「冒險」「生存」《香城之夢》: 裝備

「為左保護自己，我地要買一堆裝備去傍身。」
 
無錯，呢句野又係Elaine講既。
 
雖然我知道佢咁講係岩，但係另一個事實我亦同時好清楚。
 
哪有錢？
 
話就話我而家已經Level 7，但系統顯示我只係得幾千蚊，就算加埋我自己既積蓄都係唔夠一萬蚊。
 




大家玩開GTA既都知道，武器裝備既野一定要多先夠用，但要多亦即係要多錢啦。
 
Elaine方面好似無問題，都唔知條友之前做過咩任務，聽佢既口氣，用十萬八萬去買裝都好似完全唔係問題咁。
 
佢甚至問我洗唔洗買埋我個份，我當然即時拒絕啦，我唔想咩都靠哂佢。
 
雖然而家無錢，之但係我並無放棄買裝備既念頭，所以我決定去搵錢！
 
如果係現實想短時間內搵咁多錢，我估除左去做鴨同打劫之外都無其他方法。
 




不過！！我地而家身處既並唔係現實！呢度仲有好多方法搵錢既。
 
我搵左個任務list，發現當中有幾個任務叫做「糖果快遞一，二，三」。
 
任務內容只係遞送一個名為「糖果」既包裹，可以話簡單不過。
 
而且回報亦相當可觀，做一次就已經有七至八千蚊。
 
咁吸引既任務，我係短短既數日重複做左幾十次，好快咁儲左一大筆錢，與此同時我亦察覺到一d有關呢個世界既野。
 




不過而家唔係講呢d事既時候，我地需要先裝備好自己先。
 
屌，講係咁講，但幾日內跑十幾廿轉都咪話唔攰，都係休息返一日，聽日先去Stephen度買野啦。
 
就係呢一下倦意，令我地既計劃打亂哂。
 
第二朝，我去左搵Stephen，自己一個去。
 
Stephen：「喂哥仔，乜你又係自己一個人黎呀？同你位靚女朋友嗌左交呀？」
 
靚女朋友？佢指Elaine呀唔通？
 
我：「嘩我地黎過一次咋喎？你咁都認得我？」
 
Stephen：「嘻，我出名記性好，如果唔係點一個人打理好呢間鋪。」




 
「而且個位小姐成日都黎，所以我好有印象，佢尋日定前日先黎過咋嘛。」
 
成日黎呢度？
 
Stephen：「講返正經野先，今日黎有乜幫趁？」
 
啊差D唔記得我係黎做乜架添。
 
我：「無，想話黎買小小裝備防身啫。」
 
Stephen：「唔…你呀…你自己有無咩心水吖？」
 
我：「呃，或者我自己睇下先啦唔該。」
 




Stephen：「好咁你慢慢睇，有乜需要就叫我啦。」
 
我：「好，唔該哂。」
 
之後Stephen就離開左櫃檯，行左去後面執野。而我就打開個List，睇下有乜賣。
 
上次睇左「裝備」，今次就睇左「武器」先啦。
 
手槍我有啦，今次睇下步槍先。
 
嘩都好多款下喎點揀好呢，咁多個名我只係識AK-47同M4咋屌。
 
屌，都係買左D手榴彈，護甲個D野先啦。
 
我左㩒下右㩒下，槍都未買錢已經無左一大半了。




 
不過而家有咁多手榴彈同C4係身，感覺自己成個恐怖分子咁，俾警察搜身搜到都唔知點算。
 
啊…仲要買槍…買哂之後我就真係成個危險人物咁喇。
 
Stephen：「喂哥仔，我醒起有D野應該幾岩你，過黎呢邊睇下。」
 
個阿叔突然係櫃檯後面大叫，嚇到我即刻抬起頭。
 
成間鋪得我一個客，佢應該係叫我？
 
我戰戰競競咁穿過櫃檯，行到去飾櫃後面，嘩。
 
呢度居然連靶場都有？
 




Stephen：「嘿，呢箱野應該岩哂你，唔洗咁頭痕啦。」
 
佢一邊講一邊打開係佢面前既一個箱，入面有幾支唔同既槍。
 
「FN F2000突擊步槍，P90衝鋒槍，M110 SASS，仲有雷明登870，呢四款應該夠你防身夠突架啦。」
 
呢四枝槍有三支我都有印象，以前打機都有用過。
 
不過而家既我可唔可以好似打機個陣咁用到呢D槍呢。
 
Stephen：「可以試下喎。」
 
我：「真係可以？麻煩你啦。」
 
Stephen：「當然可以，你等我一陣。」
 
就係咁，我拎住支F2000行左去靶場counter度。
 
支槍…無想象中咁重喎。
 
Stephen：「可以開始喇，隨便試喇，試槍唔洗錢既。」
 
我：「咁我就唔客氣啦。」
 
奇怪啦…我居然…
 
「物品已成功添加至您的物品庫。」
 
Stephen：「多謝幫趁，歡迎下次再黎，啊係呀見你買左咁多野，我送左樣新貨比你，你可以自己check下。」
 
我：「哦哦…多謝。」
 
嘩咁好人既佢，買野多會有野送，而且價錢又平。
 
好喇，防身用既野就買好了，都係時候同Elaine傾下我呢幾日發現到既野。
 
「叮噹~」
 
𨋢門開了。
 
「Boom!!」
 
What The... Fuck?