「冒險」「生存」《香城之夢》: 困局

L：「俾多份我！」
 
「係既大佬！」
 
發生咩事…？
 
我完全被眼前呢片景象嚇到。
 
佢地居然係度食飯？係人地個超市入面？係呢個情況下？
 




唉我都唔知由邊方面開始吐糟好啦。
 
係L準備開始食下一碟野既個一下，佢注意到我地一行八個人。
 
L：「咦你地幾個都無事？太好啦，快D過黎先。」
 
佢好興奮咁向我地招手，我一時之間唔知點俾反應，唯有跟住阿叔一齊行過去。
 
阿叔一行到埋去，就放低左手上既槍，深深咁向L躹左一個躬。
 




阿叔：「好對唔住，我無聽大佬你既指示，自己獨斷咁帶左佢地過黎。」
 
大家聽到阿叔咁講都停低手上既野，望過去L個邊。
 
而L聽完阿叔咁講咩表示都無，只係默默望住低頭既阿叔。
 
正當我見氣氛咁尷尬，想話上前幫阿叔講兩句好說話，L終於開聲。
 
L：「你做得好好，你既判斷好正確。辛苦你啦去休息一陣先喇。」
 




阿叔聽完成句野之後先重新抬起頭，拎返起手上既槍，慢慢行埋一邊自己坐低。
 
我亦係呢一刻同L四目交投，唔知咩原因驅使我行左埋去。
 
L：「Hi，無受傷吖嗎？」
 
我：「無事，但係你地點解會係呢度…」
 
我講既時候故意環顧四周，因為我唔知應該點去問好，總無理由直接問做乜你地成班人係人地超市開大食會架。
 
L：「除左係呢度等之外，我根本唔知應該可以做D乜。」
 
「就係宣布任務開始個一刻，我地身邊突然出現左一堆人，仲襲擊我地。」
 
「好死唔死既係個陣仲無啦啦有勁濃既霧，我地唯有衝入商場，想話拎返D視野。」




 
「襲擊我地既人並無追入黎，我地以為可以鬆一口氣，點知先發現情況根本無好過。」
 
「用黎辨識玩家身份既標印消失左，電話網絡失靈，所有資訊可以話被切斷哂。」
 
「直至而家我都未搵到Team D既人，但又唔可以無謀咁出去…如果唔係可能又會造成損傷…」
 
佢講到相當惆悵且唔甘心，尤其係講到受傷個Part，直頭咬牙切齒咁。
 
我望一望佢身後，發現有兩個人受左傷，包哂紥咁訓係度。
 
唔怪得佢要駐紮啦，原來因為有人受左傷唔方便行動。
 
L：「我真係唔想就咁坐係度等…我一定要得到復活水晶…」
 




佢話一定要得到復活水晶？為左咩要咁執著？
 
Elaine：「你話被人襲擊，咁襲擊你既人係咪玩家？」
 
嘩Elaine幾時行到黎架。無聲既。
 
L：「唔係…佢地係傭兵…應該係有玩家安排…」
 
我：「講起玩家，你係任務開始之前唔係去同其他玩家接觸咩？」
 
「嘭！！」
 
我講完呢句，L佢即刻拍哂檯，神情相當激動。
 
L：「果個玩家個陣唔見左人！」





L咁講完之後大家都靜左落黎，靜到連冷氣既風聲都可以聽到。
 
無人敢開聲，好似個個都係度等緊L做決定咁。
 
L自己都收起左頭先激動既表情，睇黎冷氣成功令佢冷靜落黎。
 
取代激動既係猶豫，就算係我都可以睇得出L而家係一個進退兩難既局面。
 
一方面佢應該好想出去搵佢口中個位玩家，因為對方好有可能係造成呢個局面既人。
 
但另一方面，而家已經出現左唔方便行動既傷員，若然全部人一齊出去，有機會令佢地再受傷或者令其他人都受傷。
 
其實仲有一個方法，不過呢個方法唔應該係由我講出黎，因為…
 




阿叔：「留低三個人陪住阿榮佢地，其餘既就跟大佬你出去搵人啦。」
 
無錯，就係呢個辦法，估唔到會由阿叔講出黎。
 
就算方案已經拋左出黎，L仍然非常猶豫。
 
因為咁即係意味住受傷既兩個係負累，要特別對待。
 
L：「唔可以…得五個人留係度太危險…」
 
阿叔：「咁係為左大家好做既決定，如果唔係我地一直留係度都係無任何進展，而且我地仲有手足未搵得返，佢地既安危都好重要架大佬。」
 
無諗過阿叔心思都可以細密到呢一個地步。完全同佢個副職安真漢子既身體格格不入。
 
係阿叔呢一番進言之後，L睇黎都下定到決心，臉上唔再有一絲既迷惘。
 
L：「好啦，咁我將阿榮佢地交俾你同阿權阿輝，你地三個留係度睇住佢地。」
 
阿叔：「吓大佬但我想同你一齊出去搵人喎…」
 
L：「唔得，佢地要交俾你，呢件事只可以由你去做。」
 
「其他人！跟我走！去搵Team D返黎！」
 
L既指示一下達，在場既所有人都開始行動，全副武裝咁向超市門口進發。
 
唯有我，Elaine仲有被L點名留係度既人未有任何動作。
 
我同Elaine係咪都應該跟埋去，定係留係度好呢…
 
就係我猶豫不決既時候，阿叔行左埋黎，好用力咁拍左我膊頭一下。
 
「大佬就交俾你喇哥仔，你要幫我好好咁保護佢，得唔得。」
 
阿叔面色相當凝重，似乎佢始終都唔放心L咁。
 
我唔知邊度黎既勇氣，一口應承左佢。
 
「嗯，交俾我啦。」
 
然後我就揮䄂而去，跟上L既隊伍。
 
而家既我要做既係…