個日之後過左大約兩個禮拜。
 
呢兩個禮拜我都過得好平凡,好似以前係現實咁生活,每日返學放學。
 
至於Elaine個邊,呢排我地都無專登約出黎見面,只係平時係學校經過會打下招呼咁。
 
只不過大家私底下都有保持聯絡,討論下關於隻game既事。
 
同埋Level個邊,明明我無再去做咩任務,但D 經驗值居然會自己慢慢小小咁加上。
 




正因為咁,我而家已經Level 6了。
 
唔知點解,我覺得而家我地已經走左入一個困局,咩都做唔到咁。
 
到底點先可以安全離開《香城之夢》呢…
 
始終都係要解開之前柔柔講既「個一日」到底係咩意思先得,如果唔係的話我地離開呢隻game既方法就只有…
 
如果到時真係得返我同Elaine,大家會點做呢?
 




我估佢應該會毫無猶豫咁殺左我啦哈哈。
 
「喂,浩賢,去打波囉。」
 
屌,嚇死我諗諗下野突然有人叫我,死人黑仔。
 
我:「嗯,行啦咁。」
 
無錯,呢排既我經常都同黑仔佢地食lunch,打波,好似之前Elaine講既「好似以前咁生活」。
 




可能因為佢地同現實既佢地實在太似,我都開始漸漸放低佢地係「NPC」呢件事,當正佢地係真正既佢地。
 
咁樣過日子,個人真係舒服小小,至少笑都可以真心d,訓覺又唔需要考慮咁多。
 
我:「Hey!波!」
 
咁又一球。
 
阿希:「喂今日狀態幾好咁喎阿賢。」
 
我:「哈哈係咩,好彩啫好彩啫。」
 
佢咁講我先覺,今日射籃既手感好似好左好多咁?明明以前十射九空一撞框架…
 
好似望住個籃就可以射入咁…




 
試下囉不如。
 
我帶住個波,慢慢行到去中圈,擺好個自以為最好既姿勢,一下射左個波出去。
 
不過好可惜,個波並無入到,只係圍住個籃圈轉左兩個圈就跌返出黎。
 
啊,果然只係好彩,我諗得太多了。
 
黑仔:「喂浩賢,差唔多夠鐘啦,拎返個波走人啦。」
 
我:「哦,得啦,喂順手去埋個廁所先返上去。」
 
正當我開始準備行去執波個陣,有一下清脆既入球聲傳入我耳。
 




我望去自己個波應該係既位置,發現個波唔見左。
 
再周圍望望,發現全個操場得一個籃球。
 
就係岩岩被人射入個個,仲有人拎住佢。
 
「唷,Sorry呀同學,岩岩見到個籃球一時手痕,俾返你吖。」
 
偏偏拎住個波既人係佢。
 
藍洛晨。

藍洛晨:「同學?」
 
屌,一時之間一堆記憶湧入,搞到個人呆左添。




 
我:「嗯,唔該你。」
 
我無望住佢,只係一味望住個籃球咁行埋去,想話一拎到個波就走人。
 
我行到埋去,拎到個波,但我帶唔走個波。
 
個波仍然被佢緊緊捉住。
 
我由佢對手開始望上去,最後同佢四目交投,發現佢用緊一個好奇怪既眼神望住我。
 
我:「eh…」
 
藍洛晨:「你好驚我咩同學?」
 




佢突然好快咁彈一句出黎,又一次嚇親我,嚇到我想講D乜都唔記得左。
 
與其話驚,倒不如話我係妒忌佢仲好,咁講更加貼切。
 
點解?算喇都只不過係無聊幼稚既理由啫,唔好講啦都係。
 
我係電光火石之間將呢一切一切都拋諸腦後,好快咁控制好自己既情緒,仲壓低把聲。
 
我:「無呀,只係你岩岩個球射得好靚我先有小小嚇親。」
 
藍洛晨:「唔~~~真係咁咩?」
 
佢用一個懷疑既眼光係度打量我,搞到我好唔自在,感覺好似被人睇通睇透咁。
 
佢好似一部X光機咁睇左我大概三十秒,最後終於向後退左兩步。
 
只但係,佢帶埋個波走。
 
我:「喂…」
 
藍洛晨:「你對眼隱瞞緊D野。」
 
「好喇,我決定左了。你想要返個波的話就係放學之後黎搵我喇。」
 
我:「喂點可以咁…」
 
「登登登登~」
 
藍洛晨:「唉呀,要上堂了係咁先,放學黎搵我啦,你應該知道我係咩班房架。」
 
佢自己講完就一邊拍波一邊走左去,完全無理我反應。
 
豈有此理…
 
咪住先,呢度game黎架嘛?我做乜都得架啦?
 
好!!
 
我用自己最快既速度,跑向藍洛晨,係佢後面一下拍落去。
 
不過,我拍既係個籃球。
已有 0 人追稿