「冒險」「生存」《香城之夢》: 升級
我並無將我既想法講出口，只係下意識咁呑左一啖口水。
Elaine：「我都係咁諗。」
佢講完就繼續行，我就好似一個傻仔咁跟住佢行。
其實點解佢可以咁冷靜去面對呢一切？明明第一次見佢既時候佢係好surprise ，但之後見到佢就完全唔同哂，好似變左另一個人咁。
大概十點左右，我地就去到旺角。
呢個鐘數既旺角，唔算多人，行起上黎都比平時舒服。
不過凡事有兩面，少人，亦代表可以做既任務會少左。
我地行左大半個鐘，都只係做左兩三個19任務，買野之類既任務，經驗值少得可憐，連升上Level 2都唔夠。
我：「點算好呢而家仲未升到上Level 2…」
Elaine：「咁都無辦法啦，照去搵Stephen啦我地，如果我地再咁搵任務落去，好有可能會被其他玩家發現我地。」
我：「你意思係…我地再咁落去可能會比人攻擊？」
Elaine：「最壞既情況就會係咁，我睇左套動畫話有一種玩家專係以攻擊其他玩家為樂既，我地一定要小心。」
我：「講online game既動畫…你唔會係睇左《刀劍神域》呀？」
Elaine：「嗯，因為我上網發現我地而家既處境同呢套野有d似，所以我呢兩日就睇左佢，希望可以幫到手。」
嘩佢真係做足功課咁…
Elaine：「好啦唔好講咁多，我地即刻去搵Stephen啦…」
「咕~~」
唔？咩聲？
就係我諗緊我聽到既係乜野聲個陣，我見到Elaine既面前彈左一個訊息框出黎。
「飢餓狀態」
雖然佢好快就閂左，但我都係睇到。
我：「eh…洗唔洗食d野先呀你？」
Elaine：「唔洗…我地快d行啦都係，我唔想…」
「咕~~~」
咕一聲，為對話帶來又一次既沉默。
我：「算啦我地都係去食d野先啦，我記得飢餓狀態下係會扣HP架，食少少野先去都唔會差好多時間啫。」
Elaine：「咁好啦，就去m記食少少野先啦。」
就係咁，我地兩個就去左M記食野，不過都係得佢食，因為我一早已經食左早餐。
令人意外既係，佢食野個陣既樣同平時好唔同，食得好激動，好似餓左好耐咁。
佢而家個樣令我諗起第一次同佢係操場傾計既情景。
咁睇佢的話，有小小可愛…？
Elaine：「個邊…咩事？」
佢一邊咬住個魚柳包一邊指住我身後講，表情仲相當困惑咁。
亦因為咁，我望左去佢指既方向，見到有一班人係度嘈緊。
Elaine：「過去睇下咯我地。」
唔知幾時佢已經食完佢個魚柳包，連薯條都清乾清淨。
我地兩個慢慢咁行埋去人羣度，最後見到五六個MK仔係度同一個阿婆嘈緊，地下仲有一盤薯條同汽水。
MK仔A：「喂阿婆，你淋到我個frd，呢筆點計先。」
MK仔B：「賠錢啦。」
MK仔C：「影低佢，放上Facebook！」
我：「喂，我地唔好咁多事啦，快d去搵Stephen啦。」
Elaine：「唔係，呢個係任務黎，你快d去做。」
佢講完就遞左佢部電話比我，上面有幾行字。
「隨機任務23」
「任務內容：請解救老婦人」
「請按下「接受」以領取任務」
「接受」掣…呢個啊？
Elaine：「喂，用你自己部電話接呀。」
我：「呀係喎係喎，唔好意思呀。」
我尷尬地交返部電話比佢，之後拎返自己電話出黎「接任」。
一接受左呢個所謂「任務」，個幾位MK仔頭上即刻多左個紅色既箭頭，而個阿婆頭上就有綠色既箭頭。
綠色同紅色…係用黎區分敵我呀？算啦，都係先上去分開佢地先啦。
我穿過人羣，走到去佢地中間，分開左佢地。
我：「咪蝦個阿婆啦，你班人知唔知醜架。」
我既一句說話，引起騷動，特別係班mk仔。
MK仔A：「關你撚事呀，死開啦傻鳩！」
MK仔B：「影低埋你，放上FB，正義使者WOW~~」
我：「成班低能仔。」
我一時忍唔住，衝口而出。
呢句說話好唔好彩咁比佢地聽到，佢地聽到之後好大反應，喊打喊殺咁。
平時既MK仔都只係得把口，最多係嗌「黎吖黎吖」，估唔到呢班MK仔真係會郁手，有兩個衝左埋黎。
不過好彩我細個有學過八極拳，只係隨便咁揮拳同踢腿，就將來犯既兩個MK仔打左返去。
有一個仲比我唔小心咁打中個肚，係度碌下碌下。
MK仔C：「算你好野！過馬路睇車呀仆街！」
嗯，佢一邊講一邊帶住佢其餘既朋友走，場面相當好笑。
咁…係咪代表任務完成架啦？
「後生仔，多謝你幫阿婆…呢度小小意思，當係阿婆既謝禮啦。」
屌，個阿婆突然係我背後講野，嚇左我一跳。
我：「哦哦，唔洗客氣呀阿婆，我應該做既。」
講係咁講，我仍然好老實咁收左阿婆比我既一百蚊。
「任務完成。」
「獲得經驗值：300。」
「Level Up！」
「Level 1 -> Level 3」
「恭喜您，你有新功能解鎖！請點撃「繼續」以查看新功能。」
呢一連串既對話框突然係我面前彈出黎，我一時之間都唔知點處理好。
「繼續」…呢個呀？
當我想㩒落去個陣，有人捉住左我隻手，阻止左我。
而呢個人，係Elaine。