【英雄系列5】天使與吸血鬼: 2.大家庭
瞳瞳心裡想
「點解...友美小姐果陣會人間蒸發左，依家又會做左IID特工既...」
「好啦好啦，瞳瞳，我代表Archangel特別行動組正式，歡迎你！」大久保笑道:「以後，你就坐希路隔黎啦」
「..嗯....」瞳瞳坐到希路隔黎既位置
「希路，你負責教瞳瞳野，無問題丫嗱？」
「嗯」希路點一點頭
「希路先生，以後多多指教啦...」瞳瞳再問:「大久保先生...咁Archangel係咩意思呀？」
大久保先咳兩聲
「Archangel係由一堆富豪，為左保護世界安全而研發既超級電腦，響半個月前終於交到我地IID手上」
「而美國既IID人員亦將佢設計成一個計算風險既程式，透過監視網絡、CCTV等既系統計算邊一度將會發生罪案，
呢個亦係呢一team成立既原因，我地既所有行動都會聽從Archangel既指示，去解決罪案」
洛迪古斯補充:「即係好似果套美劇person of interest咁，電腦會計算邊d人將會出意外」
「咁...咁咪好犀利？」
「嗯，Archangel投入服務後，全球95個有IID分部既國家減少左50%既犯罪傷亡率，預測成功率係100%」林聰道
「而瞳瞳，你響呢一team既角色，就係戰線指揮官battlefront commander，負責響行動前設計戰術，行動時聯絡
各個單位」
瞳瞳失望道:「咁...咁咪即係上唔到前線？」
奈央拍拍瞳瞳:「瞳瞳你真係好想做特工咁喎，不過呢d野慢慢黎啦！」
「咁又係...我咩都唔識」瞳瞳低住頭:「我...會比心機學做battlefront commander架啦！」
希路將一本「IID特工手冊」交比瞳瞳
「凌愛瞳，睇左佢丫」
「知...知道..」面前冷如冰水既希路，瞳瞳亦有點緊張
「希路先生同友美小姐今日響地鐵係一齊行，唔通...佢地係男女朋友？」
用左一個上晝，瞳瞳終於睇完100頁既特工手冊
內容不外乎特工行動時既守則、行動以外既規條等
「睇完啦嘛？我比你睇d野」希路問
「睇...睇咩呀？」
希路將一大疊文件放上瞳瞳面前:「呢堆係近2年IID所有對付綁架、行劫既行動報告，呢個星期睇哂佢啦，對你訂立戰術有用」
「嗯....」
瞳瞳心想:「咁....咁多？」
「唉...好肚餓呀！！！」林聰起身大叫:「喂，食飯啦！」
大久保:「今日為左歡迎瞳瞳，我地上樓上間茶樓食啦，我請！！！」
「大佬好野！！」
「瞳瞳！去食飯啦！」奈央道
「唔啦...希路先生叫我今個星期..睇哂呢d文件呀..」瞳瞳繼續埋頭睇住文件
「咁都要食飯架嘛，長命功夫長命做呀」奈央拉起瞳瞳:「黎啦，食飽飽先有氣力做野架嘛！」
「哦...咁好啦...」瞳瞳不情願地站起
7人上到60樓既中式餐廳
一埋位，洛迪古斯同林聰就拎起點心紙狂點
「嘩你地兩個餓鬼托世咩！」大久保笑道
洛迪古斯道:「難得大佬你請食飯，咁緊係食返夠本啦哈哈！」
「哼，肥死你呀金毛IT狗！」奈央跟瞳瞳道:「瞳瞳，你想食咩呀？」
「我無所謂呀....你地揀丫...」
「咁...希路同友美你地兩個呢？」奈央問
兩人同時冷淡回應:「無所謂，你地揀啦」
「依家d後生仔個個都係咁既，乜都話無所謂既」大久保笑道
瞳瞳望住希路同友美兩人
「點解...佢地兩個好似..完全唔想講野咁既..」
「係喎，瞳瞳咁靚女，唔知有冇男朋友既呢？」洛迪古斯問
「你唔係以為自己有機會下話！？」
奈央笑道:「瞳瞳咁靚女，大把男仔爭住要佢啦！！」
「呃...其..其實我依家冇男朋友呀...」單純既瞳瞳照直回答:「我都有成兩年冇..拍拖啦」
「哦......不過以瞳瞳你既條件，好易搵到既姐！」洛迪古斯道:「丫野食到啦，快d起筷啦！」
「瞳瞳，食蝦餃丫！」奈央將蝦餃夾到瞳瞳碗中
「唔..唔該奈央小姐！」
「嘻嘻，瞳瞳你唔駛唔該前唔該後既，大家一家人黎架嘛」
奈央再講:「瞳瞳，你點解會想做特工既？」
「其實...係因為我以前個男朋友，都係IID既特工黎...」瞳瞳有點不好意思
「佢仲曾經為左救我，差d命都冇...但係我...就辜負左佢.」
「所以，我好想可以好似佢咁，做一個好既特工！」
「嘩！！！真係架？！！！！」
眾人反應過敏:「唔怪得你咁想做特工啦！」
「但係...我體能又差，又唔識武術...睇黎有排都未做到特工啦...」灰心既瞳瞳道
奈央拍拍瞳瞳
「唔駛咁架喎瞳瞳，後勤人員都好重要、都救到人架！」
「我地幾個慢慢教你野，好快你就好犀利架啦！」
林聰道:「嗯！難得瞳瞳你咁有heart，我地實會幫你既！」
「嗯....」
「......」
希路同友美兩人一語不發，只在進食
「呼.....5點！又收工！！！」
「吓...咁早收工？我地唔係要根據Archangel既指示黎行動既咩？」瞳瞳放下文件，問
「哈哈，瞳瞳你有所不知啦，我地的確係要聽Archangel既指示，不過只限9-5呢個時間咋」大久保笑道
「如果Archangel夜晚有指示既話，就會交去比外面負責巡邏既特工」洛迪古斯道
「瞳瞳，一齊走啦」奈央邀請瞳瞳同行
「唔啦.....我..我仲要睇埋d文件呀....」瞳瞳繼續埋頭苦幹
「咁多份，你今日都睇左五分一啦，仲有成個禮拜....你驚咩呀？」
奈央道:「呢d野你拎返屋企睇都得啦！係咪咁話呀希路？」
「無所謂...你鐘意啦，我又唔會考佢既」希路已經拎起袋:「友美，行啦」
「嗯」
「呃...瞳瞳你唔駛理佢地兩個，佢地係咁cool架啦...」奈央苦笑道:「咁....行啦！」
「....嗯」
「呵呵，有瞳瞳你呢個女仔，以後返工又多返d樂趣啦！」奈央埋怨道
「之前呀，成team人得我同友美，友美仲要成日唔講野咁，cool到死！」
「咁...你知唔知友美小姐點解..會咁cool既？」
瞳瞳斗膽問:「我記得...友美小姐佢以前係歌手黎架....」
「係咩...唔好意思呀瞳瞳，我都係上年先由大阪黎香港架咋...」奈央摸摸頭:「乜原來友美...以前係歌手黎架
？！」
「我都係有少少印象咋...所以都唔敢肯定呀....」
「不過...佢唔想既話，又的確冇得迫佢既」
奈央忽然語重心長:「每個人都有自己既過去...」
「奈央小姐...」
奈央知道講錯說話:「丫...好似講得誇張左d咁，哈哈..」
兩人行到去中環地鐵站
「瞳瞳你住邊架？」
「我住天水圍呀...」
「嗚...咁即係唔同路啦...」奈央將瞳瞳揮手道別:「我住紅磡架，咁聽日見啦...拜拜！」
「嗯...拜拜...」
瞳瞳心想:「奈央小姐...真係好好人呀...」
「我返黎啦...」瞳瞳打開家門
「咦，返黎啦瞳瞳？」瞳瞳既媽媽問:「份新工返成點呀？」
「嗯...幾好啦，同事都幾好人..」瞳瞳放下公事包
「雖然你話過呢份工係一年實習，不過我始終都唔係幾同意你休學呀...」媽媽語重心長道
「但係...中文系始終好難搵到野做嘛...難得呢份工又比機會我...」
瞳瞳打開房門:「我返入房先啦...」
「唉....唔知，仲可以隱瞞到幾時呢...唯有見步行步啦...」
瞳瞳脫下襯衫，攤響床上:「我...係咪真係可以...做特工呢....」
「不過..」
瞳瞳取起床邊，跟石仔既合照:「為左石仔...我一定要努力！」
摩星嶺，某大宅中
「希路...」穿著浴袍既友美從浴室出黎:「你覺得...果個凌愛瞳點樣呀？」
「正常女仔一個....幾勤力」希路冷冷回答
「係咩...」
友美輕輕笑一下
「如果佢知道..我同你既關係既話，唔知會點呢」