「 你媽媽子予,的而且確係死於交通意外。不過係之前,佢嘅身體一直都唔好。我識佢個年,係二十二歲。」爸爸深吸一口氣。

「 子予當年係經濟系嘅系花,好多男仔都拜倒過佢石榴裙下。我只係好彩,先可以追到佢。」

「 咁我真係要多謝爸爸嘅『 好彩』,先有而家嘅我。」我向爸爸笑一笑。

「 子予係一個熱愛運動嘅女仔。我同佢一齊嘅時候,佢成日都會拉住我通山跑。游水、劍擊、網球、踩單車⋯⋯全部都係我地嘅例行活動。」

「 爸爸同媽媽嘅運動咁好,無理由我遺傳唔到架?」我疑惑地望住爸爸。





「 可能係因為之後嘅事。」爸爸嘅臉色變得沉重。

「 27歲個年,子予嘅身體突然變得好差。佢會無故頭暈,一教訓醒仲成日發燒。」

無故頭暈,成日發燒?

「 媽媽係唔係有隱疾?」

「 唔係。我地去睇過醫生,但驗身報告證實子予並冇任何唔妥。」





「 媽媽係唔係只係過於操勞?」聽到媽媽嘅情況,我不自覺地諗起最近嘅自己。

「 我地起初都以為係。但對於經常做運動嘅子予黎講,咁嘅情況並唔正常。之後個幾個月,子予嘅身體雖然有改善,但佢成日都會覺得好攰。愈攰就愈需要訓,愈訓得多就愈攰。慢慢地,佢昏睡嘅時間愈黎愈長。」爸爸苦惱地搓一搓眉頭。

「 我地兩個都束手無策。曾經以為,我會咁樣就失去子予。但你嘅岀現,令我擁有翻佢。」爸爸摸一摸我個頭。

「 你岀世之後,子予嘅身體好翻左好多。佢開始有翻精神,亦食多左嘢。所以,你先可以有一個豐富嘅童年。係你嘅印象中,應該有過唔少一家人去行山嘅畫面。」

「 難怪爸爸你成日話我係上天送俾你嘅禮物。」





「 你的確係,只係⋯⋯呢段快樂嘅時光唔能夠長久。有啲事,我地一直都瞞住你,唔想作為小朋友嘅你,去承受大人嘅悲。」爸爸搖一搖頭。

「 爸爸嘅意思係?」

「 由你小二個年開始,子予嘅身體就每況愈下。佢成日都會嘔,而且刷緊牙嘅時候會無故流鼻血。」

「 點解⋯⋯我會一啲印象都冇?」陪伴係自己身邊嘅人如此病重,我竟然一啲都唔察覺。

「 乜你覺得,大人唔想俾你知嘅事,你會咁容易就知道?」爸爸向我苦笑。

原來係交通意外之前,媽媽嘅身體就唔好。

「 子予曾經同我講過,佢好擔心你會變成第二個佢。」

「 第二個媽媽?係乜嘢意思?」我唔明白。





「 佢冇講詳細嘅情況。佢只係要我好好照顧你,不過我辜負左佢。」爸爸愧疚地望住我。

第二個媽媽?究竟媽媽想同我講乜嘢?
已有 0 人追稿