「冒險」「生存」《香城之夢》: 死亡

我地第一時間就衝左埋去佢身邊，想話睇下佢既傷勢。
 
只見佢捂住自己條頸，打算阻止出血，但血仍然不斷咁湧出黎，使得佢面色蒼白，望落非常虛弱咁。
 
我第一個反應係想報警叫救護車，不過當我打算㩒落去個陣，佢突然開聲。
 
「唔洗打啦…太遲喇。」
 
的確，中槍既位置加上咁既出血量，就算救護車即刻就到都好都無乜可能救得返。
 




「對方應該未走…你地小心D…如果唔係你地都可能會遭殃…」
 
係喎！一切黎得太突然都無時間理係邊個襲擊我地添。
 
我望去窗邊，睇住個個穿左既窿。
 
如果頭先個槍打偏少少的話…
 
「係喇…你地拎埋呢d野去喇…應該可以幫到你地…」
 




佢一邊講一邊㩒出林林總總物品係自己身邊，㩒到滿地都係。
 
堆物品入面有好多都係我從未見過既野，特別多係一堆奇怪既水晶。
 
出於好奇，我隨手拎起左一個黑色既水晶。
 
「隱匿水晶」？呢D水晶係道具黎？有乜用途？
 
「走喇你地…一定要幫我查出呢個《香城之夢》既真相，仲有…」
 




「生存落去。」
 
當我仍然望住舊水晶，無留心聽呢位瀕死既私家偵探既說話既時候，令人意想不到既事發生了。
 
我地三個突然被一道強光所包圍，D光強到將我地同外界完全隔絕，我地完全睇唔到外邊。
 
到強光退去既時候，我地居然去左另一個地方。
 
不過所謂既「我地」，就只係得我同埋Elaine，偵探先生已經不知所蹤。

「呢度係邊度」係我腦入面第一個出現既諗法。
 
我即時爬起身，唔理身邊個堆水晶，槍，只係掛住行去最近既牆。
 
我行到去最近既牆，摸一摸幅牆，望一望周圍。




 
呢度既感覺就好似一個倉庫，周圍都係一個個架，上面放左好多唔同既野，最多既係一個文件夾。
 
唔通我地去左唔知邊度既工廠大廈？到底係點做到？
 
「呢度係…」
 
就係我仍然重組緊頭先發生既事，Elaine突然開聲。嚇到我即刻望左過去。
 
只見佢坐係一邊，叫左個小地圖出黎係度睇。
 
係喎屌，可以用小地圖查位置架嘛，都係Elaine夠聰明。
 
我拍拍手上既灰塵，深呼吸一下之後就慢慢行去Elaine個邊。
 




我：「你查到我地係邊嗱？」
 
Elaine：「嗯…係就係查到，不過好似…」
 
我：「不過乜野呀？等我睇過。」
 
我一邊講一邊挨埋去Elaine旁邊，想話睇下佢個地圖。
 
一睇，我就覺得呢個地形好似似曾相識咁。
 
我：「喂，呢個唔會係…」
 
我指住地圖上既一處，一處同我地而家位置好接近既地方問。
 
Elaine：「係吖你無估錯，如果個地圖係岩的話，呢個係我地學校。」




 
「亦即係話我地而家應該係學校後山公園附近。」
 
學校後山公園附近有個咁既地方架咩…？唔係喎，問題應該係點解我地會黎左呢度先岩！
 
我：「喂Elaine，你…知唔知點解我地突然間會黎左呢度？」
 
Elaine：「嗯？你頭先無聽…無聽個私家偵探講咩，佢話會傳送我地走。」
 
「用呢個。」
 
佢講完就拎起係我地身邊既其中一舊水晶，仲遞左比我。
 
GTA式既game居然會有呢D item…好似有D奇怪咁喎。
 




「結果最後我地連佢叫咩名都唔知，佢就死左了。」
 
死左…無錯，應該死左喇佢…
 
雖然唔係親眼睇住佢死，只但係一諗到一個岩岩仲傾緊計既人突然間比人開槍殺死，我就好唔舒服。
 
隻手仲係度震緊。
 
Elaine：「不如我地出去睇下咩環境？」
 
啊都好，出去睇下到底呢度係咩位置都係一個唔錯既選擇，而且…
 
除左咁之外我而家根本諗唔到應該做乜先好。
 
於是我地兩個就走到呢個倉庫唯一一道門前面，你眼望我眼咁。
 
我：「開架啦喎。」
 
Elaine：「嗯，開啦。」
 
好重。道門好重。我要用盡九牛二虎之力先推得郁。
 
隨著門慢慢咁打開，外面既光亦開始慢慢滲入黎。
 
呢度係…