「冒險」「生存」《香城之夢》: 安心

之後點？之後一大堆警察黎到，將成個信和封左，仲帶左我呢個唯一一個生還者返去差館問話。
 
佢地當然無辦法係我身上查到任何野啦，因為我根本就咩都唔知。
 
不過有個警察問左一個問題令我非常在意。
 
「點解佢地偏偏唔殺你？」
 
我都想知。
 




明明佢都知道我係玩家，點解唔直接殺埋我？正常玩家應該儘可能剷除其他玩家先係架喎。
 
佢仲好似話過咩我地好快就會再見…到底係咩意思呢..
 
係喎佢係點知道我叫咩名架！？
 
阿Sir：「係度簽埋個名你就走得喇。」
 
我：「唔該…」
 




阿Sir：「啊係，你屋企人係出面等左好耐。」
 
屋企人？哦…
 
我並未將呢位阿Sir講既野放係心上，因為實在有太多野需要我去諗。
 
呢排個腦好似無一刻可以休息咁，問題一個接一個咁出現，但一個都無解決過。
 
我已經有三次幾乎無命，係三次。
 




之後仲會有幾多次呢D經驗呢？我都唔知。
 
但可以的話，我真係唔想再有呢D經歷。
 
以前打GTA個陣成日屠城，覺得咁樣好正好好玩。
 
但原來當自己親臨其境個陣，先會發現原來呢個行為係幾咁恐怖。
 
睇怕我出返去之後都應該無辦法玩到GTA類型既Game了。
 
啊，撞到人添。
 
我：「唔好意思…」
 
屌，原來係阿媽。




 
我：「可以走…」
 
我只係講左三個字就已經無再講落去，因為我見到阿媽係度喊緊。
 
佢仲一掌打左我個頭度，打到我幾鬼死痛，我仲好清楚見到自己HP扣左一小格。
 
我無駁嘴，只係慢慢咁托返起頭望住佢。
 
四目交投個一瞬間，佢就攬住左我。
 
黎左呢度咁耐，第一次感到安心既地方居然係警署，有小小諷刺。
 
唔係，應該唔關事既，重點係個人。
 




好似真係係阿媽既懷抱入面咁…
 
總算遇返一件好事啦…
 
之後阿媽幫我向學校申請左短期休學，學校方面亦無過問原因，我估大概係因為新閒已經不停咁報導呢件事，唔需要再解釋。
 
至於我阿妹，阿媽擔心因為我既事令到阿妹佢返到學校會被人騷擾，所以都幫佢請左假，順手叫佢照顧我。
 
無錯，咁就益左佢啦，可以唔洗返學留係屋企煲劇。
 
我：「屌你較細聲D啦好無…」
 
妹：「咩啫，人地悶吖嘛，睇劇都唔俾咩。」
 
我：「無話唔俾，只係…唉，算啦我真係寧願你去返學好過，反正我又無穿無爛，都唔洗人照顧。」




 
一聽到返學兩個字佢即刻變臉，變到好委屈咁。
 
妹：「唔好啦哥哥，你俾我留係度照顧你喇~~」
 
我：「你真係咁唔想返學咩？你係學校應該有唔少朋友架。」
 
妹：「朋友係唔少既，不過D男仔成日煩住哂個下搞到我唔想返嘛。」
 
我：「串！唉唔理你啦，我去訓返陣先。」
 
妹：「嘻嘻，有咩要幫手記得叫我呀哥哥~」
 
唉真係無佢咁好氣，好喇去訓多陣先。
 




就係我係梳化起身個一下，鐘聲就響起。
 
邊個？
 
會唔會係之前係信和果個女仔？我記得佢話過我地好快就會再見…
 
頂，點解我隻手係度震緊…
 
妹：「做乜成個人呆左係度，唉等我去開門喇。」
 
我連「唔好」呢兩個字都未講到出口，阿妹已經跳下跳下咁行到去門口。
 
只可以面對嗱..？
 
我用另一隻震得無咁犀利既手，用我最快既速度打開物品清單，打算拎把手槍出黎。
 
妹：「咦你黎探我阿哥呀？」
 
係指尖就快㩒到「使用」掣既一𣊬間，我又停低了。
 
因為到訪既人，係Elaine。
 
突然間，成個人放鬆哂。