《我家姐竟然做咗我班主任？？？》: 【27】

估唔到我之前打交整親無幾耐，依家比賽又仆多次街，仲要之前啲傷都未好返架陰公...

此時此刻，David係第一名跑完，輕輕鬆鬆咁返去，經過我隔離嘅時候，首先上下打量家姐。

今日家姐又係符合主題，運動look，上身著得稍為緊身一啲，成個身材，線條美出曬嚟。

真係成個陳敏之咁，索！

David打量完之後，就對住我，擺出勝利者嘅笑容，當中仲帶點恥笑嘅意味。





真係好鬼黑人憎，有種想衝上去打柒佢嘅念頭，係我腦入面一閃而過。

我依家傷咗咋！如果唔係......

不過我明，我輸咗，輸咗嘅男人，就要承受俾人睇唔起嘅後果。

不嬲都係咁架啦，贏咗嗰個話事，我未聽過輸咗嗰隊，因為輸得精彩，有體育精神，而贏咗嗰隊甘願俾輸嗰隊晉級。

現實就係咁，輸咗就唔好俾咁多籍口自己，咁樣反而顯得你有骨氣！





個心係唔甘心架啦，但仲有機會！至少我仲有決賽。

可惜以依家嘅狀態，決賽都唔知跑唔跑到。

不過！千其唔好睇小男人嘅競爭心。

家姐慢慢扶我過去醫療處度，就幾步路姐，如果唔係家姐半威逼我，我諗我會自己忍痛，去廁所衝下水就由佢。

「幫我睇住佢，佢好調皮架，一陣佢又走咗架啦。」家姐對住醫療處嘅同學仔命令道，我無得走啦。





焗住要留係度。

我俾人處理緊傷口，同時我係大螢幕度見到下一組係跑800米，上面有漫澄嘅名。

我係操場搵緊漫澄嘅身形，好吃力咁搵咗一陣，終於搵到佢籤瘦嘅身軀。

佢都係著緊學校嘅PE衫同PE褲，平時體育堂已經有留意，唔知係咪成日見漫澄都係著校裙，好似天使一樣咁純潔。

忽然間轉運動look，就同佢成個人好唔襯咁。

但我無因此而唔去留意佢，佢依舊係我眼入面嘅焦點。

佢準備起跑，槍聲一響，漫澄好似慢半拍咁起步，淨係起步已經慢人哋一截，可想而知後面係咩結果。

一圈過後，果然佢係跑最後嘅一個。