男女出街食飯,少不免會遇到一個既十分普遍,同時又很尖銳既問題,就係:今餐飯錢,由邊個俾?
 
呢個問題,得三個可能性。
 
一係,由女方俾。但無可能者吓話!?作為男方,就算係對方開到聲話佢請,自己都要搶翻張單去埋啦!?就算人地唔話你無風度,自己都覺得無面!
 
一係,由男方俾。好合理,最正常不過既做法。
 
再唔係,不如今餐AA制?
 


但係,AA制其實都有幾種。
 
埋單嗰陣,各人拎出銀包,俾翻自己嗰份錢...
 
「丫...我找翻三蚊俾你啊,你個海南雞飯凍飲,應該係五十七蚊至真。」
 
呢種計到盡既做法,係最核突。
 
最簡單既做法,就係將餐飯個總數除以二,即一人俾一半。雖然成件事看似變得理所當然,但一樣都係肉酸。相信一個稍為有自尊心既男生,係唔會接受得到,當埋單嗰陣,對方需要拎出銀包。
 


某程度上,呢種係男人骨子裡既一種迂腐。
 
「剛才你請食飯,不如一陣我請翻你食糖水?」女方。
 
「吓...要你破費,邊好意思啊...」阿明雖然覺得有啲唔好意思,但並唔會一口拒絕。
 
「唔緊要啦!無理由全部都係你俾哂者!」
 
以上呢種AA制,係最自然,最唔造作,當中更散發著一種甜蜜...
 


當然,呢啲野好睇對手。
 
由阿明同佢女友認識既第一日開始,就一路實行緊呢種AA制。
 
假如阿明請食飯,對方之後就會主動請翻佢睇戲。今年阿明請去日本旅行,下年對方就請翻佢去泰國。
 
呢種並唔係一種單純既禮尚往來,而係大家都抱有相同既想法,一種唔捨得對方花咁多錢,為對方設想,體貼另一半既深思熟慮。
 
至於買樓,聽講對方都話:「首期方面,不如一人一半啦。」
 
「唔得...講好買樓既野係由我負責架嘛!」阿明也有一種大男人既迂腐,認為成家立室既事,都係男人既責任。
 
「咁我都想出翻分力,可以快啲有頭家嘛...一人一半你唔肯,咁不如你出大份,我出細份喇?」
 
「咁樣樣...」


 
「一於咁話啦,你七我三,或者你六我四。」
 
呢種「你出大份時,我出細份;你請完我,我又請翻你」既AA制,其實都唔錯啊...
 
呢種女朋友,去邊度搵?
 
已有 0 人追稿