《我家姐竟然做咗我班主任？？？》: 【26】

唔緊要，我靠自己都可以嘅，無女神嘅支持，我仲有家姐！

但我連家姐係邊都唔知。

話咁快，就要企落線上面，準備起跑。

我拿拿林專心落嚟，死命咁望住個終點，同埋隔咗我一個身位嘅David。

槍聲一響起，我就即刻向前衝，用盡自己所有力量，跑快啲跑快啲！





我眼尾瞄到David條仆街係我前面，我唔甘心。

係喱個咁段嘅時間入面，你根本無足夠思考嘅時間，你全靠係自己嘅反應。

我咬實牙關，拼命向前衝，我未試過咁樣出盡全力。

三十米......

二十米......





十米......

仲有幾步，但我都好似同David拉唔到個距離，佢都仲係我前面。

於是我做咗個向前壓線嘅動作，好正常姐係咪？

好死唔死，真係屌曬老母，成個向前仆，仆住咁衝線。

之後我就感覺到陣陣嘅痛楚，仲要碌咗一段距離。





我已經唔敢想像有幾多人睇緊我，差唔多成校都會見到，如果有心見嘅話。

我慢慢起身，扮無事咁走返去。

我感覺到手肘同埋膝頭哥都流緊血，同埋都幾痛下，當下我知道柒咗，但我都要拎返一渣沙。

我行緊返自己位，但我遠遠望到家姐好焦急咁行過嚟，佢唔係跑過嚟，佢係急步行過嚟。

而我睇到出，佢雙眼係關心嘅。

我呆咗呆，與此同時，我係感動嘅。

「班長，」家姐佢不忘加返個頭銜。

「你無事呀嘛？」家姐觀察下我個傷勢。





「邊有事呀，運動下整親家常便飯姐，好正常。」我強忍身上陣陣嘅疼痛。