「冒險」「生存」《香城之夢》: 同伴
「我叫葉傲雪，你可以叫我Elaine。」
呃….
Elaine：「你呢？你叫咩名？」
我：「我叫浩賢。」
屌，我居然一時呆住左，搞乜呀我。
不過估唔到佢把聲同佢個樣有咁大分別。
佢一頭短髮，加上白白既皮膚，仲有個粒生係左眼邊既美人痣，直頭好似一座冰山咁。
但佢把聲居然咁甜，簡直好似搽左蜜糖咁，真係完全無諗過。
Elaine：「咁…浩賢，好高興認識你，你係讀咩班架？」
我：「4C。」
不過而家唔係好好認識彼此既時候呀？
Elaine：「4C？即係原來我地係同級架？」
我：「不如我地講返正經野先？你記唔記得你係點…」
「登登登登~」
屌，點解偏偏係呢個時候先打鐘架！我仲有好多野想問架！
Elaine：「我知道你想問乜，但睇黎而家唔係時候，我諗不如小息再傾？」
佢語氣突然一轉，由好開朗變到好平靜，我當堂嚇左一跳。
我：「呃…好。」
Elaine：「咁一陣小息你黎我班房搵我啦。」
佢無等我應佢，自己就已經行左去。
我只係傻傻咁望住佢既背影慢慢咁遠去。
總算搵到一個同伴啦可…？感覺好奇怪，個心好似終於靜左落黎咁。
之後既幾堂我都好似平時咁上，唯一不同既我諗應該係我既心情啦。
望住班上面既人，唔知點解有一種說不出既奇怪感。
明明大家都同平時一樣，但全部都比人標籤成係NPC。
咁點解唯獨岩岩個個Elaine會係玩家？
同埋呢隻game係點樣可以製造到咁多NPC，而且D NPC仲要…
屌，個腦好混亂，組織唔到野。
黑仔：「喂喂喂，我地既賢哥仔係度煩緊乜呀？煩溝女呀？」
銘豪：「係啦，頭先係操場見到佢同A班個Elaine傾計，個Elaine仲笑添呀。」
阿希：「哇屌，你講真架？我讀左四年我都未見過條友笑，阿賢你個仆街點做到架？」
仆街，呢三條友仲係同平常都一樣咁煩…我已經夠煩架啦…
無錯，銘豪仲有阿希都同黑仔一樣，係我係學校入面既朋友，亦係我既飯腳。
佢地三個都坐係我附近，所以大家上堂都成日傾計，亦成日都俾miss鬧。
黑仔：「喂唔好講個Elaine住啦，尋日發生左件大事呀你地知唔知呀？」
係呀，我都發生左好大件事，你地又知唔知？
銘豪：「屌，我知啦你今朝已經講左好多次啦，女神拍拖嘛。」
miss：「喂你地四個！唔好再傾計啦！」
屌，連miss都係俾出平時咁既反應…
「登登登登~」
小息了。
阿希：「屌，快d落去排隊買野食先，如果唔係又會比Form5個個肥仔買哂d好野。」
銘豪：「好，阿賢你去唔去？」
我：「不了，我唔餓。」
黑仔：「有情飲水飽啦佢，唔好理佢喇，我地三個自己去喇。」
我已經唔想理佢地，換轉係平時我或者仲會駁兩下嘴既，但一諗到佢地只係NPC，我就唔想再講。
大家都好似平時咁開心咁過，唯獨我一個好煩惱，好似異類咁。
我自己一個望住窗外既風景，自己一個係度煩惱。
無錯，全部都係得我自己一個。
「喂浩賢，有人搵你喎。」
搵我？邊個？
我望過去班房門口，見到一個人棟左係門口。
係個個Elaine。
呀係喎，頭先佢叫我小息去搵佢喎，唉我無左回事添。
當我想起身，想話行出去會下佢個陣，佢已經行左入黎我班房。
佢對鞋發出既knock knock聲，令在場既人既目光都移到佢身上。
好快，佢就行到我面前，用佢平時個個好cool既樣望住我。
同佢對望個一下，我不自覺咁吞左一下口水。
Elaine：「做乜唔黎搵我。」
短短既六個字，配上平淡既語氣，卻震撼了十三億人。
班房入面既人，都嘩左出聲。
我：「喂你用個好D既方法講得唔得呀？」
Elaine：「唔？有乜問題？我講錯野咩？」
我：「唔係…只係你咁講，人地聽到好容易會誤會，以為我地係咩關係啫。」
Elaine：「你話既人地即係佢地？」
佢講既時候用手指住係旁邊圍觀既人，我見到咁即刻㩒低佢隻手。
我：「喂！」
Elaine：「做乜啫，咁激動為乜啫，佢地..」
「只係NPC黎咋嘛。」
佢一句野，令到我一時間停頓左係度。
呢個人同我想像既好唔同，我仲以為佢會係個d好cool，咩都唔理既人添。
Elaine：「算喇呢度唔方便講野，跟我黎啦。」
佢講完就拉走左我，帶左我去樓梯口。
樓梯口雖然人來人往，但大家都唔會注意係度既人，只會繼續行自己既路。
所以呢度都可以話係講野既好地方。
佢一五一十咁將佢係尋日發生既奇怪事講哂出黎，情況大概同我差唔多。
佢都係係尋日收到封信，信既內容同我收到個封一樣，而且佢又係收到一張啤牌。
之後佢落街放狗，又係同我一樣遇上一班西裝友，之後就暈左，醒返已經變成而家咁。
我亦有同佢講我既情況，大家聽完之後都沉默左一陣。
就係呢個時候，佢望左過去個條有好多人既走廊。
Elaine：「可能係呢間學校入面，得你同我兩個係真正既人。」
我：「可能啦…」
Elaine：「我想返出去，返去現實。」
我：「我都係，呢個世界太令人唔舒服。」
Elaine：「嗯，一齊諗辦法返去啦。」
佢講完就自己一個行左去，留低我一個。
我又一次望住佢既背影漸漸遠去。
老實講，我睇唔清呢個女仔。佢好似好神秘咁，態度一時一樣。
諗咁多做乜吖，又唔係要溝佢，不如諗辦法返出去好過啦。
不過，係呢個時候既我地，仲未領會到呢個《香城之夢》真正既玩法。