「冒險」「生存」《香城之夢》: 接觸

槍…我居然要用槍…
 
以前打機用槍用過千百萬次，咩Call of Duty，Battlefield，CS:GO我全部都有玩過，但咁樣係現實用自己對手拎住支槍真係第一次。
 
呀唔係，呢個都唔係現實，呢度都係game。
 
好喇，要快D喇，要係對方未發現我地之前落手。
 
我緊緊咁拎住支槍同把刀，準備離開後樓梯。
 




就係我準備拉門出去之際，我feel到有人拉住我條褲。
 
仲可以有邊個？咪就係Elaine佢囉。
 
我：「喂做乜呀你快d放手啦！」
 
當然，我係好細聲咁講啦。
 
Elaine：「你要去邊度？」
 




我：「梗係要去會一會個個人啦！」
 
Elaine：「唔好扔低我一個…」
 
唉屌…佢到底咩事呀。
 
我：「咁你自己慢慢咁跟住係我後面啦，我地無乜時間架啦。」
 
我無再理佢，自己輕輕力咁拉開道門，行到去走㾿。
 




一行到去走㾿，我就即刻舉起支槍，指向走㾿既另一方。
 
因為對方就咁企左係度，同我四目交投緊。
 
「舉高雙手。」
 
我好自然咁講左呢句野出黎。
 
對方既反應亦比我預期中冷靜，佢臉上毫無驚訝之情，好自然咁舉起自己既雙手。
 
而家咁仔細睇佢，原來對方係一個大我地好多既男人，我估至少有三十歲。
 
男：「冷靜d，我黎無惡意，只係想搵你地傾下。」
 
好熟悉既對白，睇劇成日見。




 
Elaine係呢個時候亦慢慢咁靠住牆行行到我旁邊，面色仍然相當差。
 
個男人都注意到Elaine，仲講左一句說話。
 
「兩個都只係細路啊…」
 
我唔知佢呢句說話有何用意，但我馬上提高警戒，將手指放上板機上。
 
佢都注意到我既動作，即刻開始緊張起黎。
 
男：「我係一個私家偵探！我只係想接觸你地，得到更多有關呢個《香城之夢》既資料！我真係無惡意！」
 
私家偵探…？
 




我始終對佢既說話有所保留，但我同時又對佢所謂既「資料」好有興趣，想知道佢查到d乜。
 
呢種矛盾黎得非常唔合時候，令我一時間唔知應該點做好。
 
就係我猶豫不決既時候，Elaine佢開左口。
 
「話比我地知，你查到d乜野。」

佢一句說話，換黎全場人既沉默。我甚至連冷氣機既聲都聽到。
 
過左我估大概兩分鐘左右啦，對方終於有反應。
 
男：「好啦，我就話比你地知我知道既所有野，我而家會開d野出黎，如果你地覺得我有乜可疑，可以隨時開槍。」
 
唔洗你講，我都會咁做。




 
之後佢拎出一本記事本，拋左過黎我地呢邊，Elaine執起左，開始查閱入面既內容。
 
至於我，我就負責繼續用槍指住個位「私家偵探」，以防佢突然發難。
 
同埋Elaine既分析力比我強得多，所以都係交比佢睇好過。
 
係自己旁邊不停傳黎揭紙既聲，愈聽就愈好奇，好想快d知道本筆記到底寫左d乜。
 
不過，揭紙既聲突然就停左。無再聽到。
 
出於好奇，我終於望左過去Elaine個邊，見到佢好專心係度睇緊一個表。
 
個表有好多野，仲有好多野圈住。
 




Elaine：「你係短短一星期時間內就查到咁多野同整合到結論出黎..？」
 
一星期，一星期係我地黎到呢度既時間。
 
Elaine會咁驚訝，唔通呢個人查既野真係好有用？
 
男：「當然啦，我都話左我係一個私家偵探咯，呢d事係我專業黎。」
 
Elaine：「咁你呢度寫住「啤牌」係…」
 
男：「你地都應該有收到過張啤牌？我指係入黎之前。」
 
我：「嗯，連埋封信一齊寄過黎。」
 
男：「無錯，但呢張啤牌既用意係邊？同埋玩家既人數仲有揀玩家既理由，呢幾樣只要搞清楚同連埋一齊，我相信就可以解開呢個《香城之夢》既迷團。」
 
「所以，請你地助我一臂之力，為左所有係呢個世界既玩家，拜託你地。」
 
聽落佢既說話非常合理，亦非常令人鼓舞，覺得佢既野係正確。
 
都應該要幫佢既…反正我地既目標都係一樣…
 
我同Elaine交換左一下眼神，亦確認左佢同我既想法一樣。
 
我：「好，我明白喇，一於合作啦。」
 
我放低左一直向住個個男人既手，以示友好。
 
男：「多謝你地，不如我地換個地方再傾，呢度始終…」
 
佢一邊講一邊慢慢行過黎，表情好似輕鬆左唔少。
 
Elaine：「嗯，我同意，去搵一間café再傾啦我地。」
 
男：「好，我請啦，我仲有有關升級之後既機制想同你地講下。」
 
佢講完就㩒左𨋢，行到去我地旁邊。
 
啊係，收返埋枝槍先。
 
「嘭！」
 
槍聲！？咩事！？
 
我好肯定唔係我支槍走火，咁唔通係！？
 
「吖！！！！」
 
Elaine既尖叫聲，令我知道佢仍然安全。
 
但係，係佢旁邊既個位偵探先生就訓低左。