《揸住水槍打喪屍》: 「我唔會殺你住。」
誤會總是一層一層地加深,當你去試圖解開誤會時,誤會總會如鬼魅一樣死纏不放。
在看過我們的表現後,營地的人至少可以肯定我們和喪屍的敵對,換句話說我們是站在人類這種。
終於在營地安頓下來,感覺很累。
吃著由德華反抗戰線運來,碎掉的威化餅和檬茶,突然覺得很唏噓。
紅姑娘說高兒一見到我還是會情緒失控,作為不受歡迎人物,我也自己去睡車子。
細小的擋風玻璃可以令我看著天上的銀河....
銀河.....?
香港看到銀河?!
漆黑的天幕,如恆河沙數的星星在閃爍著,一條淡淡藍色的光帶貫穿星空,如上帝也在以瞳孔凝視這塵世。
我..我多久沒有認真看過天空?
有人在接近。
我流暢地拔出手槍,指向腳步聲的方向:「邊個,出黎!」
「嘩嘩嘩冷靜D,我無惡意,我係呢度既話事人,呃,算係話事人啦。」
「名?」
一個人影高舉雙手從暗處走出來:「D人叫我做高隊長。」
「又係姓高?所以你係黎為你妹妹報仇?」我拉動手槍把子彈上膛。
「痴線架咩..我..我唔係呀救命,你放低槍先啦,你係咪對個個都咁有敵意架啫?」
我瞇眼打量這傢伙,方臉,中等身材,三七分界,大頭仔,看來沒有惡意。
暫時來說。
我把手槍收起:「高隊長,搵我有咩事。」
「我係..黎同你傾下計..」
我冷笑一聲:「傾計?定係想套話?」
「你對每個人都係咁既態度?」
好像是。
我不發一言,高隊長也自己接話:「我地呢度設立既目標,係阻止D人沖去送死。過左呢度,就係所謂既無人帶,個度係喪屍既領域,為左防止有人用車沖過去,我都都設好路釘陣,真係估唔到有人會揸運鈔車沖過....」
「我都估唔到自己差D死係人類手上。」
「......代佢地講聲對唔住,但係其實我地呢度都冇咩系列,我都係名義上既話事人...因為新界東呢邊喪屍太多,我地都只係打遊擊,定期由唔同既遊擊隊黎呢度當值防止有人沖入去送死,而我就係長留呢度..」
「點解你要長留呢度?」
他低頭道:「因為我既遊擊隊隊員,除左我之外,都死晒。」
原來是這樣。
「...唔好意思。」
「唔緊要..至少,佢地唔係白死..佢地死個時,都係同岩岩一樣。」
「同岩岩一樣?」
「一個黑衣人出現,發出好尖既音頻,然後喪屍暴走發狂。」
「你地都遇到過?」
「係..我就係唯一活落黎既人...一向弱勢既喪屍突然變成怪物咁強...」
「你知唔知佢地係咩人?」
高隊長苦笑一下:「我就係想黎問你呢樣。」
「我有小小猜測。」我遞給他一盒檬茶。
他接過:「猜測?」
「簡單既推理啫,佢地可以點控制喪屍,即係話佢地了解喪屍,喪屍係人為製造,所以佢地同產造者有關連,甚至有可能就係製造者本身。」
「...嗯嗯,之後呢?」
「喪屍會被聲音吸引,而咁岩佢地都係用聲音控制喪屍,可見佢地好了解喪屍。而今日件事係突然發生,佢地都出現係現場,佢地點解咁快會到現場?」
「用車?」
我搖搖頭:「可以,當佢用車,但係佢地點樣知道呢度發生事件?製造者,佢地點樣知?或者係話,佢地搞到咁大件事之後.用咩角度睇緊成件事既進展?我未諗透。」
即使想通了,我也不想和其他人說。
因為答案本身,就不可以和任何人說。
製造者,恐怕已經混進了我們之中,唯有這樣,事件發生時他們才能馬上出現,穿上黑衣,控制喪屍。
這事只有我一人知道。
高隊長頓一頓:「.......的確..阿貓,你好聰明。」
我揮揮手;「下?係人都諗到啦。再者我都未諗到最後答案....」
「又唔好咁講,例如我就諗唔到...俾D信心自己。不過,我諗天光之後你地要走啦。有D人對你地仲有誤會,我好難做。」
「明既,我地都重有地方要去,你唔會欄我地?」
「點會。」
「..多謝。」
「好啦,今日都辛苦晒你地,架車...搞成點?」
「換左車軚,應該冇問題。」
高隊長拍拍我的肩:「黎啦,呢度邊訓得人,我有多個營,黎我呢邊訓。」
「不了,我訓唔慣生保..」
「咁樣,好啦,我俾個睡袋你,至少軟D。」
「多謝。」
看來是個很細心的人。
「個邊有瓦遮頭,你可以去個邊訓,有時半夜會落雨,拿唔好推我OK?你假假地都用消防車打爆晒D喪屍,英雄點可以訓車尾,俾面去個邊訓。」
那我就不推卻了。
第二天早上。
一陣氣息吹到我臉上。
從睡處中猛然嚇醒的我拔出背後的槍指向前方,一陣個人影隨著尖叫聲向後急撤:「痴線架你?!」
是...是紅姑娘?
「紅姑娘?你..?」
「有靚女叫醒你,你第一時間係拔槍?你GAY架?」
我失笑道:「對唔住,神經有D過敏。」
「睇得出,成日啦埋口臉,揸住拳頭咁。」
我把槍插回腰間:「我地..依加去邊?」
「繼續行啊,仲要去數據中心。」
我站起來伸一個懶腰,在開始踏入旱季,洗澡是一件自殺的行為,有水也只能用作注入水槍中攻擊喪屍,我昨晚也只是換過衣服。不過在這種喪屍末日下,一身男人味也沒幾個人介意吧。
「安仔,搞成點?」
紅姑娘和一個小伙子打招呼,他一身油污從運鈔車車底滑出來:「搞掂,CHECK好晒,性能冇問題,係冷氣弱雞左D,可能呢架車唔係FOR嘆世界用,哈哈。早晨,你就係阿貓?」
「無錯。」
「我叫安仔,係附近幫唔同遊擊隊搞下裝備之類,識少少機械整車個D,高隊長叫我黎幫你D CHECK車。」
「唔該。」
「啊,好冷淡....」
華DEE從旁走出來:「唔好意思啊,阿貓佢係咁,冇惡意架。」
說不定有啊,你怎可以幫我代言。不過這次真的沒有就是。
「由呢度再東進,就係無人帶,得喪屍,你地....你地.....」
「有野就講。」剛起床心情正不爽。
「一路好走..?」
我白他一眼,他回我一個鬼臉就離開。
「雙雙呢?」
「車上面,今日我同華DEE繼續坐前面,你可以繼續坐後座,雙雙去後面戒備。」
「唔使啦,後座有2個位。」
「冇位啦。我多左個人。」
多左...?
「高兒,會同你坐後座。」
「下?!?!」我大叫一聲,引來附近幾個人的目光,「我去坐後面算,你俾雙雙同個乜撚野高兒坐後座算啦!」
「唔得,雙雙負責警戒後面,一定要後面。」
「咁我同佢坐後面。」
「唔得,要搵人陪住高兒。」
「我唔排除行到一面同佢互相撕殺啊!」
「阿貓,」紅姑娘搭我肩膊,「聽多我一次講OK?」
我拍開她的一對粉色的手:「唔OK,今次點都唔OK,條白痴港女到依加仲覺得我係殺佢細妹既兇手,行到一半隊我一刀點算啊,唔得唔得!」
「唉,咁樣,華DEE同佢坐啦,雖然帶路唔方便。」
關我撚事啊。
座位安排就這樣定下來,我們由四人小隊變成了五人小隊。
雙雙.....
尋日情不自禁抱了她一下,應該不會被殺掉吧。
東部防線每天九時和六時各自開啟一次,當天要出去/進來的遊擊隊和人都要在那時間進出,然後防線就會密閉到下一次。這兒因為是接近無人帶,有雙重防線,穿過內部防線後,內部防線就會關上,接著外部防線開啟,好像是水下海洋科研基地潛水員進出的方式船,這聽說是安仔的傑作。
「你睥夠過未呀。」剛剛穿過內部防線,防線正在關上的時候我發現後座的高兒一直透過倒後鏡瞪住我。
「唔得啊。」
「死MK妹,白痴港女...」
除了我們的車後,旁邊還有兩架客VAN和一架貨車,前面的有輪貨櫃滑開後,就是喪屍的領土-無人帶。
「隆...」
「叮噹叮噹叮噹叮噹叮噹叮噹!!」這兒也有警報聲。
前面防線開始打開。
「好啦,一人少句。高兒,記唔記得尋晚我同雙雙同你傾過咩?」
「記得...」
「你到底跟黎做咩啫?要報仇就落車隻抽。」痛痛快快,別一直在這兒纏住我。
「我唔會殺你住,阿貓...」
「呵呵,多謝你大恩大德啊。」
外部防線完全打開,車子低鳴一聲向前駛出。