「冒險」「生存」《香城之夢》: 超越

 得左！我終於贏到佢一次！！
 
個籃球係我一掌打落去之後好快就離開左佢手，開始向前飛。
 
藍洛晨：「哦？」
 
喂你同我講笑咋…？
 
面對突如其來既狀況，正常黎講應該唔會有人反應得切。
 




但偏偏佢就反應到，一下就緊緊咁捉住個波，之後仲好瀟灑咁掟左個波上天，用另一隻手接返。
 
我睇到成個人呆左，因為實在太不可思議。
 
藍洛晨：「呼，真係好險呢。」
 
「你叫咩名呀同學。」
 
佢突然回頭問我。
 




我：「阿賢。」
 
我嘗試冷靜咁答佢，但始終唔得，我把聲同對手都係度震緊。
 
因為佢用一個好恐怖既眼神望住我，一個好似想殺人既眼神。
 
藍洛晨：「有意思，放學見啦我地。」
 
佢講完之後就好似頭先咁，自己一個行左去樓梯既方向。
 




「啊，好似又會有麻煩野添，哥仔你自己小心啦吓。」
 
有一個人係經過我身邊個陣對我拋低呢句說話，之後就怱怱咁跑左去藍洛晨個邊。
 
係全部人都離開哂籃球場之後，我既身體先郁得返，手腳亦無左震。
 
估唔到一個籃球居然會將一個我最妒忌既人帶到黎我面前…
 
點算好呢…

我一直係度諗呢個問題，一邊諗一邊係學校度行，旁若無人咁款。
 
直頭連有人叫我我都聽唔到，係被人撞左一下我先回過神。
 
「好痛…」




 
我：「啊唔好意思，我一時…車，原來係你啊。」
 
我所講既「你」，就係都有好耐無直接傾計既Elaine。
 
Elaine：「搞錯呀你，行路唔帶眼架？」
 
我：「我一時分左神啫，唔洗咁講野既。」
 
Elaine：「同你講下笑啫，有乜令你分神呀？」
 
哇，做乜野佢d態度突然變左咁多，突然語氣咁溫柔令人好驚喎。
 
我：「eh…是咁的…」
 




我一五一十咁將成件事咁講哂俾佢知，包括藍洛晨佢射籃，叫我放學去搵佢拎返個波，仲有神反應救波，全部都講哂出黎。
 
明明件件事都好出人意表，超乎常人想象，但Elaine聽完完全無一絲驚訝，表情仍然相當平靜。
 
搞到我好似成個白癡咁。
 
Elaine：「講完架嗱？」
 
屌。
 
我：「你唔覺得成件事都好突然咩？突然到好怪喎！我同藍洛晨完全唔識，但佢居然無啦啦撩我喎！」
 
Elaine：「咁佢就係一個咁既人黎架啦，佢咁出名你應該都知道佢份人架。」
 
佢咁講又岩既…「藍洛晨」呢個名係我地呢堆學生心目中從來都係好難捉摸，完全唔會按常理出牌，而且難以接近，高深莫測。




 
佢鐘意做乜就會去做，其他人完全阻止唔到，呢點亦非常出名。
 
但係偏偏會揀中我，硬係覺得有D古怪。
 
Elaine：「呀不過你估呢個會唔會都係任務既一種？」
 
我：「任務？你話咁都係一個任務？」
 
Elaine：「唔出奇架，嗱你諗下啦，呢隻game可以將我地身邊所有人都變成NPC，咁利用佢地去創造各式各樣既任務都唔係難事吖。」
 
我：「言下之意即係你覺得我應該當係任務咁去搵藍洛晨？」
 
Elaine：「除此之外你仲有得揀咩？你唔怕比你D friend屌？」
 




啊，咁又係，佢岩。
 
我：「話時話，呢個鐘數你係度做乜？唔洗上堂？」
 
Elaine：「本來想早退既，不過而家唔啦。」
 
我：「點解？」
 
Elaine：「想睇你超越藍洛晨嘛哈哈。」
 
超越佢…？我可以？
 
唔係可唔可以，係一定要。