[人性] [感情事]我不會講你知，其實是第幾次: 番大陸

雖然事前都已經睇左說明書，但見到驗孕棒上面慢慢浮現既線，真係好緊張。 
我真係好驚睇錯，拎住支棒睇完又睇，見到T個行冇線。 
即係冇事，真係要開香檳慶祝。 

"冇事呀冇事呀！"我同Bobo興奮到攬埋一齊。 
終於放下心頭大石。 

時間過得好快，已經去到暑假。 
作為一個學生哥，暑假緊係去玩架啦！ 
所以我一早已經約哂班朋友仔聽晚去唱K。 



樂仔，呀健，仲有幾個熟既同學，加埋Bobo。 
目的地，尖東CEO。 

點知一起身，我老媽子就話佢唔舒服，但係又約左朋友要番深圳拎野。 
結果我晏晝去醫院探完佢，就被逼出發去深圳幫佢拎野。 

"BB呀，我要番一番大陸去幫呀媽拎野呀。今晚不如你去住先？樂仔呀健你都識架啦。" 我打俾Bobo。 

"下，咁你幾時番黎架？你趕得切？"Bobo問我。 



"應該得既，我會盡趕，希望十二點前番到黎啦好冇?" 

"咁好啦，你小心D呀!番到黎打俾我啦！" 

如是者，我出發去深圳。 
其實都有少少緊張，話哂第一次一條友番去大陸。 
我經羅湖過關後，就打俾老媽子個朋友。 

"你所撥打的電話正忙，請稍後再撥。" 屌，條友電話唔通。 


馬死落地行，本身都提過同佢係東門到等，我就直接搭車過去。 

過到去既時候，我再打俾佢，不過都係唔通。 
我見都已經9點幾10點，所以我就決定食D野先。 
我一個人去左附近既一間餐廳，求其嗌左個面食就算。 
就黎食完野既時候，其實我已經注意到隔離個台有3個男人會偷望下我。 
所以我決定食完野就快D走。 

我再打俾老媽子既朋友，終於通喇。 

"陳生?我搵左你好耐喇你係邊呀?" 

"唔好意思呀Hugo，我電話頭先冇哂電。你而家係邊到?" 

"我係東門呀，你要幾耐過到黎?" 



"十分鐘，到左再打俾你。" 

咁我就唯有一個人周圍行下。 
直至我行到一條比較靜既街，我覺得後面有人跟住我。 
我擰轉頭，就見到頭先個三個男人。 

"今次仆街喇。"我心諗。 
於是我扮哂冷靜，想行番去條人多既街。 
但呢個時候，其中一個男人跑左上黎企左係我面前拍一拍我膊頭。 
我唯有伸手入去褲袋。 
我唯一可以用黎自衛既，就係褲袋部硬過月球表面既Nokia。