拍拖其中一樣令人最煩惱既事,莫過於大時大節要諗送咩禮物。
 
情人節,聖誕節,拍拖週年紀念,生日…呢啲日子,禮物一定唔少得。特別係生日,假如你唔記得對方生日,或者當日無任何表示,下場其實同你選擇出軌差唔多,因為喺佢心目中,你都係一樣,你已經唔再愛佢。
 
仲有,情人節都有分兩種,西方情人節,同埋中國既七夕節。七夕節雖然唔算係主流既節日,但就算唔送禮物,都要食餐飯表示吓心意,用行動去表示「我心入面其實仲有你」,否則對方又會借題發揮:「你真係變左…」
 
「吓!?邊有啊?」
 
「你知唔知今日係咩日子?」
 


「今日係…」絞盡腦汁。
 
「今日係七夕啊!你以前每逢呢一日,都一定會同我食飯慶祝架!」
 
無錯,係以前。
 
拍拖初期,通常乜都會做到足,但一拍耐左,人就會開始變懶。禮物方面,假如可以唔送既話就唔送;食飯方面,假如有得揀,就不如食平啲。
 
熱戀期一過,以前既浪漫就無哂。
 


比起以前,當現在既你有任何落差比較,你就等於變左。
 
男人會覺得:「反正下半世都會同你過,而家唔使再搞咁多野啦吓話!?」
 
阿明話,佢從來都無呢啲煩惱:「吓…我好耐無送過禮物喇喎,就算生日,通常都係食餐便飯就算。」
 
「你女朋友竟然無任何怨言!?」
 
「無啊,因為係佢叫我咁做…不過有一個要求,佢堅持左咁多年都依然無變。」
 


「咩要求?」
 
「就係生日嗰晚既凌晨十二點,要打俾佢同佢講聲生日快樂。」
 
「就係咁簡單!?」
 
「就係咁簡單啊!」
 
呢種女朋友,又可以去邊度搵?
 
已有 0 人追稿