個晚訓着之後，我穿越左去第二個世界。: 第二章

就係咁，每一個夜晚我都會夢見嘉伍。我並無任何非份之想，純粹係懷住一個好朋友嘅心去相處。

嘉伍係一個讀緊室內設計二年級嘅學生。所以，佢成日都會攞住設計圖俾我睇。每一次，我都會幫佢一齊將模型砌岀黎。砌嘅過程確實係幾辛苦嘅，因為有好多細節要處理。唔知係唔係因爲休息時間都咁疲勞，所以每次我訓醒都會頭痛，嚴重的話仲會發燒。

漸漸地，我習慣左有嘉伍係身邊嘅日子。就好似幸福黎得太突然，我完全忘記左當中奇怪嘅地方，只係想將呢份溫暖緊緊抱係懷裡面。

「 表姐，最近你嘅身體差左好多，要唔要去做一個詳盡嘅身體檢查？」柔風擔心咁望住我。

「 唔洗啦，我係太操勞。我之後會注意一下架啦，呢啲小事就唔洗去睇醫生啦。」我望一望座枱月曆。





原來我同嘉伍已經識左兩個星期，係夢裡面計已經有一年半。同佢一齊嘅時光，令我覺得我係沉睡狀態嘅時間仲長過清醒時候嘅。

「 表姐，你明明係準時十點就寢嘅，無理由身子仲會咁虛架？」

的確，早睡嘅我比起一般人仲要抵抗力差，實在係不合常理。我諗我都要好好休息一下，暫時唔再幫嘉伍砌模型。

「 表姐，暑假就黎完結。我約左聽日同舅父飲茶，不如一齊啊？」 柔風低下頭，迴避同我嘅眼神接觸。

係喎，近排為左可以多啲見嘉伍，大部分嘅時間都用左黎訓教，都唔記得左爸爸已經翻左黎一個星期。





「 我都唔知人地想唔想見我。」呢句確實係我嘅真心話。而家嘅爸爸，仲會接受我做佢個女咩？

「點會唔想啊？冇爸爸會唔想見自己親生女架。」柔風行過黎我身邊拖住我隻手。

「 你都好耐冇見舅父啦。或者呢個係一個機會，等你地兩父女好好咁傾下。」

第二朝早，柔風就拍左我起身。個陣，係九點。

「 表姐，要起身準備架啦。」





「 唔洗咁早啦，你去攞位先啦。」我打左個呵欠。

「 我地要去酒店接舅父啊，快啲啦。」柔風拉我起身。

「 咩話？仲要接？ 于柔風，我肯見佢已經係退左一大步架啦。」我狠狠地睥住柔風。

「 黎啦，你明明就好想見舅父，做乜唔肯承認喎。表姐，要對自己誠實啲啊！」

最後，我都係敵唔過柔風，被佢拉左去酒店門口。本身，我的確係有啲好奇爸爸而家嘅經濟狀況。但見佢每個月都會定期過一筆錢俾我做生活費，應該都算唔差嘅。

「 表姐，舅父而家應該都過得唔錯。唔通台灣啲錢真係易賺啲架咩？」柔風拉住我係酒店大堂亂逛。

呢間酒店應該都有四星，大堂乾淨寛敞。天花吊住嘅水晶燈金光閃閃，升降機嘅等候位附近仲有一個鯉魚池。鯉魚池嘅設計簡單，採用瀑布嘅構念。瀑布從上而下嘅水會直接流入下面嘅鯉魚池。

唔只大堂美觀，酒店內嘅接待員都為整體加左唔少分。一踏入酒店，就已經有接待員想要幫我地攞袋同㩒𨋢。我地實在唔好意思同佢地講係黎白撞，惟有腼腆地坐係大堂嘅梳化上等候。





不過坐左一陣，柔風又跳左起身，拉住我亂逛同隨手翻起架上嘅雜誌。

「 柔風！」遠處傳黎熟悉嘅呼喚。

我同柔風同時望過去，只見爸爸帶點驚訝嘅神情望住我。而跟隨係佢身後嘅，係王小姐同雙兒。

「 ⋯⋯」點解王小姐同雙兒都會係度？呢個唔應該只係我地一家人嘅聚會咩？

「 樂生，好耐冇見。」爸爸走到我面前，遞起年老嘅雙手想握緊我。

「 嗨，又會⋯⋯咁齊人嘅？」我反射性地將雙手放去身後，拒絕同爸爸嘅接觸。

爸爸似乎對我嘅舉動早有所料，只係無奈地向我笑一笑。





「 樂生，我地諗住難得翻黎一次，點都要一家人食餐飯嘅。」王小姐向我微微一笑。

我其實並唔討厭王小姐同雙兒，只係唔認同佢地嘅身份。如果係作為爸爸嘅朋友相處嘅話，我還可以對佢地恭恭敬敬。但我無辦法對所謂嘅「 繼母 」 同「 妹妹 」笑逐顏開。我嘅媽媽只有一個，冇任何人可以代替。

「 欸，我好肚餓啦，不如我地行啦。」柔風打破尷尬嘅氣氛，拉一拉我嘅衣袖。

「 好啊，我預約左酒店嘅專車，係岀面架喳。」爸爸指一指停泊係酒店門口嘅八人車。

路途上，我地五個人都冇講過半句說話。生怕講錯一句，就足以激發起雙方嘅情緒。

呢一餐飯，真係可以食得咁順利？