明明就只係一隻game…
媽：「喂阿仔，你電話係咁響喎，係咪有咩緊要事吖。」
唔？又響咩？掛住諗野無留意到添。
阿妹：「佢肯定係拍緊拖，同人地whatsapp啦~」
我：「多事。」
我又拎起部電話，又見到佢send黎既msg，今次仲要係三連發。
呢個三連發，威力勁過虎源太既怒濤斬魂劍三連擊。
「我Level up左。」
「仲查到D野。」
「方唔方便出黎講，wts好難講清楚，我已經係你屋企樓下。」
屌呀？Level up？仲係我屋企樓下？佢點做到架？
我都未諗好點答佢，佢又傳黎一個msg。
「你唔想落樓就我上黎啦，話我知幾樓啦。」
喂喂喂！等陣先！
我好慌張咁打左句「我而家落黎」之後就衝左入房換衫。
媽：「要出去吖？」
我：「係吖好快返！」
我一邊講一邊衝出去，差d連鎖匙都無拎。
一落到樓就見到佢，見到佢個一下，我成個人都呆左。
佢居然著住件黑色晚裝，仲著哂高踭鞋，好似去D高級party咁。
我居然因為佢既一身裝束一時之間著左迷，望住佢係度發呆。
唔係佢開聲的話我可能仲係度望緊佢。
Elaine：「喂，望夠未啊。」
我：「啊，Sorry。咁你搵我有乜事？你查到D乜野？」
Elaine：「與其話係我查到，不如話係佢自己彈出黎比我睇仲好，你睇下呢個。」
佢一邊講一邊用手指對住空氣篤左幾下，之後就有幾個視窗係我地之間彈左出黎。
哇，佢點做到架？
Elaine：「唔洗咁驚訝喎，我都唔係早你好多識咁用。」
「不過呢d都唔係重要野，你快d睇下呢個先。」
佢講完就一手撥左向佢個邊既一個視窗過黎我呢邊，我亦即刻睇上面寫左D乜。
「任務：香城之夢」
！？
呢個係！？咦喂！！
當我想睇清楚內文既時候，個視窗框突然間消失左。
我：「喂！我未睇完呀做乜熄左佢呀！」
Elaine：「我無熄到喎…」
我：「你話你無熄到…咁點解會…」
我句說話只係講到一半，我就停左，因為我feel到有d唔妥。
好強既氣。
呢句說話完全適合形容而家既情況，我feel到有其他人係唔知邊度望住我地。
而且唔知原因，我覺得對方非一般。
我：「出黎啦，我知道你係度。」
我句野一講完，就有個人係旁邊既樹上跳左落黎，無錯，係由樹上跳落黎。
對方睇落係一個同我地年紀相若既女仔，嘻皮笑臉咁走埋黎。
Elaine：「你係..夢夢？」
Elaine突然開口，令到個女仔停低左腳步。
女：「好開心你仲記得夢夢，不過我唔係吖，我叫柔柔，我同夢夢都係一樣都係負責支援玩家既npc。」
佢都係npc..？我係度咁耐以黎好似都係第一次聽到npc主動承認自己係npc。
我：「咁負責支援玩家既NPC主動同我地接觸係咩事？」
柔柔：「eh…因為我地見你地既進度有少少既異常，所以先準備主動提供協助。」
「既然你地都知道左咯，不如有乜唔明又或者想知可以直接問我喎。」
有乜想問….
Elaine：「我地要點做先可以返返去現實世界？」
我都未諗到，Elaine已經講左出黎，不過算啦，反正呢個都係我想問既野。
柔柔：「唔~~~你地真係得意，居然仲係度諗呢個問題，有趣有趣。」
我：「你咁講係咩意思？」
柔柔：「無事無事，好喇等我答你地既問題先啦，想返去可以透過完成兩個任務中既其中一個。」
「一係生存到個一日，而二呢就係…」
「殺死除左自己以外既所有玩家。」