一段日子過後, 呢一晚, 家姐去咗同一班中學舊同學 gathering, 酒店餐廳內, 一大班女正響度嘈冤巴閉住, 「喂, 有嘢宣佈, 惠宜話下個月就要結婚嘞。」

「嘩, 恭喜哂喎, 咁係唔係我哋呢班人會負責做姊妹呀?」

成班人正在嘈嘈閉之際, 索女 Stella 突然間再問, 「咁惠宜之後妳哋估吓又會輪到邊個咁呢?」

一隻手正緩緩咁舉起住, 「嘩, 咩係美欣呀, 恭喜哂喎, 咁妳又係幾時註冊同擺酒呀?」

兩條待嫁啲女正比成班人團團咁圍住嚟追問, 家姐亦上前向美欣道賀住之際, 美欣突然問住家姐, 「係呢 Catherine, 強仔…呢排…佢點樣呀?」





「強仔? 早排先聽佢講好似同條女散咗, 跟住見佢都無厘心機咗一排, 但個衰仔其實都仲有好多女係好冧佢嘅, 不過就見佢成日都 cup 啲女仔線, 又話啲女好鬼麻煩咁, 呀, 係嘞, 好似聽佢講過話有個女仔係佢好鍾意嘅, 但唔知咩嘢又話最衰就係無可能……

但我問極佢又死都唔肯講, 總之就係自己響度屈埋屈埋咁, 都唔知到底佢想點, 而家就成個人都落哂型咁, 搞到佢連啱啱果次 Account 啲 exam 都話肥埋添。」

美欣聽完之後, 個心即時有啲好唔舒服嘅感覺。

呢晚, 美欣知道咗我嘅近況之後, 個心居然有啲怪責住自己咁, 死啦, 都唔知關唔關上次同佢響大陸發生咗果件事添架? 咁如果到時再比佢知道我就嚟要結婚嘅話, 咁就真係唔知佢會唔會又再受多一次打擊過喎?呢一日下晝, 我手機響起咗訊息提示, 我望吓部手機, 哦, 係美欣傳訊息比我。

“強仔, 幾時有空搵晚同你出嚟食餐飯。”





我按住手機回覆住佢, “弓起哂妳喎, 待嫁嘅心情會是如何呀? 今晚我得閒, 唔知妳又 O 唔 OK 呢?”

約咗美欣七點鐘出去食飯, 好快, 無驚無險又到六點, 到咗美欣約我響太子嘅等待地點,等咗一陣, 「強仔。」 「美欣姐。」

同佢上咗始創嘅大自然素食度食飯, 食飯期間, 「強仔, 原來你家姐已經講咗我要結婚件事比你知嗱。」美欣用啲好奇怪嘅眼神咁望住我。

我笑住同佢講, 「做咩用啲咁恐怖嘅眼神嚟望住人呀, 呀係嘞, 頭先我響周大碌度買咗啲嘢嚟送比妳, Congratulations, 預祝妳同妳先生白頭到老, 永結同心。」 

美欣接咗我份禮物之後, 「多謝哂。」





食緊飯期間, 美欣又再問住我, 「係呢, 聽你家姐講, 話你同你女友已經散咗, 佢仲話你果排真係好頹, 但今次見到你, 我又唔覺你得你係有啲咩問題咁, 呀係呢, 你家姐仲話, 你好似仲講過鍾意咗一個女仔,但又話唔知點係無可能嘅, 咁果個女仔到底係邊個嚟架?」

我吞咗啖飯之後, 跟住就再答住美欣, 「我鍾意果個女仔咪就係妳囉, 美欣姐姐。」

美欣聽到之後即時打咗個突, 「強仔…..」

美欣比我嘅坦白搞到佢好似有啲唔自然咁, 我見咁樣即時就安慰番住佢。

「無事喎, 又係好老土果句, 如果真心鍾意果個人, 咁我都想佢下半生可以得到幸福同快樂嘅, 講真吖, 果次同妳番完大陸之後, 其實我真係有啲放唔低嘅感覺架, 但當我諗通咗之後, 我就知道其實一路以嚟響妳眼中, 我都仲只係一個細路仔嚟嘅, 所以, 妳係唔使擔心我果喎。」