個晚訓着之後，我穿越左去第二個世界。: 第五章

「 呼⋯⋯」我張開雙眼，面前係一張精緻嘅臉。

「 雙兒醒下，唔好再訓啦。」我扯一扯蓋係雙兒身上嘅被。

而家幾點？我好似已經訓左好耐，仲發左一個奇怪嘅夢。夢裡面嘅婦人咬牙切齒地講岀媽媽嘅名字，點解？明明只係一個夢，點解我會咁在意？我竟然係一個夢裡面對去世嘅媽媽咁唔尊重。

身邊嘅雙兒依然係昏睡狀態，大概佢都玩到好攰。

我攝手攝腳地行岀房門，生怕會嘈醒沉睡嘅雙兒。





肚有啲餓，大概係繼午飯後都冇食過嘢嘅緣故。而家十二點半，相信柔風都訓左。睇黎今晚嘅宵夜只可以靠自己，腿蛋麵應該都唔會好難整啩。

行岀大廳，見到有一個長髮披肩嘅身影坐係梳化上。

「 柔風，幫我煮麵啊。」我從後拍一拍『 柔風 』嘅膊頭。

『 柔風 』轉身望向我。

空氣彷佛凍結了般，眼前嘅唔係柔風，係媽媽。





一個悲傷嘅媽媽。

「 媽媽⋯⋯」我下意識地攬住媽媽。

「 樂生，你一定要快啲走。我講過好多次，你唔可以踏入呢度。」媽媽推開我。

「 媽媽係呢度，我就唔會走。」我堅定地望住媽媽。

「 呢個係錯覺，你根本唔應該有呢種能力。樂生你望清楚，呢度唔係你屋企。你仲留左係呢度，未翻去個邊嘅世界。媽媽我已經⋯⋯已經⋯⋯已經唔存在啦，你醒下。」





已經唔存在，媽媽已經唔存在。

我放開握緊媽媽嘅手，一步一步地向後退。

但，呢個只係我嘅夢。就算只有一次都好，我都希望可以由我黎決定。媽媽，就呢一次，就今次俾我好好抱實你。

「 唔好，唔好。樂生，呢個唔係你嘅夢，呢個世界並唔屬於你。快啲離開呢一度，快啲！」媽媽使勁地推開我。

「 子予，你咁樣做並唔啱規矩。」一把聲音係空氣中傳來。

「 惜時，我同你之間嘅協議早就達成，點解你仲要拖我個囡落水？」媽媽驚恐地望向天上。

「 達成？當初我只係要你留低，但你欠陸家嘅命必須由呢個細路黎還。 」被媽媽喚作「 惜時」嘅聲音逐漸變得嚴厲。

究竟發生咩事？我甚至有一刻懷疑過，呢個並唔係一個夢。可能正如媽媽所講，我進入左另一個世界。