《我家姐竟然做咗我班主任？？？》: 【23】

只見漫澄佢目無表情咁望住前方，無留意到我。

我係側個頭過去望，個頭勁用力，勁辛苦，又要扮到唔覺意咁。

當偷望過後，先發覺自己心跳無啦啦加快，原來自己頭先閉咗氣，自己唔知。

「大家睇下喱篇表白文章，大家覺得點？」

佩欣佢舉手回答，「我覺得佢文筆普通，講嘅嘢都好普通。」





當然啦，班上面除咗有人搞事，咁就梗係會有啲正正經經嘅人嚟平衡返。

佩欣就係嗰種人，讀書成績僅次於漫澄，佢係嗰種無時無刻都好認真嘅人嚟，你同佢傾偈，係會覺得佢西鳩你面。

「除咗咁樣呢？」Miss Tai望住全班。

「同我寫嘅差唔多咁啦。」其中一位男同學講。

又的確係嘅，依家大家嘅文筆係咁就係咁架啦，可以一分高低嘅只有感情。





我自問感情都係真嘅，寫出嚟係出自真心架。

「嗱！我依家唔用中文老師嘅角色去考究喱篇嘢，我用一個普通女仔嘅角度。」

「我自己收唔少情書啦，林林總總，但好多都有錯別字，甚至啲MK字，女仔一睇落去已經無曬感覺，諗都唔洗諗。」

「雖然文筆麻麻，但係勝在有畫面，可以睇得出寫嘅人嘅用心。」

「所以寫正字係基本，就好似你同鐘意嘅人出街，你會唔會背心短褲踢拖？」





「如果我知道自己附近有個男仔守護緊自己，我一定會覺得好有趣，同時會好奇，好想知係邊個。」

「大家又想唔想知喱篇文係出自邊個手筆呀？」我家姐陰險嘅笑容又再次出現。

我諗喱刻先係佢今日真正嘅目的。