「冒險」「生存」《香城之夢》: 買賣
Elaine：「唔好係呢度。」
我連理解呢句說話既時間都無，佢就已經拉左我走，離開左M記。
佢一直捉住我行，最後行到去一個公園先停低。
但就算已經停低左，佢仍然無放開我，只係係度四圍望。
我：「Elaine？」
Elaine：「係大眾廣眾下唔好用個個選單啦，如果比其他玩家見到有機會會出事架。」
我：「哦…所以你今日出黎就完全無好似尋晚咁對住空氣篤篤篤？」
Elaine：「係啊，因為我怕會比其他玩家察覺到，所以先會改用電話去查。」
我：「原來如此，咁…」
Elaine：「唔？係咪有咩事呀？」
我：「無，只係你捉到我隻手有D痛啫。」
Elaine：「Sorry。」
佢好尷尬咁縮開手，仲擰咩面，唔俾我睇佢個樣，奇奇怪怪咁。
我：「係啦，我而家已經Level 3，可以去搵個個Stephen啦應該。」
我一邊講一邊㩒電話，嘗試睇下有無咩新任務，果然係「主要任務」一欄發現左一個新任務，叫「尋找Stephen。」
我爽快咁接下左呢個任務，之後係我眼中既小地圖即時有一個黃點，距離仲同我地相當近。
我無估錯的話，我地既目的地應該係信和。
Elaine：「嗯，咁就行啦，記住唔好再係大庭廣眾下做d有異於常人既事呀知唔知。」
我：「得啦，我明白，唔會有下一次。」
之後我地就離開公園，前往信和。
係去信和既途中，我都好留心沿途既人，諗住睇下佢地頭上有無之前係Elaine頭上見到既綠圓，去確認下附近有無其他玩家。
結果係一個都無，不過咁都好，起碼可以安心D。
好快，我地就去到信和，但係係呢個時候，另一個問題浮現了。
信和咁多層，要去邊層先可以搵到個個「Stephen」？
Elaine：「點好呢而家…應該要去邊層好呢？」
睇黎佢同我都係諗緊同一個問題。
就係呢一刻，我收到一個msg，我即刻睇左，發現原來係一個提示msg。
「請前往21樓。」
我：「喂…佢叫我地去21樓喎。」
我講完就遞左部電話比佢睇。
Elaine：「咦…奇怪啦點解我收唔到呢個訊息既？」
我：「係咩？唔好理咁多啦，上去21樓睇下先啦。」
Elaine：「咁又係，反正我地而家都無頭緒，就去左21樓先啦。」
就係咁，我地兩個就搭𨋢上左21樓。
一出𨋢，我就見到個光圈。
之前係第一日，即係我岩岩進入呢個世界時見過既光圈，當時係用黎叫我行去指定位置。
Elaine：「你見唔見到…道光？」
我：「見到啊，應該係個度啦我估，過去睇下啦。」
我地慢慢，慢慢咁行去個光圈度，行既時候真係一步一驚心，好怕會發生唔知咩事。
最後，我地走到去光圈，一道門前。
正當我同佢呆呆咁望住地上既光圈時，係我地面前既門居然自己開左少少，漏左一條空隙咁。
好似就係叫緊我地入去入面咁。
我唔知哪來既勇氣，推開道門自己行左入去。
入到去既我，成個人呆左係度。
我第一個反應係：「呢度唔係我應該黎既地方。」
呢度燈光好暗，可以俾人走動既空間好細，因為呢度放左好多好多個display櫃。
而display放左d乜？乜都有，下至玩具CD，上至槍同刀都有。
無錯，你無睇錯，我亦無講錯，係槍同刀。
明明呢個世界上係有氣槍同BB槍，但我望到呢堆野第一個反應居然係呢D係真野。
仆街，要走，咩任務我都唔理了。
咦咪住先，Elaine呢？佢去左邊？
我望返去門口，發現個度空無一人。
佢走左去邊！？
我好慌忙咁係呢間鋪四圍行，想話即刻帶佢走，但呢個鋪放display櫃既方式就好似迷宮咁，轉圈又轉圈，我都搵唔到佢。
當我轉左差唔多四千個圈，我終於搵到佢，係一個櫃檯搵到佢。
不過個度唔只佢一個，個度仲有一個感覺好粗獷既肥佬阿叔。
我急急腳行埋去，打算拉走Elaine，點知我一行近，個阿叔就注意到我，仲開左聲。
「歡迎光臨喎靚仔，有無乜野可以幫到你。」
屌，佢個種語氣好似係度嘲笑緊我咁，但我又真係淆緊佢喎。
我搖搖頭，繼續一步一驚心咁接近佢地，最後走到去Elaine旁邊。
Elaine無望我，只係好似今朝咁係度㩒電話。
不過，佢有注意到我，仲講左一句野。
Elaine：「佢就係Stephen。」
呢個阿叔係Stephen？
我好驚訝咁望住個阿叔，佢就用一個笑容同揮手回應我。
Stephen：「你好，我係Stephen，你想要既野呢度都有，你唔想要既野，呢度都可以同你接收。」
「武器又好，食物都好，就連情報都好，只要你有錢，便能擁有。」
「就算你需要d乜野協助，呢度都可能可以幫到你。」
原來如此…即係話呢度係比玩家買賣裝備，收集情報既地方，好似GTA既「武裝國度」咁。
就係我鬆一口氣之際，我既電話又響了。
「任務完成：尋找Stephen。」
「新任務：購買裝備。」