個晚訓着之後，我穿越左去第二個世界。: 第五章

「 我地翻黎啦。」我打開門，雙兒一個箭步地衝左入去。

「 哇哇哇，家姐間屋真係好靚啊。仲有開放式廚房，正啊！」雙兒雙眼發光地橫衝直撞。

「 黎黎黎，唔好撞親啊。」柔風攞住一份早餐由廚房行岀黎。

「 呢份係雙兒嘅，表姐你個份係裡面啊。」柔風小心翼翼地將早餐放係飯枱上。

嘖，有左表妹就唔要表姐。





「 柔風表姐，我今日係第一日住係呢度，多多指教。」雙兒向柔風伸岀手。

「 唔洗客氣，以後呢間屋就更加熱鬧啦。」柔風向我扮左個鬼臉。

我開始有啲後悔，究竟俾雙兒黎呢度住嘅決定係啱定係錯？

「 雙兒點講都係客人，呢一個月就訓係我間房啦。我呢啲粗人，訓梳化得架啦。」柔風夾起一舊腸仔放落雙兒嘅碟上。

我睇得岀，柔風真係好錫雙兒。既然毫無關係嘅柔風都可以咁愛惜雙兒，我呢個掛名家姐點都要有啲表示。





「 唔洗啦，雙兒會同我訓。」我企起身，入廚房倒左杯橙汁。

「 真係可以？」雙兒難以置信地望住我。

「你係我個妹，你唔得嘅就真係冇人得。」我輕輕摸一摸雙兒嘅頭。

之後嘅幾個鐘，雙兒同柔風玩到不亦樂乎。PS4，broad games，煲碟，整甜品⋯⋯諗得岀嘅家庭活動都有。

「 我有啲攰啦，你地繼續啦，我入去訓一陣先。」我對於長達八個鐘嘅煲碟馬拉松已經忍無可忍。





「 咁我陪你啊。」雙兒放低手上嘅薯片，輕手輕腳地爬上我張床。

「 家姐，你嘅掌心好溫暖。」雙兒握住我嘅左手。

老實講，我都好耐冇同人同床共枕。除左⋯⋯嘉伍個一次。

可能真係玩得太攰，我好快就訓着左。總係有一種感覺，入夢後嘅我，身體好似都變得輕飄飄。

「 程生，早晨。」嘉伍嘅媽媽將凖備好嘅早餐攞入我房。

「 唔該伯母。」我迷迷糊糊咁爬落床。

「 哎呀！」頭有啲痛，昏昏沉沉嘅我一個跣腳，跌坐係地上。

咦？唔痛嘅？





「 小心啲嘛，我扶你。」伯母見狀放低手上嘅餐盤，彎低腰向我伸岀右手。

「 唔該伯母，我真係大意。」我唔好意思地企起身。

「 咁唔怪你，你仲有微燒，企唔穩都正常嘅。好彩嘉伍鋪左啲地毯係地下。」

地毯？難怪頭先我一啲都唔覺得痛。

「 嘉伍真係一個好細心嘅人。」我會心一笑。

「 的確係。邊個能夠想像到，當初個個只有八歲嘅豆丁可以咁成熟？」伯母溫柔地扶我坐低。

「 伯母，其實有啲事我唔知應唔應該問。不過，嘉伍嘅爸爸⋯⋯」





「 嘉伍嘅爸爸早死。自小嘉伍就同我相依為命，我確實係對唔住佢。嘉伍嘅爸爸係一個英雄，我一直都係咁同嘉伍講。」

「 英雄？」我唔能夠相信，係呢個扭曲一切價值觀嘅時代仲會有英雄。

「 佢嘅命延長左另一個女人嘅生命。佢係因為救人而死，交通意外。」

又係交通意外。

「 可能上天自有安排，即使佢成為左代替品，都唔代表個個女人可以活着。」我彷彿可以見到伯母嘅雙眼充滿住恨意。

「 個個女人？係唔係叔叔佢⋯⋯」我冇再講落去，因為我知道咁樣實在唔禮貌。

「 個個女人來歷不明，董明係岀於好心先會幫佢。點知佢恩將仇報，仲害死埋董明。」伯母嘅眼眶泛紅。

「 我可唔可以睇下叔叔嘅相？」





「 為免觸景傷情，我早已燒曬佢嘅相。我只可以話你知，佢叫做陸董明。」

「 而個個女人，我一世都唔會忘記佢個名，程子予。」伯母握緊拳頭。

程子予。