「冒險」「生存」《香城之夢》: 相遇

信和…應該係咁架咩…？
 
我所認知既信和，係就係好嘈，但最多嘈既係人聲同車聲，唔應該係呢d聲架喎…
 
槍聲…爆炸聲…居然會係呢度聽到…
 
換轉係平時，我肯定會以為係拍緊戲，但我個腦話我知，而家唔係拍戲。
 
我即刻黎個反智轉身，匿係排𨋢掣個位度，再用連自己都感嘆既速度召出物品list，著上岩岩買既護甲。
 




我先唔想就咁死係呢度。我仲想返出去出面既世界架。
 
喂屌，點解D槍聲愈來愈近？
 
喂屌，點解道𨋢門仲唔閂埋？
 
我一直係度㩒個閂門掣，但度門就係唔閂埋。
 
不過突然間，頭先個把好近既槍聲突然就停左。
 




「喀嚓。」
 
玩完了。
 
「嘭！」
 
咦？點解…我仲聽到聲既？
 
而且…我feel唔到任何痛楚喎。
 




我慢慢張開頭先因為太驚既合埋左既雙眼，望下自己既身體，發現自己無穿無爛。
 
我再望下𨋢門，發現有條友訓左係度。
 
正確黎講，係有條屍係度。
 
「喂，你話哂都係個玩家，係度匿埋有乜意思？」
 
有把女聲？
 
我抬起頭，發現條屍後面仲企左個人。
 
係一個女仔，望落應該同我年齢差唔多，樣就…我唔識點形容，幾好喇我估。
 
不過呢D都唔係重點，重點係佢拎住支槍。




 
「係呢個可以做乜都得既世界，點解只係諗住點樣可以離開同生存落去？」
 
佢講完呢句之後就向右邊再開左幾槍，之後更行開左。
 
而我？我只係呆左咁係度望住眼前個條屍。
 
屍體並未好似我地平時玩GTA咁消失，而係一直存在係度。
 
我眼前呢條屍，死相可謂相當慘烈，口張開，瞳孔放大，仲要滿臉都係血。
 
我望到咁並唔覺得恐怖，更恐怖既我都見過，甚至已經係眼前。
 
就算話而家係遊戲既世界入面，但係呢一種逼真感下都可以落到手咩…
 




我一個人係𨋢入面思量呢個問題，就連槍聲已經停左我都留意唔到。
 
 「仲係度既你？我仲以為你已經走左添。」
 
嗯，無錯又係頭先果個女仔。
 
我：「你到底係…」
 
女：「係喎我未自我介紹添，我叫…」
 
「大家姐！警察黎喇！我地要走喇！！」
 
女：「好！而家黎！打埋比Leo，叫佢幫我地處理好呢度d野！」
 
「唔好意思呀我要走喇。」




 
佢講完就轉身走人，我唔知點解諗都無諗就追左出去，終於離開左部𨋢。
 
只係，我一踏出𨋢就停低左腳步。
 
因為有十幾人一字排開咁企左係信和門口，亦即係果個女仔行緊去既方向。
 
呢十幾個人個個荷槍實彈，直頭好似武裝集團咁。
 
令我卻步既野仲唔只呢樣。
 
滿地都係屍體。
 
我一時之間完全唔記得自己想講D乜，只係呆左咁望四周圍既屍體。
 




「我地好快就會再見架喇，浩賢。」
 
佢拋低呢句野之後就一行十幾人上左幾架車，絕麈而去。