唔係啊嘛?!雖然我二十歲人都未有初戀,但都未至於會發春夢啊嘛?

我上下打量住眼前嘅少年。年齡,應該同我差唔多。樣貌,五官清秀,仲戴住一副黑框眼鏡,書卷味十足。身高,目測一七六,不過呢樣唔重要。重要嘅係,起身見到側邊訓左個女仔,竟然仲可以咁淡定。

「 你⋯⋯好。我叫做程生,你係?」我向少年微微一笑。

「 叫我嘉伍就得,陸嘉伍。」少年托一托眼鏡,咪起眼咁望住我。

估唔到我發嘅夢竟然咁有獨立性,連跑龍套嘅都有自己嘅名字。





「 你見到我,唔覺得意外咩?」我唔自然咁向後退一退。

明明呢個係屬於自己嘅夢,但我就係好尷尬。呢個男仔又唔係真實嘅,就算俾人知道我同佢共枕,都唔會有啲乜嘢事。佢只係我個大腦虛構岀黎補償我二十年黎形單影隻嘅人物角色黎架喳。

「 驚訝?有乜嘢好驚訝?我都司空見慣架啦。」嘉伍吸一口氣,睇黎真係唔當呢個係咩嘢一回事。

估唔到我夢中嘅角色淫賤不能移。我嘅大腦竟然安排一個咁嘅男仔俾我,唔通我真係咁濫咩?

我不屑咁瞪住嘉伍。





「 你唔好誤會啊。我嘅意思係,阿康成日都無視宿舍規矩,帶好多女仔上黎開P,我以為你係其中一個喳。」嘉伍不知所措地揮揮手。

「 宿舍?呢度唔係你間房咩?」我一時之間未搞清楚呢度嘅情況。

「 呢度係我宿舍間房。如果你唔係阿康邀請翻黎嘅,咁你係⋯⋯?」嘉伍疑惑咁望住我。

我嘅大腦果然冇睇錯人,識得搵一啲有智慧嘅人黎做幻想對象。

「 我係阿康嘅學妹黎架,唔係佢嘅酒肉朋友。」我乖巧咁向嘉伍點一點頭。





「 點都好啦,主任就黎巡房架啦,你快啲走啦。」嘉伍唔好意思咁雙手合十。

呢個明明係我嘅夢,所有嘢都應該係由我話事。只要我想嘅話,主任聽日黎都仲得啦。既然係咁,冇理由唔試下我作為主人嘅權力。

我合埋雙眼,係心裡面默念「 主仼聽日先黎 」嘅字句。當讀到第三次嘅時候,我嘅左手被人牽起。我瞬間張開雙眼,見到嘉伍正拖住我。

「 做咩啊你?」我驚訝咁望住佢。

「 邊個叫你唔肯走,我聽到主仼嘅腳步聲黎近呢邊啦。」嘉伍將我拉到去書枱下面。

「 點會啊?呢個係我嘅夢黎,應該係由我話事。」我唔忿氣嘅放開被嘉伍牽住嘅手。

「 你係唔係傻左啊?乜嘢夢?唔怪得啲人話唔好讀咁多書,原來真係會癡線架。唔好玩啦,被主仼發現會岀警告信架。」嘉伍冇好氣咁望住我。

「 我就唔信。就算被人捉到,我只要由夢中清醒過來,眼前嘅乜嘢主任都會煙消雲散啦。」我推開嘉伍,由書枱下面爬岀黎。





當我企左起身,就見到眼前有一個體形龐大嘅阿叔係我面前。

「 陸嘉伍,你都算大膽啦,孤男寡女共處一室!」大叔用粗礦嘅聲音大喊。

呢個係我嘅夢黎架。程生,醒下啊,快啲清醒過來。我用力拍打自己塊臉,但絲毫冇半點幫助。

大叔向我步步進逼,對我怒目相向。

點解會咁架?點解發個夢都要咁攰? 唔得,個頭又好痛。好痛,痛到好似被人用鐵錘猛擊咁。

頭好痛,好暈。

我下意識跪係地上,雙手緊握住頭部。





「 程生!」嘉伍向我走來,但被大叔一手擋住。

慢慢地,我失去左知覺。
已有 0 人追稿