「冒險」「生存」《香城之夢》: 混亂
搞咩呀？用黎識別玩家身分既標記居然突然無左！？
阿叔：「咩事？係咪我有乜問題？」
係喎，因為我同Elaine本身已經遮蔽左玩家身分，所以阿叔先唔知發生咩事。
我：「你頭上個綠圓無左。」
阿叔：「係啊？咁就要同大佬報告先得了。」
「咦？點解無訊號既，你兩個既電話呢？」
我同Elaine聽到之後都即刻拎自己個電話出黎睇，但都係一樣，一格訊號都無。
我地將呢個情況話左俾阿叔知，阿叔知道左之後即刻面色一沉，係個袋拎出對講機，打算嘗試同其他人取得聯繫，但都係失敗。
面對呢個情況，大家都沉默左一陣。
阿叔：「雖然咁做並非大佬計劃之內，但我諗我地三個而家應該都過埋去，同大家會合好D。」
Elaine：「贊成，呢個的確係目前最好既辦法。」
係既，如果有乜事都有多D人互相照應，都係好事黎既。
我：「咁我地行啦。」
阿叔：「咪住先，係行之前你地都係拎定把槍出黎好D，唔知過到去會點。」
拎槍…
雖然唔係好願意，但呢一刻我都無其他選擇，唯有拎出步槍，乖乖咁跟係阿叔後面。
係跟住阿叔既時候，我偷偷咁望左Elaine一眼，佢手執一支散彈槍，眼神仲非常堅定，好似已經知道之後會點咁。
如果佢見過個一次信和既現場，仲可唔可以好似而家咁呢…
我地行呀行，落返地面穿過屋苑，行到去上另一個屋邨既一段斜路。
呢段斜路既霧比其他地方都要深，日頭見到既屋邨同商場而家被霧濃濃罩住，完全睇唔到。
阿叔：「奇怪，大佬佢地應該係呢度附近架，但附近都無玩家反應既？」
唔通…
我：「可能係任務開始個一刻，所有玩家既身分都被隱藏左，目的應該係…」
有槍聲！？
就係我嘗試同阿叔解釋目前既情況既時候，斜路既另一端就傳黎多種唔同既槍聲。
阿叔：「跟我行！快！」
係阿叔既命令下，我同Elaine仲有阿叔三個人開始奔向槍聲傳黎既方向。
愈跑上去，槍聲就愈接近，已經可以分辨出有多種唔同既槍聲存在。
可惜既係濃霧仍然圍繞係我地身邊，我地根本無辦法睇到全景。
不過幾乎行到上去最高點既時候，我隱約見到D野。
我見到幾處火光，仲有幾架車。
我即刻將我所見既話俾阿叔知，阿叔亦好快咁確認左，叫我地好好咁跟係佢後面。
我地一步一步，慢慢咁接近其中一架車，當距離架車仲有差唔多十米既時候，阿叔突然一個箭步跑架車度。
我同Elaine都有D不知所措，只好慢慢咁跟上，但行左兩步就聽到阿叔大叫：
「你兩個！快D跑過黎！」
身體好自然咁做出反應，保特上身咁跑左埋去再烏低身。
原來車邊除左阿叔之外仲有三個人，都係L既人，佢地全部都拎住槍，向濃霧既另一邊掃射。
我：「發生咩事？做乜大家都係度向霧開槍？」
Elaine：「L呢？佢應該係度架？」
阿叔：「我地俾人襲擊！大家都走散哂！你地做好準備！我地一陣要一口氣衝入去商場！」
阿叔用手勢指一指我地既右手邊，示意我地一陣要去既地方。
阿叔：「我數三聲，一齊跑過去！跑過去個陣一齊向霧開槍，有無問題？」
我點一點頭，然後就緊緊揸住手中既FN2000。
冷靜D，我得既，好簡單架啫。
「三！」
「二！」
「一！」
「跑！」
阿叔係講個跑字既同時向霧既方向掟左個手榴彈，之後就開始跑起上黎，我地全部人都跟隨佢既步伐一齊跑。
我並無忘記阿叔叫我做既野，我跑既時候拎住支槍對住霧既方向掃射。
但係，當我扣下扳機，子彈並未射出。
情況危急，我無去探究問題出係邊度，只係繼續跑，好快我就隨大叔尾跑到入商場。
個心跳得好快，仲不斷咁喘氣同流汗。
我發生咩事…
阿叔：「大家做得好，先換好彈夾之後再決定下一步點做喇。」
聽到阿叔既指示之後大家都開始為自己既槍械更換子彈，而我就只係呆呆咁企係一邊。
因為我根本一槍都無開過，無需要換子彈。
不過就係我發呆既時候，阿叔行左埋黎我身邊，仲拍左我膊頭一下。
阿叔：「槍呢，唔打開保險栓係用唔到架。」
佢一邊講一邊伸手向我支槍度，拉左保險栓一下。
「喀擦。」
「你已經做得好好，不過下次要保護你珍惜既人既時候唔好唔記得呢一點啦。」
佢講完就慢慢行返去佢個幾位朋友個邊，開始討論緊D唔知咩。
Elaine：「浩賢？」
如果我老豆可以好似呢個阿叔咁就好…
Elaine一聲就將分左神既我拉左返黎。
我：「啊，Sorry係咪有咩事？」
Elaine：「無呀見你呆左咁以為你有咩事咋嘛，你有無受傷？」
我：「我無事，你呢？你有無受傷？」
Elaine：「我都無事，si..」
佢講講下突然面色一變，仲伸手去摸佢隻小腿。
佢個對白皙既小腿上面有著鮮紅色既血，兩者形成相當強烈既對比。
我：「你中槍？」
Elaine：「唔係吖，應該係頭先踎係車邊既時候擦傷左咋，我無事架。」
話就話無事啫，但咁樣真係有D睇唔過眼…
我係後褲袋拎出一包紙巾，半跪係地下咁幫佢抹走佢小腿上既血。
但睇黎呢個舉動似乎嚇親左佢，佢好慌張咁向後退左兩步，係差左未拎住散彈指住我。
Elaine：「你你你你做咩呀！？」
我：「可以做咩啫，咪幫你清潔好d血跡囉，成腳都血你唔覺得核突架咩。」
Elaine：「我自己…咁麻煩你喇…」
奇怪，無啦啦改變主意都有既，不過算啦。
我之後好快咁抹走哂所有既血跡，再係銀包拎左兩塊膠布出黎，貼係佢個傷口上面。
我：「而家無红藥水係手，只可以咁啦，你返到屋企自己再滴兩滴紅藥水啦。」
Elaine：「唔該…你都好熟手下…成日咁照顧女朋友？」
我：「講笑咩我A0黎架，只係細個照顧阿妹照顧得多啫，同埋呢D野咁簡單啫，邊有咩熟手唔熟手架。」
「好啦我而家過去搵阿叔佢地喇，你跟埋黎？」
Elaine：「當然。」
之後我地兩個就歸隊，準備好下一步行動。
阿叔：「唔？返黎啦？阿妹無事吖嘛？」
Elaine：「嗯我無事，我地下一步應該點做？」
阿叔：「好，咁我而家講埋比你兩個知啦，情況突然變得混亂，好多預計之外既事出現左。」
「頭先駁火既人既身份係咩我地仲未搞得清楚，但佢地並無追到入黎商場，至少無出現係我地眼前啦，我大膽D估係因為佢地想利用濃霧行動。」
「即係話只要我地係無霧既室內就應該安全，暫時就留係呢個商場先啦，等我地同到大佬聯…」
「喂阿勇！」
係阿叔講講下既時候，突然有一把男聲傳我地既樓上傳黎，阿叔佢地四個即時舉槍指向聲音傳黎既方向。
不過，佢地就放低左槍，仲面露笑容。
阿叔：「喂阿權阿輝！你地都無事呀？」
原來係自己人，太好啦。
男：「我地兩個無事，大佬係樓上超市呀，你地都快D過黎啦！」
知道左L係邊！？